ប្រមុខបក្សកុម្មុយនិស្តវៀតណាម លោក Nguyen Phu Trong ត្រូវបានគេរំពឹងថា នឹងខកខានដំណើរទស្សនកិច្ចផ្លូវរដ្ឋលើកទី២ របស់មេដឹកនាំបរទេសទៅកាន់ទីក្រុងហាណូយ នៅថ្ងៃសុក្រ សប្ដាហ៍នេះ ចំពេលមានការព្រួយបារម្ភអំពីបញ្ហាសុខភាពរបស់លោក។ នេះបើយោងតាមការចេញផ្សាយដោយសារព័ត៌មាន CNA នាថ្ងៃសុក្រ ទី១២ ខែមករា ឆ្នាំ២០២៤។
លោក Trong ដែលមានអាយុ ៧៩ឆ្នាំ បានកាន់តំណែងជាប្រធានគណបក្សកុម្មុយនិស្តវៀតណាម តាំងពីឆ្នាំ២០១១ លោក គឺជាមេដឹកនាំដ៏មានឥទ្ធិពលបំផុត នៅក្នុងប្រព័ន្ធនយោបាយបក្សតែមួយរបស់វៀតណាម ហើយលោក តែងតែជាអ្នកទទួលភ្ញៀវឥស្សរជនបរទេស ក្នុងការជួបប្រជុំជាលក្ខណៈឯកជន។
យោងតាមរបៀបវារៈព្រាងពីក្រសួងការបរទេសវៀតណាម និងការិយាល័យប្រធានាធិបតីឥណ្ឌូនេស៊ី បានឱ្យដឹងថា អំឡុងពេលបំពេញទស្សនកិច្ចផ្លូវរដ្ឋ នៅថ្ងៃសុក្រ សប្ដាហ៍នេះ លោក Trong មិនមានគម្រោងជួបជាមួយប្រធានាធិបតីឥណ្ឌូនេស៊ី លោក Joko Widodo នោះទេ។
យ៉ាងណាម៉ិញ ក្រសួងការបរទេសវៀតណាម មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយអំពីបញ្ហាសុខភាពរបស់លោក Trong នោះទេ។
សូមជម្រាបថា ចាប់តាំងពីថ្ងៃទី ២៦ ខែធ្នូ ឆ្នាំ២០២៣ មកដល់ពេលនេះ ប្រមុខបក្សកុម្មុយនិស្តវៀតណាមរូបនេះ មិនត្រូវបានគេឃើញជាសាធារណៈទៀតនោះទេ ខណៈការជួបជាមួយប្រធានគណបក្សកុម្មុយនិស្តជប៉ុន លោក Kazuo Shii នៅទីក្រុងហាណូយ ជាជំនួបចុងក្រោយ៕