ក្រោយបញ្ចប់វគ្គជម្រុះ១៦ក្រុមចុងក្រោយ ជើងឯកថ្នាក់ជាតិ ឃើញថាក្រុមដែលធ្លាប់ឈ្នះជើងឯកពានរង្វាន់បាល់ទាត់សម្តេចតេជោ ហ៊ុន សែន (Hun Sen Cup) ចំនួន២ក្រុមបានធ្លាក់ចេញពីការប្រកួតនៅរដូវកាលឆ្នាំ២០២៣-២៤ នេះមុនគេ បើធៀបនឹងក្រុមដែលធ្លាប់ឈ្នះជើងឯកផ្សេងៗ។
ក្រុមបាល់ទាត់ទាំង២នោះ គឺក្រុមសមាគមក្រសួងមហាផ្ទៃ ដែលធ្លាប់ជើងឯកនៅឆ្នាំ២០១៤ និងក្រុមកងយោធពលខេមរភូមិន្ទ (Tiffy Army FC) ម្ចាស់ជើងឯក៣សម័យកាល គឺនៅឆ្នាំ២០១០, ២០១៦ និង២០១៨។
ដូច្នេះអតីតម្ចាស់ជើងឯកដែលនៅសល់ក្នុងវគ្គ៨ក្រុមចុងក្រោយមានដូចជា៖
១) ព្រះខ័នរាជស្វាយរៀង ធ្លាប់ឈ្នះ៤សម័យកាល (២០១១,២០១២,២០១៥,២០១៧)
២) វិសាខា ធ្លាប់ឈ្នះ៣សម័យកាល (២០២០,២០២១,២០២២)
៣) ភ្នំពេញក្រោន ធ្លាប់ឈ្នះ២សម័យកាល (២០០៨,២០០៩)
៤) ណាហ្គាវើល ធ្លាប់ឈ្នះ១សម័យកាល (២០១៣)
៥) បឹងកេត ធ្លាប់ឈ្នះ១សម័យកាល (២០១៩)
ចំណែកក្រុមខេមរាកីឡា ដែលធ្លាប់ឈ្នះជើងឯកកាលពីរដូវកាលទី១ ក្នុងឆ្នាំ២០០៧ កន្លងទៅបានរំសាយក្លិបបាត់ទៅហើយ។
ចំណែកកម្មវិធីប្រកួតវគ្គ៨ក្រុមចុងក្រោយនៅឆ្នាំ២០២៣-២៤ នេះមានដូចជា៖
គូទី១) ណាហ្គាវើល ប៉ះ ព្រះខ័នរាជស្វាយរៀង
គូទី២) ភ្នំពេញក្រោន ប៉ះ គីរីវង់សុខសែនជ័យ
គូទី៣) វិសាខា ប៉ះ ព្រៃវែងអែហ្វស៊ី
គូទី៤) អាយអេសអាយ ដង្កោសែនជ័យ ប៉ះ បឹងកេត
អត្ថបទពាក់ព័ន្ធ៖កីឡាករ១១នាក់ដែលមានវ័យចំណាស់ជាងគេក្នុងពានរង្វាន់ Hun Sen Cup ជើងឯកថ្នាក់ជាតិ
តាមគម្រោងការប្រកួតវគ្គ៨ក្រុមចុងក្រោយនេះ នឹងធ្វើឡើងប្តូរទឹកដីគ្នាទៅមក មាន២ប្រកួត ដោយជើងទី១ ធ្វើឡើងនៅថ្ងៃទី៧ ខែកុម្ភៈ ហើយជើងទី២ ធ្វើឡើងនៅថ្ងៃទី២១ ខែកុម្ភៈ ហើយក្រុមខ្លាំងមានឈ្មោះឡើងទៅវគ្គពាក់កណ្ដាលផ្ដាច់ព្រ័ត្រ៕