ក្លិបបាល់ទាត់អង្គរថាយហ្គឺរ (Angkor Tiger FC) សមាជិកពានរង្វាន់លីគកំពូលកម្ពុជា បានប្រកាសនៅលើបណ្តាញសង្គមផ្លូវការរបស់ខ្លួននាព្រឹកថ្ងៃព្រហស្បត្តិ៍ ទី១ ខែកុម្ភៈ ឆ្នាំ២០២៤ នេះថា ក្លិបបើកទទួលម្ចាស់ឧបត្ថម្ភក្នុងកញ្ចប់ថវិកាចាប់ពី $៥០០ (២លានរៀល)ឡើងទៅ។
បើតាមសេចក្តីប្រកាសព័ត៌មានរបស់ក្លិបបញ្ជាក់ថាឱកាសនៃការឧបត្ថម្ភ និងភាពជាដៃគូជាមួយក្លិបសម្រាប់រដូវកាលថ្មីឆ្នាំ 2024-2025 ជាមួយនឹងកញ្ចប់ឧបត្ថម្ភ ឬភាពជាដៃគូ ចាប់ផ្តើមពី $៥០០ ប៉ុណ្ណោះ។ ក្នុងនាមជាអ្នកឧបត្ថម្ភ ក្រុមហ៊ុនដៃគូនឹងទទួលបានអត្ថប្រយោជន៍ដូចជា៖
- ឡូហ្គោលរបស់ភាគីក្រុមហ៊ុននឹងត្រូវបានបង្ហាញយ៉ាងលេចធ្លោនៅលើឯកសណ្ឋានរបស់ក្លិប ការដាក់ឈ្មោះកីឡដ្ឋានទៅតាមអត្តសញ្ញាណក្រុមហ៊ុន និងអត្ថប្រយោជន៍ផ្សេងៗទៀត។
- ភាគីក្រុមហ៊ុននឹងត្រូវបានបង្ហាញនៅលើសម្ភារៈផ្សព្វផ្សាយរបស់ក្លិប រួមទាំងគេហទំព័រ និងប្រព័ន្ធផ្សព្វផ្សាយសង្គម នានា។
- ភាគីក្រុមហ៊ុននឹងមានឱកាសរៀបចំព្រឹត្តិការណ៍ និងការផ្សព្វផ្សាយដោយកីឡាកររបស់ក្លិប។
- ក្លិបក៏មានផ្តល់ជូនកញ្ចប់ឧបត្ថម្ភជាច្រើនប្រភេទ ទៅតាមតម្រូវការ និងកញ្ចប់ថវិការបស់ភាគីអ្នកឧបត្ថម្ភ។
ក្លិបបាល់ទាត់អង្គរថាយហ្គឺរ មានលោក Akihiro Kato ជាប្រធានក្លិប កំពុងឈរជើងនៅទឹកដីខេត្តសៀមរាប ដោយកំពុងរៀបចំសាងសង់កីឡដ្ឋានផ្ទាល់ខ្លួន ក្នុងរដូវកាលថ្មីខាងមុខ ខណៈបច្ចុប្បន្នក្លិបប្រើប្រាស់កីឡដ្ឋានហនុមាន បណ្ដោះអាសន្ន៕