សិល្បៈជាតិ៖ កាលពីពេលថ្មីៗនេះ ក្រសួងវប្បធម៌ និង វិចិត្រសិល្បៈ បានចេញសារប្រកាសតាមរយៈទំព័រហ្វេសប៊ុករបស់ខ្លួនថា ក្រុមការងារជួសជុលរបស់អាជ្ញាធរជាតិអប្សរានៅការដ្ឋានប្រាសាទតាព្រហ្ម បានប្រទះឃើញចម្លាក់បដិមាបុរាណធ្វើពីថ្មភក់ចំនួន៦ដុំនៅក្នុងការដ្ឋានដែលកំពុងតែជួសជុល។ ចម្លាក់ថ្មបុរាណដែលប្រទះឃើញនោះត្រូវបានបុរាណវិទូ នៃនាយកដ្ឋានអភិរក្សប្រាសាទ និងបុរាណវិទ្យារបស់អាជ្ញាធរជាតិអប្សរា អ្នកស្រី នេត ស៊ីមន មានប្រសាសន៍ថា ជារូបព្រះពុទ្ធគង់ភ្នែនប្រក់នាគចំនួន២ រូបលោកកេស្វរៈចំនួន១ រូបព្រះពុទ្ធគង់ភ្នែនប្រក់នាគបាក់ព្រះកេសទម្រង់សមាធិ និងបាក់ព្រះហស្តទាំងសងចំនួន២ និងថ្មកំពូលហោជាង ដែលមានចម្លាក់រូបព្រះពុទ្ធគង់ភ្នែន មានទេពទ្រពីក្រោម១ផ្ទាំងទៀត។
យ៉ាងណាមិញ ដំណឹងដែលជាក្ដីរីករាយសម្រាប់ប្រជាពលរដ្ឋកម្ពុជាដែលបានបង្ហោះចេញជាសាធារណៈកាលពីថ្ងៃទី២២ ខែធ្នូ កន្លងទៅ ត្រូវបានបណ្ដាសារព័ត៌មានបរទេសមានការចាប់អារម្មណ៍ និងបានលើកយករឿងនេះទៅចុះផ្សាយជាភាសារបស់ខ្លួន ដូចជាសារព័ត៌មានថៃ និងសារព័ត៌មានអាមេរិកជាដើម។ សារព័ត៌មានអាមេរិក Miami Herald (ម៉ាយអាមី ហឺរ៉ល) បានចេញផ្សាយដោយប្រើប្រាស់ចំណងជើងថា «រូបបដិមាព្រះពុទ្ធបុរាណត្រូវបានរកឃើញនៅក្រោមប្រាសាទថតភាពយន្តហូលីវូដ Tomb Raider នៅកម្ពុជា» ខណៈដែលសារព័ត៌មានថៃ ធំៗនិងល្បីៗជាច្រើន ដូចជា Dailynews ,Thairath,MGR Online, MCOT news និង E-Jan បានប្រើប្រាស់ចំណងជើងដូចៗគ្នាថា៖ «កម្ពុជាជីករកឃើញព្រះពុទ្ធរូបបុរាណ» នៅពីខាងក្រោមប្រាសាទតាព្រហ្ម»។
គួរដឹងថា រូបចម្លាក់ទាំងនោះបានកប់នៅក្រោមកំណកដីរបស់ខឿនខ្លោងទ្វារខាងត្បូងនៃប្រាសាទតាព្រហ្ម ហើយត្រូវបានក្រុមការងារប្រទះឃើញនៅពេលដែលអាជ្ញាធរជាតិអប្សរាសហការជាមួយស្ថាប័នស្រាវជ្រាវបុរាណវិទ្យាឥណ្ឌា (ASI) ចាប់ផ្ដើមការងារជួសជុលខ្លោងទ្វារនេះឡើងវិញ ដោយបានរើថ្មនៃរចនាសម្ព័ន្ធខ្លោងទ្វារដែលនៅធ្លាក់រាយប៉ាយដើម្បីរៀបចំទៅតាមទីតាំងដើមឡើងវិញតាមបច្ចេកទេសអាណាស្ទីឡូ កាលពីពាក់កណ្ដាលខែវិច្ឆិកា ឆ្នាំ២០២៣ កន្លងទៅ៕
