ឆ្លៀតឱកាសបណ្ដើរគ្នាទៅកម្សាន្តនៅបរទេស គូស្នេហ៍កញ្ញា រ៉េត សារីតា លោក Tomas Gimenez បានលុតជង្គង់សុំរៀបការនៅលើកំពូលភ្នំទឹកកក Wanaka កាលពីថ្ងៃទី៩ ខែកុម្ភៈឆ្នាំ ២០២៤ កន្លងទៅ នេះបើយោងតាមការចែករំលែកពីសាមីខ្លួនលើបណ្ដាញសង្គម។
នៅក្នុងឱកាសដែលបងប្អូនខ្មែរសែស្រឡាយចិន ឆ្លៀតឱកាសឈប់សម្រាកជួបជុំក្រុមគ្រួសារអបអរបុណ្យចូលឆ្នាំចិននោះ កញ្ញា រ៉េត សារីតា ស្រីស្អាត លំដាប់ចក្រវាឡ អតីត Miss Universe ឆ្នាំ២០២០ បានបណ្ដើរគូស្នេហ៍ទៅលម្ហែដល់ប្រទេសណូវែលហ្សេឡង់។ យ៉ាងណាមិញការដឹកដៃគ្នាទៅដើរកម្សាន្ត ក្រៅប្រទេសលើកនេះមិនខាតជើងនោះឡើយ ព្រោះបុរសសង្ហាដែលក្ដោបបេះដូងស្រីស្អាតរបស់យើងបានលុតជង្គង់សុំរៀបការ ហើយខាងស្រីក៏បានឆ្លើយ Yes រួចរាល់ហើយដែរ ដូច្នេះអ្នកគាំទ្រនៅតែរងចាំអ៊ុតកាលបរិច្ឆេទរៀបការប៉ុណ្ណោះ។
ទីតាំងដែលបុរសសង្ហា Tomas Gimenez ជ្រើសរើសដើម្បីបង្កើតបរិយាកាសរ៉ូម៉ែនទិច សុំរៀបការជាមួយនឹង សារីតា នោះគឺនៅលើភ្នំទឹកកក Wanaka នាប្រទេសណូវែលហ្សេឡង់។ Wanaka ស្ថិតនៅកោះភាគខាងត្បូងត្រូវបានគេចាត់ទុកជាទីក្រុងរីសត ដែលមានទេសភាព បឹងបួរ និងភ្នំទឹកកក ដ៏ស្រស់ស្អាត ជាទីតាំងដែលអ្នកនិយមចូលចិត្តលេងស្គីជ្រើសរើសសម្រាប់ទៅសម្រាកលម្ហែជាពិសេស។
ដំណឹងដ៏រីករាយ របស់ កញ្ញា រ៉េត សារីតា និងគូស្នេហ៍ ត្រូវបានអ្នកគាំទ្រ និងអ្នកសិល្បៈចូលមកអបអរសាទរ ព្រមទាំងជូនពរឱ្យអនាគតកូនកំលោះកូនក្រមុំ ឆាប់រើសថ្ងៃល្អបណ្ដើរគ្នាចូលរោងជ័យ ព្រោះគេជឿជាក់ថា សារីតា តូច និង Tomas តូចប្រាកដជាគួរឱ្យស្រលាញ់ព្រោះមានម៉ាក់ស្រស់ស្អាត ចំណែកលោកប៉ាក៏ស្រស់សង្ហា៕
