សិល្បៈជាតិ៖ ច្បាស់លាស់ហើយសម្រាប់ពេលាមង្គលដឹកដៃគ្នាចូលរោងការរបស់តារាចម្រៀងនិងតារាសម្ដែងផ្នែកនារីពីររូបរបស់កម្ពុជា នោះគឺកញ្ញា សុវត្ថិឌី ធារីកា និងអ្នកនាង លីម៉ារីណា ដោយអាពាហ៍ពិពាហ៍របស់តារាស្រីទាំងពីរដួង ជាមួយនឹងបុរសដែលនៅក្រៅរង្វង់សិល្បៈនេះនឹងប្រព្រឹត្តិឡើងនៅក្នុងខែមករា ឆ្នាំ២០២៤នេះ។ តើបុរសទាំងពីររូបដែលអាចក្ដោបបានបេះដូងស្រីស្រស់ក្នុងចង្កោមអ្នកសិល្បៈទាំងពីរដួងនេះ មានសាវតារបែបណា?
តាមដឹងដំណឹងអាពាហ៍ពិពាហ៍ តារាចម្រៀងវ័យក្មេង កញ្ញា សុវត្ថិឌី ធារីកា បានធ្វើឱ្យមហាជនអ្នកលេងបណ្ដាញសង្គមមានការភ្ញាក់ផ្អើលជាខ្លាំង ព្រោះអនាគតកូនកំលោះរបស់អ្នកនាង មិនមែនជាតារាចម្រៀង ម៉ៅ ហាជី បុគ្គលដូចការសង្ស័យនោះឡើយ។ ក្រោយឈ្មោះកូនកំលោះត្រូវបានបែកធ្លាយធ្វើឱ្យមហាជនមានការចង់ដឹងជាខ្លាំងតើបុរសរូបនេះគឺជាអ្នកណា ហើយមានប្រវត្តិបែបណា? សូមជំរាបថា បុរសសង្ហាដែលអាចក្ដោបបេះដូង សុវត្ថិឌី ធារិកា ក៏មានប្រវត្តិនិងសាវតារ មិនធម្មតាដែរ ព្រោះលោកគឺជាកូនប្រុសរបស់មន្ត្រីយោធាផ្កាយ៣មួយរូប។ លោកមានឈ្មោះពិតថា ពូ សូផានិត គឺជានាយទាហានស្ថិតក្នុងបញ្ជាការដ្ឋានយោធភូមិភាគពិសេស ត្រូវជាកូនប្រុសរបស់ឯកឧត្តម ឧត្តមសេនីយ៍ឯក ពូ សាប៊ុតឌី មេបញ្ជាការរងកងទ័ពជើងគោក មេបញ្ជាការយោធភូមិភាគពិសស និងលោកជំទាវ សែម បុប្ផា។ ថ្វីត្បិតប្រវត្តិអនាគតស្វាមីរបស់កញ្ញា សុវត្ថិឌី ធារីកា មិនបានបើកចំហរជាសាធារណៈ តែបើតាមការជ្រាវពីអ្នកតាមដានខ្សែជីវិតតារា គេបានរកឃើញថាលោក ពូ សូផានិត ធ្លាប់បានបង្ហោះពីសកម្មភាពខ្លះនៅលើបណ្ដាញសង្គម IG ដោយមានរូបភាពស្លៀកពាក់ជាយោធា ថតជាមួយនឹងលោកឪពុករបស់លោកគឺ ឯកឧត្តម ពូ សាប៊ុតឌី ដែលធ្វើឱ្យគេអាចសន្មតបានយ៉ាងច្បាស់ថាលោកគឺជានាយទាហានមួយរូប។ កាលបរិច្ឆេទមង្គលការរបស់អ្នកទាំងពីរនេះ នឹងប្រារព្ធឡើងនៅថ្ងៃទី២៦ ខែមករា នាមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ OCIC ច្រកចូលអគារ E។
ងាកមកដំណឹងអាពាហ៍ពិពាហ៍របស់ អ្នកមេម៉ាយសាច់សខ្ចី លី ម៉ារីណា ឯណោះវិញ អ្នកនាងនឹងរៀបមង្គលការលើកទី៣របស់ខ្លួន នៅថ្ងៃទី១២ ខែមករា ឆ្នាំ២០២៤ នៅមជ្ឈមណ្ឌល OCIC ជ្រោយចង្វារ។ អ្នកមេម៉ាយកូន១ វ័យ ៤២ឆ្នាំ និងអនាគតស្វាមី បានបោះធៀបការដើម្បីអញ្ជើញភ្ញៀវកិត្តិយសទាំងអ្នកក្នុងរង្វង់សិល្បៈ និងក្រៅរង្វង់សិល្បៈ មកចូលរួមសាទរនិងធ្វើជាសាក្សីចំពោះចំណងស្នេហារវាងអ្នកនាងនឹងស្វាមី ដែលជាមន្ត្រីនគរបាលស័ក្ដិ៥។ អនាគតស្វាមីទីបីរបស់អ្នកនាង លី ម៉ារីណា គឺលោកវរសេនីយ៍ឯក ទៀង ច័ន្ទសារ លោក គឺជាមន្ត្រីនគរបាល មានឋានន្តស័ក្តិជាអធិការនគរបាលខណ្ឌដូនពេញ។ មែនទែនទៅ លី ម៉ារីណា ធ្លាប់បានឆ្លងកាត់អាពាហ៍ពិពាហ៍បរាជ័យចំនួន២លើករួចមកហើយ ដោយអាពាហ៍ពិពាហ៍ជាមួយនឹងស្វាមីទីមួយ បានបញ្ចប់ទៅយ៉ាងលឿនប្រៀបដូចជាផ្លេកបន្ទោរ ដោយរួមរស់ជាមួយនឹងគ្នាមិនទាន់គ្រប់១ខែស្រួលបួលផង ខណៈដែលអាពាហ៍ពិពាហ៍ទីពីរជាមួយនឹងបុសអនិកជនខ្មែរ-អាមេរិក មានអាយុកាលជិត១០ឆ្នាំ និងមានដំណក់ឈាមរួមគ្នាគឺកូនប្រុសម្នាក់ បានចែកផ្លូវគ្នាដើរ កាលពីខែកុម្ភៈ ឆ្នាំ២០២២កន្លងមក។
ទស្សនាវីដេអូព័ត៌មានទាំងស្រុងខាងក្រោម