កាលពីថ្ងៃទី៦ ខែមករា ឆ្នាំ២០២៤ គណៈកម្មាធិការនៃព្រឹត្តិការណ៍បាល់ទាត់ពានរង្វាន់មិត្តភាពយុវជនអន្ដរក្រសួង-ស្ថាប័ន លើកទី៩ បានរៀបចំសន្និសីទសារព័ត៌មាន ចាប់ពូល និងចុះអនុស្សារណៈ(MOU) ជាមួយក្រុមហ៊ុនដៃគូឧបត្ថម្ភ។
កម្មវិធីនេះធ្វើឡើងនៅមជ្ឍមណ្ឌលម៉ានី (The Kampus) ក្រោមវត្ដមានលោក ឌី វិជ្ជា អនុប្រធានសហភាពសហព័ន្ធយុវជនកម្ពុជា (ស.ស.យ.ក.) ឯកឧត្តម សុខ សប្បាយណា ប្រធានគណៈកម្មាធិការ ឯកឧត្តម សូវ៉ូត សីលា ប្រធានគណៈកម្មការប្រតិបត្តិរៀបចំការប្រកួត គណៈកម្មាធិការកីឡាបាល់ទាត់ “មិត្តភាពយុវជនអន្តរ ក្រសួង~ស្ថាប័ន” តំណាងពីសហព័ន្ធ កីឡាបាល់ទាត់កម្ពុជា(FFC) និងមានកីឡាករមកពីគ្រប់ក្រសួង-ស្ថាប័ន រួមនជាមួយក្រុមហ៊ុនចូលរួមស្ម័គ្រចិត្តចូលឧបត្ថម្ភ។
ព្រឹត្តិការណ៍បាល់ទាត់ពានរង្វាន់មិត្តភាពយុវជនអន្ដរក្រសួង-ស្ថាប័ន លើកទី៩ ឆ្នាំ២០២៤ មានក្រុមចូលរួមកើនឡើងរហូតដល់ ៣៤ក្រសួង-ស្ថាប័ន ស្មើនឹង ៧២ប្រកួត។ សម្រាប់ពីធីបើកការប្រកួតគ្រោង នឹងធ្វើឡើងនៅថ្ងៃទី១៤ ខែមករា ឆ្នាំ២០២៤ និងបិទបញ្ចប់នៅថ្ងៃទី៣១ ខែមីនា ឆ្នាំ២០២៤។
ថ្លែងក្នុងពិធីសន្និសីទសារព័ត៌មាន ឯកឧត្តម ឌី វិជ្ជា អនុប្រធានសហភាពសហព័ន្ធយុវជនកម្ពុជា (ស.ស.យ.ក.) បានមានប្រសាសន៍ថា៖ «កន្លងមកគ្រួសារ ស.ស.យ.ក បានរៀបចំព្រឹត្តិការណ៍ និងសកម្មភាពសំខាន់ៗដែលយើងបានធ្វើ ក្នុងនោះមានដូចជា ការបរិច្ចាគឈាម និងព្យាបាលជម្ងឺជូនប្រជាពលរដ្ឋនៅតាមមូលដ្ឋានការចូលរួមក្នុងយុទ្ធនាការប្រឆាំងកូវិដ១៩ ពិសេសនោះគឺថ្មីៗនេះ យើងបានរៀបចំ ព្រឹត្តិការណ៍អង្គរសង្ក្រាន្ត ការចូលរួមយ៉ាងសកម្មជា DNA មួយការរៀបចំស៊ីហ្គេមលើកទី៣២ និង អាស៊ានប៉ារ៉ាហ្គេមលើកទី១២ និងកម្មវិធីខួប៤៥ឆ្នាំរបស់ ស.ស.យ.ក អ្វីដែលពិសេសទៀតនោះគឺ យើងបានបង្កើតកម្មវិធី Beyond The Games ជាចលនាគាំទ្រវិស័យកីឡា និងលើសពីកីឡាដ៏ វិសេសវិសាលបំផុត និងជាការរួបរួមគ្នាលើកតម្កើងកិត្យានុភាពជាតិយើង ហើយក្នុងពេលនេះ និង ប៉ុន្មានថ្ងៃខាងមុខទៀតនេះស្ថាប័នលើកទី៩ នេះតែម្តង»។
ក្នុងនោះផងដែរ ឯកឧត្តម សុខ សប្បាយណា ប្រធានគណៈកម្មាធិការ បានគូសបញ្ជាក់ថា៖ «សម្រាប់អ្វីដែលថ្មីដែលគ្រោងរៀបចំក្នុងឆ្នាំ២០២៤ មានដូចជាក្រុមចាស់ដែលអាក់ខានក្នុងឆ្នាំ២០២២ (លើកទី៨ នឹងចូលរួមវិញក្នុងឆ្នាំ២០២៤(លើកទី៩) សរុប មាន៣៤ក្រសួង-ស្ថាប័ន ក្នុងឆ្នាំ២០២៤នេះ មានទីតាំងប្រកួតថ្មីកម្រិតស្ដង់ដា គឺកីឡដ្ឋានខេមរភូមិន្ទ(ស្តាតចាស់) និងវិទ្យាល័យបឹងត្របែក មានការរចនា និងការរៀបចំថ្មីលើការងារ – Artwork ពិសេសរំលេចនូវការបន្តចូលរួមសកម្មភាពគាំទ យុទ្ធនាការ Beyond The Games (បេះដូងលោតក្នុងចង្វាក់តែមួយ) លើសពីការប្រកួត»។
ឯកឧត្តម បានបន្ថែនទៀតថា លើសពីនេះក៏មានរៀបចំដោយបញ្ជូលនូវគុនល្បុក្កតោ និងការសម្ដែងថ្មីៗ ក្នុងពិធីបើក និងបិទ និងមានការ Live ផ្ទាល់គ្រប់ការប្រកួតទាំងអស់លើ Page កម្ពុជាថ្មី ចំនួនអ្នកចូលរួមមានចំនួនច្រើនជាងមុន និងទីតាំងអំណោយផលលើការរៀបចំ និងការចូលរួម ទស្សនា មានការកើនឡើងនូវយុវជនស្ម័គ្រចិត្តបន្តចូលរួមក្នុងក្រុមការងារផ្សេងៗ។
គួរបញ្ជាក់ថា ព្រឹត្តិការណ៍នេះ មានក្រុមចូលរួមរហូតដល់ ៣៤ក្រុម ស្មើនឹង ៧២ប្រកួត ។ សម្រាប់លក្ខខណ្ឌចូលរួម រាល់កីឡាករទាំងអស់ ត្រូវតែជាមន្ដ្រីរាជការ ហើយក្រុមនីមួយៗ ត្រូវប្រកាន់ភ្ជាប់នូវស្មារតីកីឡា ទោះបីឈ្នះ ឬចាញ់ គឺជារឿងធម្មតា សំខាន់គឺការរឹតចំណងមិត្តភាព សាមគ្គីភាព និងបង្កើនទំនាក់ទំនងល្អ រវាងគ្នា និងគ្នា រាប់ចាប់ពីមន្ដ្រីរាជការក្នុងការិយាល័យ ឬនាយកដ្ឋាន រហូតដល់ក្រសួង-ស្ថាប័ននីមួយៗ តាមរយៈការប្រមូលផ្ដុំហ្វឹកហាត់ និងការប្រកួតជាដើម ។
ដោយឡែកសម្រាប់ក្រុមទាំង ៣៤ក្រសួង-ស្ថាប័ន បែងចែកជា ៨ពូល ដើម្បីធ្វើការប្រកួតជម្រុះ នៅទី លានវិទ្យាល័យបឹងត្របែក ក្នុងនោះពូលA ដល់ពូលF គឺមាន ៤ក្រុមក្នុងមួយពូល ខណៈពូល G និងពូល H មាន ៥ក្រុម។ បន្ទាប់មកក្រុមឈរលេខ១ និងលេខ២ នៃពូលនីមួយៗ នឹងឡើងទៅវគ្គ ១៦ក្រុមចុងក្រោយ ដែលត្រូវធ្វើការប្រកួតនៅកីឡដ្ឋានស្ដាតចាស់។
ខាងក្រោមនេះជាប្រវត្តិក្រុមចូលរួមប្រកួតកន្លងមក៖
លើកទី១៖ ២០១៣ ក្រុមចូលរួមមានចំនួន ៩
លើកទី២៖ ២០១៤ ក្រុមចូលរួមមានចំនួន ២២
លើកទី៣៖ ២០១៥ ក្រុមចូលរួមមានចំនួន ២៥
លើកទី៤៖ ២០១៦ ក្រុមចូលរួមមានចំនួន ២៩
លើកទី៥៖ ២០១៧ ក្រុមចូលរួមមានចំនួន ៣០
លើកទី៦៖ ២០១៨ ក្រុមចូលរួមមានចំនួន ៣១
លើកទី៧៖ ២០១៩ ក្រុមចូលរួមមានចំនួន ៣១
លើកទី៨៖ ២០២២ ក្រុមចូលរួមមានចំនួន ៣១
លើកទី៩៖ ២០២៤ ក្រុមចូលរួមមានចំនួន ៣៤
គួរបញ្ជាក់ថា ការប្រកួតកីឡាបាល់ទាត់ពានរង្វាន់ មិត្តភាពយុវជនអន្តរក្រសួង-ស្ថាប័ន លើកទី៨ ឆ្នាំ២០២២ ក្រុមក្រសួងសាធារណៈការ និងដឹកជញ្ជូន បានក្លាយជាម្ចាស់ជើងឯក បន្ទាប់ពីយកឈ្នះក្រុមក្រសួងសុខាភិបាល ៤-៣ នៅវគ្គផ្តាច់ព្រ័ត្រ និងគ្រាដែលក្រសួងសង្គមកិច្ច អតីតយុទ្ធជន និងយុវនិតិសម្បទា ទទួលបានចំណាត់ថ្នាក់លេខ៣ ខណ:ក្រុម Fair Play គឺយុវជនក្រសួងបរិស្ថាន៕