ការរំលោភសិទ្ធិអ្នកនិពន្ធ ជាបញ្ហាប្រឈមដ៏គួរឲ្យព្រួយបារម្ភ និងទាមទារឲ្យមានការចូលរួមស្វែងរកដំណោះស្រាយពីគ្រប់ភាគីពាក់ព័ន្ធ បើពុំដូច្នោះទេ បញ្ហានេះនឹងក្លាយទៅជាជំងឺមហារីកសម្លាប់ទឹកចិត្តអ្នកនិពន្ធ និងលែងមានអ្នកចង់បន្តវេនជំនាន់ក្រោយទៀត។ ក្រុមអ្នកនិពន្ធលើកឡើងបែបនេះ ដោយសារកន្លងមក ស្នាដៃរបស់ពួកគាត់ត្រូវបានគេយកទៅបោះពុម្ពចេញ និងចែកចាយបន្តតាមប្រព័ន្ធទំនាក់ទំនងសង្គម ដោយពុំមានការអនុញ្ញាតពីម្ចាស់ស្នាដៃ ដែលធ្វើឲ្យប៉ះពាល់យ៉ាងធ្ងន់ធ្ងរដល់ប្រាក់ចំណូលរបស់អ្នកនិពន្ធ។
កញ្ញា សូផាន វល័ក្ខ ជាអ្នកនិពន្ធ និងជាស្ថាបនិកគ្រឹះស្ថានបោះពុម្ពអាណាចក្រសៀវភៅ បានបង្ហាញអំពីការរំលោភលើសិទ្ធិអ្នកនិពន្ធ ដែលវាស្ដែងឡើងតាមរយៈរូបភាពមួយចំនួនដូចជា៖
– ចម្លងស្នាដៃដោយបោះពុម្ពចេញជាសៀវភៅ ដើម្បីលក់យកកម្រៃ និងលក់យកកម្រៃ ឬចែកចាយបន្តលើស្នាដៃ (ជា PDF) ដោយមិនមានការអនុញ្ញាតពីម្ចាស់ស្នាដៃ
– ការចម្លងស្នាដៃតាមរយៈថតជាសំឡេង ដើម្បីផ្សព្វផ្សាយលើបណ្ដាញទំនាក់ទំនងសង្គម ដោយមិនមានការអនុញ្ញាតពីម្ចាស់ស្នាដៃ ឬគ្រឹះស្ថានបោះពុម្ព
– ការចម្លងគំនិត ស្នាដៃ (អរូបី) ដែលលំបាកនឹងមើលឃើញ។
ទោះបីមានអំណះអំណាងថា ជាការចែករំលែកចំណេះដឹង និងលើកកម្ពស់ការអានក្ដី តែទង្វើទាំងអស់នេះ គឺជាការរំលោភបំពានលើសិទ្ធិអ្នកនិពន្ធ ដែលបង្កផលប៉ះពាល់ដ៏គួរឲ្យព្រួយបារម្ភ ដល់អាជីពអ្នកនិពន្ធដូចជា
– ប៉ះពាល់ដល់មុខរបរអ្នកនិពន្ធ ដោយសារការចែកចាយបន្តតាមរយៈការបោះពុម្ពជាសៀវភៅក្ដី ចែករំលែកតាមអ៊ីនធឺណិតក្ដី លក់យកកម្រៃក្ដី មិនយកកម្រៃក្ដី វាបានធ្វើឲ្យអ្នកនិពន្ធបាត់បង់ប្រាក់ចំណូល ដែលបានមកពីការធ្វើអាជីវកម្មលើស្នាដៃរបស់ខ្លួន។
– ប៉ះពាល់ដល់ទឹកចិត្តអ្នកនិពន្ធ ដោយសារកាលណា ស្នាដៃរបស់ខ្លួនត្រូវបានគេយកទៅលក់យកកម្រៃ ចែកចាយបន្ត និងចម្លងយកទៅធ្វើជារបស់ខ្លួន វាកំពុងសម្លាប់ទឹកចិត្តអ្នកនិពន្ធ ធ្វើឲ្យពួកគាត់លែងចង់ប្រកបអាជីពនិពន្ធ និងជះឥទ្ធិពលមិនល្អដល់អ្នកនិពន្ធជំនាន់ក្រោយៗផងដែរ។
– ធ្វើឲ្យបាត់គំនិតច្នៃប្រតិស្ឋ ព្រោះតែការលួចចម្លង ចែករំលែក និងកេងប្រវ័ញ្ចកម្រៃលើស្នាដៃរបស់ខ្លួនហួសហេតុពេក ធ្វើឲ្យអ្នកនិពន្ធបាក់ទឹកចិត្ត លែងមានគំនិតច្នៃប្រតិស្ឋ និងចង់បង្កើតសមិទ្ធផលថ្មី។
លោក ម៉ៃ វឌ្ឍនា សមាជិកក្រុមប្រឹក្សាភិបាល នៃសមាគមអ្នកនិពន្ធខ្មែរ លើកឡើងថា ដើម្បីរួមចំណែកដោះស្រាយបញ្ហាដូចដែលបានលើកឡើងខាងលើ អ្នកនិពន្ធគួរតែចងក្រងគ្នាជាក្រុម ឬសមាគម និងបណ្ដាញនានា ដែលអាចឲ្យពួកគាត់ជួយតាមដាន ឃ្លាំមើលស្នាដៃរបស់ពួកគាត់បានទូលំទូលាយ ចាត់វិធានការ ទាមទារ និងដោះស្រាយនៅពេលមានបញ្ហារំលោភសិទ្ធិអ្នកនិពន្ធ និងងាយស្រួលស្វែងរកផ្លូវច្បាប់ដើម្បីដោះស្រាយដោយប្រសិទ្ធភាព។ ទន្ទឹមនេះ អាជ្ញាធរពាក់ព័ន្ធមានក្រសួងវប្បធម៌ និងវិចិត្រសិល្បៈជាអាទិ ត្រូវពង្រឹងការអនុវត្តិច្បាប់ និងផ្សព្វផ្សាយឲ្យបានទូលំទូលាយអំពីច្បាប់ពាក់ព័ន្ធសិទ្ធអ្នកនិពន្ធ និងសិទ្ធប្រហាក់ប្រហែល ឲ្យសាធារណជនបានយល់ដឹង និងចូលរួមអនុវត្តទាំងអស់គ្នា។
លោក ម៉ៃ វឌ្ឍនា លើកទឹកចិត្តឲ្យអ្នកនិពន្ធចងក្រងគ្នាជាក្រុម ឬសមាគម ដោយពន្យល់ពីផលប្រយោជន៍ថា ទី១ ទទួលបានការបណ្ដុះបណ្ដាលបន្ថែម ពាក់ព័ន្ធនឹងការតែងនិពន្ធ, ទី២ ចូលរួមលើកកម្ពស់ស្នាដៃរបស់ពួកគាត់តាមរយៈការបោះពុម្ព, ទី៣ រាល់ការតែងនិពន្ធរបស់ពួកគាត់ត្រូវបានទទួលការតម្រែតម្រង់ ឬយោបល់បន្ថែមពីក្រុមប្រឹក្សា ដើម្បីធ្វើឲ្យស្នាដៃនោះកាន់តែល្អប្រសើរបន្ថែមទៀត និងទី៤ ការគាំទ្រផ្នែកច្បាប់នៅពេលមានបញ្ហារំលោភបំពានលើសិទ្ធិអ្នកនិពន្ធ។ បន្ថែមលើនេះ ក្រុម ឬសមាគមអ្នកនិពន្ធគួរតែមាននូវក្រមសីលធម៌ ដើម្បីលើកកម្ពស់តម្លៃរបស់ខ្លួនជាអ្នកនិពន្ធឲ្យមានសេចក្ដីថ្លៃថ្នូរ។
ពាក់ព័ន្ធនឹងការរំលោភបំពានសិទ្ធអ្នកនិពន្ធ និងសិទ្ធប្រហាក់ប្រហែល លោក ស៊ឹម សត្តា ប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល ពន្យល់ថា កម្ពុជាបានអនុម័ត និងប្រកាសឲ្យប្រើច្បាប់ ស្ដីពី សិទ្ធិអ្នកនិពន្ធ និងសិទ្ធិប្រហាក់ប្រហែល តាំងពីឆ្នាំ ២០០៦ ។ បច្ចុប្បន្ន នាយកដ្ឋានកំពុងរៀបចំសេចក្ដីព្រាងវិសោធនកម្មច្បាប់នេះ ដើម្បីធានានូវសុក្រឹតភាព និងប្រសិទ្ធភាព ស្របតាមវឌ្ឍនភាពនៃសម័យកាល។ បន្ទាប់សេចក្ដីព្រាងវិសោធនកម្មច្បាប់នេះចេញជាធរមាន ក្រសួងវប្បធម៌ និងវិចិត្រសិល្បៈ ព្រមទាំងអាជ្ញាធរពាក់ព័ន្ធ និងបន្តផ្សព្វផ្សាយបានឲ្យកាន់តែទូលំទូលាយ និងរឹតបន្តឹងបន្តិចម្ដងៗ ស្របតាមការយល់ដឹងរបស់ប្រជាពលរដ្ឋ ឆ្ពោះទៅធានានូវសិទ្ធិអ្នកនិពន្ធ និងសិទ្ធិប្រហាក់ប្រហែល មានការរំលោភបំពានតិចតួចបំផុតនៅក្នុងសង្គម។
លោក ស៊ឹម សត្តា ទទួលស្គាល់ថា កន្លងមកការរំលោភបំពានលើសិទ្ធិអ្នកនិពន្ធ តែងកើតមានឡើង តាមរយៈរូបភាពផ្សេងៗ ហើយយន្តការដោះស្រាយនៅតុលាការក៏ពុំទាន់ឃើញមាននៅឡើយ រាល់វិវាទពាក់ព័ន្ធករណីរំលោភបំពានសិទ្ធិអ្នកនិពន្ធ ធ្វើការដោះស្រាយនៅក្របខ័ណ្ឌក្រសួងវប្បធម៌ និងវិចិត្រសិល្បៈ ត្រឹមជាការពិន័យ ធ្វើកិច្ចសន្យា និងព្រមានមិនឲ្យធ្វើទង្វើល្មើសតទៀត។
សូមជម្រាបថា ការលើកឡើងរបស់អ្នកនិពន្ធ សមាជិកក្រុមប្រឹក្សាភិបាលនៃសមាគមអ្នកនិព្ធ និងប្រធាននាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល ទាំងបីរូបខាងលើ ធ្វើឡើងក្នុងសិក្ខាសាលាស្ដីពី កត្តាប្រឈម និងដំណោះស្រាយ នៃការរំលោភសិទ្ធិអ្នកនិពន្ធ និងសិទ្ធិប្រហាក់ប្រហែលនៅកម្ពុជា កាលពីថ្ងៃទី២៧ ខែមេសា ឆ្នាំ២០២៤ នៅស្នាក់ការ ស៊ីណេហាប់ (CINE HUB) រៀបចំដោយ កកូរសៀវភៅ និង ស៊ីណេហាប់។
អត្ថបទ៖ ឈិន ធារ៉ាត់
