សិល្បៈជាតិ៖ បន្ទាប់ពីតារាចម្រៀងរ៉ែបដ៏ល្បីរបស់កម្ពុជា វណ្ណដា បានទម្លាក់តម្រុយបទចម្រៀងថ្មី «6 Years in the Games» ដែលជាបទចម្រៀងរួមគ្នាជាមួយនឹងតារាចម្រៀងជប៉ុន អ្នកនាង Awich ធ្វើឱ្យសាធារណជន ពិសេសអ្នកគាំទ្រវណ្ណដា មានចម្ងល់ជាខ្លាំងតើនារីស្រស់ស្អាតរូបនេះ គឺជាអ្នកណា? ហើយនាងមានសាវតាបែបណា?
បច្ចុប្បន្ន Awich ឬមានឈ្មោះកំណើត Akiko Urasaki មានវ័យ៣៦ឆ្នាំ។ តារាស្រីរូបនេះកើតនៅកោះអូគីណាវ៉ា នាថ្ងៃទី១៦ ខែធ្នូ ឆ្នាំ១៩៨៦ ។ ក្រោយប្រឡូកចូលក្នុងវិស័យសិល្បៈកាលពីឆ្នាំ២០០០ អ្នកនាងបានប្រែក្លាយខ្លួនជាអ្នកចម្រៀង Hip hop ដ៏មានឥទ្ធិពលនិងនាំមុខគេមួយរូបនៅប្រទេសជប៉ុន។
តាមការស្រាវជ្រាវពីបណ្ដាវែបសាយល្បីៗរបស់ជប៉ុន Awich មុននឹងមានកេរ្តិ៍ឈ្មោះល្បីល្បាញ និងប្រជាប្រិយភាពនៅប្រទេសជប៉ុន ខ្សែជីវិតនាងឆ្លងកាត់នូវបទពិសោធន៍និងការសាកល្បងជាច្រើនជំពូក។ នៅអាយុ១៩ឆ្នាំ Awich បានចាកចេញពីផ្ទះទៅបន្តការសិក្សានៅសហរដ្ឋអាមេរិកជំនាញ Business និង Marketing នៅរដ្ឋអាត្លង់តា សហរដ្ឋអាមេរិក។ នៅទីនោះនាងបានរៀបការជាមួយបុរសអាមេរិកម្នាក់ដែលត្រូវបានចាប់បង្ខាំងក្នុងពន្ធនាគារ ហើយនៅត្រឹមអាយុ២០ឆ្នាំ នាងមានទម្ងន់។ ក្រោយកូនស្រីកើតបាន៣ថ្ងៃស្វាមីនាង ត្រូវបានដោះលែងចេញពីមន្ទីរឃុំឃាំង ប៉ុន្តែបែរជាត្រូវបានគេសម្លាប់។ ថ្វីត្បិតជាស្ត្រីមេម៉ាយកូនមួយប៉ុន្តែ Awich បានតស៊ូជម្នះរហូតបានបញ្ចប់ការសិក្សាថ្នាក់បរិញ្ញាប័ត្រផ្នែក Business និង Marketing ។
ស្ថិតនៅក្នុងអាជីពជាតារាចម្រៀង Hiphop ក្នុងប្រទេសជប៉ុនគឺជារឿងមួយដ៏លំបាកអាស្រ័យដោយសារតែមានការរើសអើងចំពោះស្ត្រី។ ស្ត្រីដែលមានដើមកំណើតពីអូគីណាវ៉ារូបនេះ តែងតែរំលេចមោទនភាពនៃទឹកដីកំណើតរបស់ខ្លួនតាមរយៈបទចម្រៀងដូចជា Tsubata (2022) Longiness Remix (2022) និងបទ Rasen in Okinawa (2023)។
ងាកមកជនជាតិជប៉ុននៅកម្ពុជា កញ្ញា Yumi ដែលជា Influencer ផលិត Content ជាវីដេអូមួយរូបនៅលើបណ្ដាញសង្គម Tiktok បានឆ្លើយប្រាប់អ្នកគាំទ្រនៅក្នុងវីដេអូមួយរបស់ខ្លួន ពីដៃគូចម្រៀងថ្មីរបស់វណ្ណដា គឺអ្នកនាង Awich ថា Awich គឺជាអ្នកចម្រៀង Hiphop ឬជា (Rapper) ដ៏ល្បីមួយរូប ដោយតារាស្រីរូបនេះ ត្រូវបានគេប្រសិទ្ធិនាមឱ្យថាជា រាជិនីចម្រៀង Rap នៅប្រទេសជប៉ុន។ អ្នកនាង ឧស្សាហ៍មានវត្តមានក្នុងកម្មវិធីតន្ត្រីធំៗនិងល្បីៗ ក៏ដូចជាបង្ហាញវត្តមានកិត្តិយសនៅលើប៉ុស្ដិ៍ទូរទស្សន៍ជប៉ុនផងដែរ។
