វីរៈបុរសបាល់ទាត់ថៃ លោក Therdsak Chaimanបានសម្រេចចិត្តចូលរួមជាមួយក្រុមណាហ្គាវើល ក្នុងលីគកំពូលកម្ពុជា Cambodian Premier League 2023-24 អំឡុងជើងទី២ ក្នុងនាមជានាយកបច្ចេកទេស ជំនួសលោក Jose Alves BorgesCជនជាតិប្រេស៊ីល។
លោក Therdsak Chaiman ធ្លាប់មានកំណត់ត្រាល្អជាច្រើនប្រចាំប្រទេសថៃ ព្រមទាំងបន្តកសាងកេរ្តិ៍ឈ្មោះនៅតំបន់អាស៊ាន និងកម្រិតទ្វីបអាស៊ី កាលនៅប្រកបអាជីពជាកីឡាករបាល់ទាត់។ អ្វីដែលពិសេសនោះលោក អាចប្រកបជាកីឡាករអាជីពទាំងបាល់ទាត់ហ្វូតសាលផង និងបាល់ទាត់លើវាលស្មៅផង។
កម្ពស់១.៦៤ម៉ែត្រ បុរសវ័យ៥០ឆ្នាំរូបនេះចាប់ចុះកុងត្រាជាកីឡាករអាជីពជាមួយក្រុម Royal Thia Navy ពីឆ្នាំ១៩៩៤ ដល់១៩៩៨ ហើយនៅរដូវកាល១៩៩៨-៩៩ បានផ្ទេរទៅកាន់ក្លិប Osotspa។ ចាប់ពីឆ្នាំ២០០០ ដល់២០០៣ Therdsak Chaiman បានចូលរួមជាមួយក្រុម BEC Tero Sasana ប៉ុន្តែនៅឆ្នាំ២០០២ ក្លិប Warriors Football Club របស់សិង្ហបុរី បានខ្ចីទៅចូលរួមក្រុម។
អំឡុងពេលរួមរស់ជាមួយBEC Tero Sasana លោក Therdsak Chaiman ធ្លាប់ជួយក្រុមឈ្នះជើងឯកលីគកំពូលថៃ ២សម័យកាល ពាន Thai FA Cup ១សម័យកាល និងពាន Kor Royal Cup ១សម័យកាល។ អ្វីដែលគួរអោយកត់សម្គាល់នោះលោកក៏ជាសមាជិកដែលចារកំណត់ត្រាក្លិបបាល់ទាត់ថៃ ឈានដល់វគ្គផ្ដាច់ព្រ័ត្រក្នុងពានរង្វាន់កម្រិតទ្វីបអាស៊ី AFC Champions League នៅរដូវកាល២០០២-០៣ ទៀតផង ក្នុងគ្រាលោកបានឈ្នះពានឯកត្តជនកីឡាករឆ្នើម (MVP)។ ពេលខ្ចីជើងទៅក្រុម Warriors លោកក៏បានលើកពានលីគកំពូលសិង្ហបុរី នៅឆ្នាំនោះផងដែរ។
នៅឆ្នាំ២០០៤ ក្លិប Dong A Bank (Vissai Ninh Bình) បានចរចានាំ Therdsak Chaiman ទៅកាន់លីគកំពូលនៃប្រទេសវៀតណាម ហើយនៅនៅឆ្នាំ២០០៥ ដល់២០០៩ លោកបានត្រឡប់ទៅទឹកដីសិង្ហបុរី ម្តងទៀតដោយបន្តចូលរួមក្រុម Warriors FC ព្រមទាំងឈ្នះជើងឯកលីគកំពូលសិង្ហបុរី ៤សម័យកាលជាប់ៗគ្នា។ នៅឆ្នាំ២០១០ លោកបានត្រឡប់ទៅស្រុកកំណើតវិញ ដោយចូលរួមជាមួយក្លិប Chonburi និងបញ្ចប់អាជីពនៅឆ្នាំ២០១៧ ព្រមទាំងបានឈ្នះជើងឯកលីគកំពូលថៃ នៅឆ្នាំ២០១០ និងឈ្នះពាន Kor Royal Cup នៅឆ្នាំ២០១១ និង២០១២។
ពីឆ្នាំ១៩៩៤ ដល់២០១០ លោកបានជាប់ឈ្មោះជាកីឡាករជម្រើសជាតិបាល់ទាត់ថៃ ព្រមទាំងធ្លាប់បានជួយក្រុមលើកពានកម្រិតតំបន់អាស៊ាន AFF Tiger Cup (AFF Mitsubishi Electric Cup ) នៅឆ្នាំ២០០០ និង២០០២ ហើយនៅឆ្នាំ២០០២ លោកបានឈ្នះពានឯកត្តជនកីឡាករឆ្នើម (MVP)នៅ Tiger Cup ទៀតផង។
ចន្លោះពីឆ្នាំ១៩៩៩ ដល់២០០៥ លោកត្រូវបានកោះហៅចូលក្រុមជម្រើសជាតិហ្វូតសាលថៃ ព្រមទាំងធ្លាប់ឈ្នះស្បែកជើងមាសក្នុងពានរង្វាន់ហ្វូតសាលទ្វីបអាស៊ី AFC Futsal Championship នៅឆ្នាំ២០០០ ផងដែរ ស្របពេលនៅឆ្នាំនោះក្រុមជម្រើសជាតិថៃ ឈ្នះមេដាយសំរឹទ្ធ ក្រោយយកឈ្នះជើងជប៉ុន ៨ទល់៦។
ក្រោយចូលនិវត្តន៍នៅក្លិប Chonburi លោក Therdsak Chaiman ត្រូវបានក្លិបតែងតាំងអោយធ្វើជាគ្រូជំនួយនិងគ្រូបង្គោលផងដែរចន្លោះឆ្នាំ២០១៥ ដល់២០១៨ ហើយឆ្នាំ២០១៩ លោកទៅដឹកនាំក្រុម Phuket City ឆ្នាំ២០២០ លោកចូលរួមជាមួយក្រុម Port ក្នុងនាមជាគ្រូជំនួយ ហើយឆ្នាំជាមួយគ្នាលោកបានទៅដឹកនាំក្រុម Uthai Thani ដកើឆហបាណ២០២២ ខណៈនៅឆ្នាំ២០២២-២៣ លោកដឹកនាំក្រុម Pattaya Dolphins United និងឆ្នាំ២០២៣ ដឹកនាំក្រុម Rayong មុនបន្តដំណើរមកកាន់ណាហ្គាវើល នៅលីគកំពូលកម្ពុជា៕