ការប្រកួតកីឡាអេឡិចត្រូនិក MPL KH Challenger Cup 2024 លើ វិញ្ញាសា Mobile Legends: Bang Bang នឹងប្រព្រឹត្តទៅចាប់ពីថ្ងៃទី៤ ខែមករា ឆ្នាំ២០២៤ ខណ:កម្មវិធីនេះ សហព័ន្ធកីឡាអេឡិចត្រូនិកកម្ពុជា អនុញ្ញាតឲ្យលោក វ៉ាន់ សំបូរ ធ្វើការរៀបចំការប្រកួត។
បន្ទាប់ពីបានបិទបញ្ចប់ការចុះឈ្មោះកាលពីថ្ងៃទី៣១ ខែធ្នូ ឆ្នាំ២០២៣ មានក្រុមចំនួន ៣១២ តែមាន ២៥៦ក្រុមដែលបានបំពេញតាមលក្ខខណ្ឌនិងមាន Ranking ខ្ពស់ជាងគេតែប៉ុណ្ណោះដែលអាចមានសិទ្ធចូលរួមក្នុងការប្រកួតប្រជែងនេះបាន សម្រាប់ក្រុមដែលជាប់ នឹងប្រកាសនៅក្នុងពេលឆាប់ៗនេះ។
ដោយឡែកសម្រាប់ការប្រកួតជម្រុះជុំទី១ នឹងចាប់ពីថ្ងៃទី៤ ខែមករា ដល់ថ្ងៃទី០៤ ខែ កុម្ភៈ ឆ្នាំ២០២៤ ដោយធ្វើឡើងនៅទីតាំងនៅផ្ទះលេខ ១១២៦ ផ្លូវលេខ១៨០០ ភូមិ២១ សង្កាត់ច្រាំងចំនេះ២ ខណ្ឌ ឬស្សីកែវ រាជធានីភ្នំពេញ។
ក្នុងនោះ សហព័ន្ធកីឡាអេឡិចត្រូនិកកម្ពុជា នឹងចាត់អគ្គលេខាធិការ មន្ត្រីបច្ចេកទេស និងមន្ត្រីចៅក្រម- និងសង្កេតការណ៍លើការរៀបចំការប្រកួតខាងលើ ដើម្បីធានាឲ្យការប្រកួតនេះស្របតាមលក្ខន្តិកៈរបស់សហព័ន្ធ និងស្របតាមច្បាប់រដ្ឋបាលកីឡា៕
