ទីក្រុងដេលី និងផ្នែកខ្លះនៃភាគខាងជើងប្រទេសឥណ្ឌា បានរងការរំខានដោយអ័ព្ទយ៉ាងក្រាស់ ជាមួយនឹងការថយចុះភាពមើលឃើញ ដែលបង្កបញ្ហាប្រឈមសម្រាប់ជើងហោះហើរ និងផ្លូវរថភ្លើងក្នុងរដ្ឋធានីរបស់ប្រទេសនេះ។ នេះបើយោងតាមការចេញផ្សាយដោយសារព័ត៌មាន NDTV នាថ្ងៃចន្ទ ទី១៥ ខែមករា ឆ្នាំ២០២៤។
សីតុណ្ហភាពក្នុងប្រទេសបានធ្លាក់ចុះដល់ ៣.៣អង្សារសេ នៅព្រឹកថ្ងៃចន្ទនេះ ដែលជាសីតុណ្ហភាពត្រជាក់បំផុតក្នុងរដូវកាលនេះ ខណៈសាលារៀននានា ក៏ត្រូវបានបើកបវេសនាការ នៅក្នុងទីក្រុងនាថ្ងៃនេះផងដែរ បន្ទាប់ពីសម្រាក ២សប្ដាហ៍។
រថភ្លើងចំនួន ១៨គ្រឿងទៅកាន់ទីក្រុងដេលី ពីផ្នែកផ្សេងៗនៃប្រទេស ត្រូវបានពន្យារពេលនៅថ្ងៃនេះ ដោយសារអ័ព្ទក្រាស់ៗ ហើយអាកាសយានដ្ឋាន Delhi ក៏បានចេញការប្រកាសអាសន្នពីអ័ព្ទក្រាស់ៗ ខណៈអ្នកដំណើររាប់ពាន់នាក់ ត្រូវរង់ចាំពេលវេលាសម្រាប់ជើងហោះហើរថ្មីរបស់ពួកគេ។
យោងតាមគេហទំព័រអាកាសចរណ៍ ហ្វ្លាយរ៉ាដា២៤ (Flightradar24) បានឲ្យដឹងថា យ៉ាងហោចណាស់ជើងហោះហើរ ១៦៨ជើង ដែលចាកចេញពីទីក្រុងដេលី ត្រូវបានពន្យារពេល ហើយជើងហោះហើរចំនួន ៨៤ជើង ត្រូវបានលុបចោលនៅព្រឹកថ្ងៃចន្ទ នេះ។
ទាក់ទិននឹងបញ្ហានេះ ការិយាល័យអាកាសធាតុរបស់ប្រទេសបានព្យាករណ៍ថា នឹងមានអ័ព្ទក្រាស់ និងរលកត្រជាក់នៅទីក្រុងញូវដែលី សម្រាប់ថ្ងៃចន្ទ និង «អ័ព្ទក្រាស់ខ្លាំង» នៅថ្ងៃអង្គារ ជាមួយនឹងសីតុណ្ហភាពអប្បបរមា ៤អង្សារសេ៕
