ឯកឧត្តម បណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានបង្ហាញវត្តមានជាកីឡាករក្នុងជម្រើស ១១នាក់ដំបូង ក្នុងជំនួបប៉ះក្រសួងមហាផ្ទៃ កាលពីថ្ងៃទី១៦ ខែមករា ឆ្នាំ២០២៣ នៃព្រឹត្តិការណ៍ប្រកួតបាល់ទាត់ពានរង្វាន់មិត្តភាពយុវជនអន្ដរក្រសួង-ស្ថាប័ន លើកទី៩ ឆ្នាំ២០២៤ ។
បញ្ចប់ការប្រកួត ក្រសួងអប់រំ យុវជន និងកីឡា ទទួលបាន៣ពិន្ទុ បន្ទាប់ពីយកឈ្នះលើក្រុមក្រសួងមហាផ្ទៃ ក្នុងការប្រកួតកីឡាបាល់ទាត់ពានរង្វាន់”មិត្តភាពយុវជនអន្តរក្រសួង-ស្ថាប័ន” នៅវិទ្យាល័យបឹងត្របែក នាថ្ងៃទី១៦ ខែមករា ឆ្នាំ២០២៤។
សម្រាប់ប្រកួតបន្ទាប់របស់ក្រសួងអប់រំ យុវជន និងកីឡានឹងជួបក្រុមក្រសួងវប្បធម៌ និងវិចិត្រសិល្បៈ នាថ្ងៃទី២៩ ខែមករា ដែលជាប្រកួតទី២ របស់ខ្លួន។ ប្រកួតទី៣ ក្រសួងអប់រំ យុវជន និងកីឡា នឹងត្រូវប៉ះក្រុមក្រសួងធម្មការ និងសាសនា នាថ្ងៃទី១៩ កុម្ភៈ មុនបន្តទៅប្រកួតទី៤ របស់ខ្លួន ដោយត្រូវតទល់ជាមួយ ក្រុមក្រសួងការងារបណ្តុះបណ្តាលវិជ្ជាជីវៈ នាថ្ងៃទី៦ ខែមីនា ឆ្នាំ២០២៤។
សូមបញ្ជាក់ផងដែរថា ការប្រកួតកីឡាបាល់ទាត់ពានរង្វាន់”មិត្តភាពយុវជនអន្តរក្រសួង-ស្ថាប័ន” ចាប់ផ្តើមពីថ្ងៃទី១៤ ខែមករា ដល់ថ្ងៃទី៣១ ខែមីនា ឆ្នាំ២០២៤ មានក្រុមចូលរួមរហូតដល់ ៣៤ក្រុម ស្មើនឹង ៧២ប្រកួត។ សម្រាប់លក្ខខណ្ឌចូលរួម រាល់កីឡាករទាំងអស់ ត្រូវតែជាមន្ដ្រីរាជការ ហើយក្រុមនីមួយៗ ត្រូវប្រកាន់ភ្ជាប់នូវស្មារតីកីឡា ទោះបីឈ្នះ ឬចាញ់ គឺជារឿងធម្មតា សំខាន់គឺការរឹតចំណងមិត្តភាព សាមគ្គីភាព និងបង្កើនទំនាក់ទំនងល្អ រវាងគ្នា និងគ្នា រាប់ចាប់ពីមន្ដ្រីរាជការក្នុងការិយាល័យ ឬនាយកដ្ឋាន រហូតដល់ក្រសួង-ស្ថាប័ននីមួយៗ តាមរយៈការប្រមូលផ្ដុំហ្វឹកហាត់ និងការប្រកួតជាដើម ។
ដោយឡែកសម្រាប់ក្រុមទាំង ៣៤ក្រសួង-ស្ថាប័ន បែងចែកជា ៨ពូល ដើម្បីធ្វើការប្រកួតជម្រុះ នៅទី លានវិទ្យាល័យបឹងត្របែក ក្នុងនោះពូលA ដល់ពូលF គឺមាន ៤ក្រុមក្នុងមួយពូល ខណៈពូល G និងពូល H មាន ៥ក្រុម។ បន្ទាប់មកក្រុមឈរលេខ១ និងលេខ២ នៃពូលនីមួយៗ នឹងឡើងទៅវគ្គ ១៦ក្រុមចុងក្រោយ ដែលត្រូវធ្វើការប្រកួតនៅកីឡដ្ឋានស្ដាតចាស់៕