បច្ចេកវិទ្យាកាន់តែជឿនលឿន បានធ្វើឲ្យការរស់នៅរបស់មនុស្សក៏កាន់តែមានភាពងាយស្រួលនាពេលបច្ចុប្បន្ន ជាក់ស្ដង ដូចជាការចាយវាយប្រចាំថ្ងៃរបស់យើងនាពេលបច្ចុប្បន្ន កាន់តែមានភាពងាយស្រួល រហ័យដោយការទូទាត់ប្រាក់តាមរយ: ឃ្យូអរកូដ – QR Code ដោយប្រើតែទូរសព្ទដៃស្គេនត្រឹម ២ទៅ៣ វិនាទីផងរួចជាការស្រេច។
ឃ្យូអរកូដ – QR Code នេះស្រដៀងទៅនឹង BarCode (បាកូដ) តែវាមានទម្រង់ជា 2D (ពីរវិមាត្រ) និង រាងជា ការ៉េ។ នេះមានន័យថា QR Code ត្រូវមានព័ត៌មានទាំងទិសបញ្ឈរ និងផ្ដេក។ អាចនិយាយបានថា គេបង្កើតវាឡើងដើម្បីផ្ដុកទិន្នន័យ ដែលមានភាពបទបែនបានច្រើនជាង BarCode។
ចុះអ្នកដឹងទេថា QR Code កើតឡើងតាំងពីពេលណា មានប្រភពមកពីណា និងមានឈ្មោះពេលបែបណា? ថ្ងៃនេះក្រុមការងារបច្ចេកវិទ្យា របស់សារព័ត៌មានត្រយង នឹងបង្ហាញប្រិយមិត្តអោយបានដឹង!
ឃ្យូអរកូដ – QR Code មានពាក្យពេញថា (Quick Response Code) ឬហៅថា ( កូដឆ្លើយតបរហ័ស) គឺជាបណ្ដុំនៃភីកសែល ទូទៅមានគម្លាតពណ៌ស ប្រភេទនៃលេខកូដ ដែលមានការឆ្លើយតប និងផ្ដល់ទិន្នន័យយ៉ាងរហ័ស ដោយគ្រានតែប្រើកាមេរ៉ាថតទៅលើ QR Code វានិងធ្វើការទូទាត់ប្រាក់ ឬចូលទៅកាន់ចំណុចណាមួយដែលអ្នកចង់ទៅ វានឹងបើកនូវឯកសារ ឬរូបភាព ដែលមានបង្កប់ទុកតាមរយៈ URL ពីក្នុង QR Code នោះ ដោយវាស្ថិតក្នុងទ្រងទ្រាយរាងជាការ៉េ។
ប្រព័ន្ធ QR code ត្រូវបានបង្កើតឡើងដំបូងក្នុងឆ្នាំ១៩៩៤ ដោយក្រុមហ៊ុនផលិតរថយន្តជប៉ុន Denso Wave ដែលត្រូវបានប្រើដើម្បី ធ្វើការស្គេនរហ័ស និងដើម្បីតាមដានរថយន្តគ្រឿងរយន្តអំឡុងពេលដំណើរការដំឡើង។
ហេតុអ្វីបានជា QR Code បាននឹងកំពុងពេញនិយមក្នុងការប្រើប្រាស់?
- ឃ្យូអរកូដ – QR Code មានភាពងាយស្រួល និងរហ័សក្នុងការបង្កើត
- អាចផ្ទុកទិន្នន័យរហូតដល់ ៤ពាន់តួអក្សរ
- ងាយស្កេនដោយប្រើប្រាស់កាមេរ៉ាទូរសព្ទដើម្បីទាញយកកម្មវិធី ប្រើប្រាស់ពីApp Store ឬPlay Store, ចូលប្រើប្រាស់ប្រព័ន្ឋ WIFI, ភ្ជាប់ទៅកាន់គេហទំព័រតាមអ៊ីនធើណិត
- ទូទាត់ប្រាក់និងថ្លៃទំនិញ ព្រមទាំងមានមុខងារច្រើនទៀតរបស់QR Code ដែលយើងប្រើប្រាស់ប្រចាំថ្ងៃ
ទន្ទឹម និងភាពងាយស្រួលក្នុងការប្រើប្រាស់ប្រចាំថ្ងៃ អ្នកក៏ត្រូវតែមានការស្តេនដោយមានការប្រុងប្រយ័ត្ន ពីព្រោះតំណភ្ជាប់ដែលយកទៅបង្កើត QR Code នោះ អាចជាតំណភ្ជាប់នាំទៅកាន់ គេហទំព័រមិនមានសុវត្ថិភាព អាចប៉ះពាល់ ដល់ទិន្នន័យរបស់លោកអ្នក។ ដូច្នេះអ្នក គួរតែស្កេននូវ QR Code ចេញពីប្រភព ដែលអាចទុកចិត្តបាន។
បច្ចុប្បន្ន ធនាគារ អាជីវកម្មជាច្រើន បានងាកមករកការប្រើប្រាស់ QR Code នេះ ដោយសារភាពងាយស្រួល និងមានផ្ទុកទិន្នន័យបានសម្បូរបែប ដែលត្រូវគេបង្កប់នៅក្រោម QR Code ហើយនេះបានជម្រុញឲ្យមានអ្នកប្រើប្រាស់កាន់តែច្រើន ក្នុងរយៈពេលមួយទសវត្សរ៍ចុងក្រោយនេះ។
តើអាជីវកម្មអាចបង្កើត QR Code បានដោយរបៀបណា?
អាជីវកម្ម ត្រូវដឹងថា QR Code គឺខុសពី UPC / BarCode ។ អ្នកណាដែលចេះប្រើអ៊ីនធឺណិត គឺអាចបង្កើត QR Code បាន! មានវេបសាយសម្រាប់បង្កើត QR Code ដោយឥតគិតថ្លៃជាច្រើននៅលើ អ៊ីនធឺណិត ដែលអ្នកអាចប្រើ ដោយគ្រាន់តែធ្វើតាមការណែនាំនៅលើនោះ ហើយបំពេញព័ត៌មានដែលអ្នកចង់បញ្ចូលជាការស្រេច៕