វិបត្តិនៃការរីករាលដាលនៃជំងឺកូវីដ-១៩ នៅតែបន្តរាលដាលនិងរុករានដល់ការរស់នៅរបស់ប្រជាពលរដ្ឋកម្ពុជា ធ្វើឱ្យវិស័យមួយចំនួនជាប់គាំង ខណៈវិស័យមួយចំនួនដួលប៉ះជើងមិនអាចស្រោចស្រង់បាន ក្នុងនោះអាជីពសិល្បៈ ក៏អាចចាត់ទុកថាជាអាជីពដែលរងនូវហានិភ័យមួយដែរ ព្រោះតែការងារសិល្បៈមួយចំនួនធំត្រូវបានផ្អាកដំណើរការជាបណ្ដោះអាសន្ន ដែលធ្វើឱ្យប៉ះពាល់ដល់ចំណូលជាប្រចាំថ្ងៃដល់បងប្អូនសិល្បករ-សិល្បការិនី ដូច្នោះហើយ ចង់មិនចង់បងប្អូនតារាមួយចំនួនបានងាកទៅចាប់អាជីពលក់ផលិតផលអនឡាញ ដើម្បីជួយទ្រទ្រង់ជីវភាពទៅតាមការស្ទាត់ជំនាញរៀងខ្លួន អ្នកខ្លះក៏លក់ជាផលិតផលថែរក្សាសម្រស់ អ្នកខ្លះលក់ជាគ្រឿងអលង្ការ សំលៀកបំពាក់ អ្នកខ្លះទៀតក៏លក់ម្ហូបអាហារ នំ ចំណី។
ក្នុងចំណោមសិល្បករ ពិធីករ តារាចម្រៀង តារាសម្ដែង អ្នកនាង ផេនខេក ដែលជាពិធីការិនីកម្មវិធី 3FUN និងជាតួសម្ដែងក្នុងកម្មវិធីសំណើច យក្សភ្លោះ របស់ស្ថានីយទូរទស្សន៍ប៉ុស្ដិ៍លេខ៩ ក៏មិនខុសពីមិត្តសិល្បករដទៃទៀតដែរ ព្រោះនៅពេលនេះកញ្ញាបានបញ្ចេញផលិតផលទឹកប្រហុកថ្មីមួយដោយដាក់ឈ្មោះស្លាកសញ្ញានោះថា «ម៉ែខេកទឹកប្រហុកឆ្ងាញ់ៗៗៗ» ដោយផលិតផលថ្មីនេះទើបតែបានបញ្ចេញលក់ក្នុងពេលថ្មីៗនេះ បន្ទាប់ពីផេនខេកធ្លាប់បាន ឡាយលក់ជាសំលៀកបំពាក់និងគ្រឿងផ្អាប់ប្រហុកផ្អកមួយរយៈកន្លងមកហើយ។
ផលិតផលទឹកប្រហុកអនឡាញថ្មីរបស់ផេនខេកហាក់ទទួលបានការស្វាគមន៍គាំទ្រច្រើនពីសំណាក់អ្នកគាំទ្រអ្នកនាងព្រោះតែមានអ្នកចូលមកខមមិនសួរនាំពីតម្លៃ និងចង់កុម្មង់យ៉ាងច្រើនផងដែរ។ ក្រៅពីអ្នកនាងផេនខេក ដែលជាពិធីការិនីនិងអ្នកកំប្លែងហើយនោះ អ្នកនាងខ្ញុង តារាកំប្លែង ក៏ជាអ្នកលក់ផលិតផលអនឡាញទាក់ទងនឹងគ្រឿងផ្អាប់ត្រីងៀតត្រីឆ្អើ ប្រហុកផ្អកដូចគ្នាម្នាក់ដែរ៕
