សហព័ន្ធកីឡាបាល់ទះកម្ពុជា បានចុះអនុស្សារណៈយោគយល់គ្នា (MOU) ជាមួយសហព័ន្ធកីឡាបារាំង ហើយកម្ពុជា ក៏ជាប្រទេសទី១ នៅក្នុងតំបន់អាស៊ី អាគ្នេយ៍ ដែលចាប់ដៃសហការជាមួយប្រទេសបារាំង ក្នុងគោលបំណង រឹតចំណងការបរទេស និងពង្រឹងកិច្ចសហប្រតិបត្តិការអន្តរជាតិ លើវិស័យកីឡាបាល់ទះ។ ចុះអនុស្សារណៈយោគយល់គ្នា ធ្វើឡើងក្រោមអធិបតីភាពឯកឧត្តម អភិសន្តិបណ្ឌិត ស សុខា ប្រធានសហព័ន្ធកីឡាបាល់ទះកម្ពុជា និងលោក Eric TANGUY ប្រធានសហព័ន្ធកីឡាបាល់ទះបារាំង កាលពីថ្ងៃទី១៧ ខែមករា ឆ្នាំ២០២៤។
ឯកឧត្តម អភិសន្តិបណ្ឌិត ស សុខា ប្រធានសហព័ន្ធកីឡាបាល់ទះកម្ពុជា បានបង្ហាញអារម្មណ៍សប្បាយរីករាយ ដែលបានជួបជាមួយលោក Éric TANGUY ប្រធានសហព័ន្ធកីឡាបាល់ទះបារាំង ដែលលោកបានស្កាត់ពីឆ្ងាយធ្វើដំណើរដល់ប្រទេសកម្ពុជាយើងផ្ទាល់តែម្តង ក្នុងបរិយាកាសដ៏សែនរីករាយ និងស្និទ្ធស្នាល ប្រកប ដោយស្មារតីសាមគ្គីភាព និងភាតរភាពក្នុងថ្ងៃនេះ។
ឯកឧត្តម អភិសន្តិបណ្ឌិត ស សុខា បានមានប្រសាសន៍ថា៖ ក្នុងនាមគ្រួសារកីឡាបាល់ទះកម្ពុជា ខ្ញុំសូមថ្លែងអំណរគុណដល់ភាគីបារាំង ដែលមានលោក Éric TANGUY ជាប្រមុខបានបញ្ជូនក្រុមបាល់ទះមកប្រកួតមិត្ត ភាពអន្តរជាតិនៅកម្ពុជា កាលពីដើមឆ្នាំ២០២៣ កន្លងទៅ ដែលជាផ្នែកមួយ នៃការផ្សព្វ ផ្សាយ និងពង្រឹងក្រុមកីឡាកររបស់កម្ពុជា ក្នុងព្រឹត្តិការណ៍កីឡាស៊ីហ្គេម រហូតដល់បញ្ចប់ការទទួលធ្វើម្ចាស់ផ្ទះព្រឹត្តិការណ៍ដ៏ធំក្នុងតំបន់អាស៊ាននេះ ដោយជោគជ័យ។
ឯកឧត្តម អភិសន្តិបណ្ឌិត បានបន្ថែមថា៖ ក្រោយបញ្ចប់បេសកកម្មធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមនាឆ្នាំ២០២៣ ថ្មីៗនេះ កម្ពុជាក៏នឹងទទួលធ្វើជាម្ចាស់ផ្ទះ ព្រឹត្តិការណ៍កីឡាយុវជនទ្វីបអាស៊ី (Asian Youth Games) លើកទី៦ នៅឆ្នាំ២០២៩ ខាងមុខ។ ដូច្នេះកម្ពុជា ត្រូវការពង្រឹងធនធានយុវជនលើគ្រប់ប្រភេទកីឡា បូករួមទាំងកីឡាបាល់ទះយើងផងដែរ ដើម្បីចូលរួមការប្រកួតប្រជែង ក្នុងនាមជាម្ចាស់ផ្ទះ។
លោក Eric TANGUY ប្រធានសហព័ន្ធកីឡាបាល់ទះបារាំង ក៏បានបង្ហាញអារម្មណ៍សប្បាយរីករាយ ដែលបានធ្វើដំណើរមកកាន់កម្ពុជា និងបានចុះ MOU ជាមួយសហព័ន្ធកីឡាបាល់ទះកម្ពុជា ដែលជាប្រទេសទី១ នៅក្នុងតំបន់អាស៊ី អាគ្នេយ៍ បានរួមគ្នាក្នុងការអភិវឌ្ឍវិស័យបាល់ទះឱ្យកាន់តែរីកចម្រើនបន្ថែម ទៀត។
លោក Eric TANGUY ក៏បានថ្លែងអំណរគុណដល់សហព័ន្ធកីឡាបាល់ទះកម្ពុជា ដែលបានអញ្ជើញក្រុមបាល់ទះអាយុ ១៩ឆ្នាំ បារាំង មកប្រកួតមិត្ត ភាពអន្តរជាតិនៅកម្ពុជា កាលពីដើមឆ្នាំ២០២៣ ដែលបានរៀបចំទទួលបានយ៉ាងល្អ ពិសេសបានធ្វើឱ្យ ក្រុមបាល់ទះអាយុ ១៩ឆ្នាំ ប្រទេសបារាំង បានក្លាយជាម្ចាស់ជើងឯកផងដែរ។
ប្រធានសហព័ន្ធកីឡាបាល់ទះបារាំង ក៏បានបង្ហាញការចាប់អារម្មណ៍ ចង់អញ្ជើញកម្ពុជាដើម្បីចូលរួមជាមួយក្រុមប្រទេសដែលចេះនិយាយភាសាបារាំង ដើម្បីឱ្យកម្ពុជាមានឱកាសបានប្រកួតជាមួយបណ្ដាលប្រទេសដែលជាសមាជិក។ ជាចុងក្រោយ លោក Eric TANGUY បានបញ្ជាក់ថាការចុះអនុស្សារណៈយោគយល់គ្នា នឹងឱ្យវិស័យបាលទះនៅកម្ពុជា កាន់តែមានភាពរីកចម្រើនបន្ថែមទៀត។
គួរបញ្ជាក់ផងដែរថា តាមរយៈកិច្ចព្រមព្រៀងជាដៃគូរវាងសហព័ន្ធកីឡាបាល់ទះកម្ពុជា និងសហព័ន្ធកីឡាបាល់ទះបារាំង នឹងធ្វើការងារលម្អិតជាមួយគ្នាលើផ្នែកជាច្រើនដូចជា៖មានការផ្លាស់ប្តូរចំណេះដឹង សមត្ថភាព និងជំនាញ រវាងគ្រូបង្វឹកជាតិ និងកីឡាករ, ការរៀបចំកម្មសិក្សា, ការអនុវត្តគំរោងទាក់ទងទៅនឹងការអភិវឌ្ឍកីឡាបាល់ទះ/ បាល់ទះលើឆ្នេរខ្សាច់ ពិសេសការផ្លាស់ប្តូរបទពិសោធន៍ នឹងការបណ្ដុះបណ្ដាលកីឡា ករ គ្រូបង្វឹក អ្នកដឹកនាំ អាជ្ញាកណ្ដាលុ។ លើសពីនេះក៏គ្រោងរៀបចំការប្រកួតមិត្តភាពអន្តរជាតិ របស់ក្រុមជម្រើសជាតិ រវាងគូភាគីននៅលើទឹកដីនៃប្រទេសណាមួយ៕
