ហ្គាហ្សា ស្រ្ទីប៖ ការគំរាមកំហែងពីការលុកលុយរបស់អ៊ីស្រាអែលចូលទៅក្នុងទីក្រុង Rafah ភាគខាងត្បូងនៃតំបន់ហ្គាហ្សា នៅតែបន្តកើតមាន កាលពីថ្ងៃអាទិត្យ (ថ្ងៃទី១១ ខែកុម្ភៈ) ប៉ុន្តែនាយករដ្ឋមន្ត្រីអ៊ីស្រាអែល លោក Benjamin Netanyahu បានសន្យាថា «បង្កើតច្រកសុវត្ថិភាព» ដល់ជនស៊ីវិលដែលបានផ្លាស់ទីលំនៅនៅទីនោះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃចន្ទ ទី១២ ខែកុម្ភៈ ឆ្នាំ២០២៤
ក្នុងបទសម្ភាសន៍មួយដែលចាក់ផ្សាយលើទូរទស្សន៍ ABC News កាលពីថ្ងៃអាទិត្យ លោក Netanyahu បានបញ្ជាក់ជាថ្មីពីគោលបំណងរបស់លោក ក្នុងការពង្រីកប្រតិបត្តិការយោធារបស់អ៊ីស្រាអែល ប្រឆាំងនឹងក្រុមហាម៉ាសទៅកាន់ក្រុង Rafah។
ទោះជាមានការព្រមានពីអន្តរជាតិថា ការវាយលុកណាមួយរបស់អ៉ីស្រាអែលក្នុងទីក្រុង Rafah អាចនឹងបណ្ដាលឱ្យជនស៊ីវិលជាច្រើនស្លាប់រង្គាលក៏ដោយ លោក Netanyahu បានប្រាប់ទូរទស្សន៍ ABC News ថា «យើងនឹងធ្វើវា។ «យើងនឹងបើកការវាយលុក ខណៈផ្ដល់ច្រកផ្លូវសុវត្ថិភាពសម្រាប់ជនស៊ីវិល ដូច្នេះពួកគេអាចគេចខ្លួនបាន»។
សូមជម្រាបថា ការវាយប្រហាររបស់កងទ័ពអ៉ីស្រាអែល លើភាគខាងត្បូងជាប់ៗគ្នា ទីក្រុងរ៉ាហ្វា បានក្លាយជាមជ្ឈមណ្ឌលដ៏សំខាន់ចុងក្រោយនៅក្នុងតំបន់ហ្គាហ្សា ដែលកងទ័ពមិនទាន់បានទៅដល់ ទោះបីជាតំបន់នេះត្រូវបានវាយប្រហារតាមផ្លូវអាកាសដោយការទម្លាក់គ្រាប់បែកស្ទើរតែរាល់ថ្ងៃក៏ដោយ។
យោងតាមក្រសួងសុខាភិបាលហ្គាហ្សា បាននិយាយនៅក្នុងសេចក្ដីថ្លែងការណ៍មួយកាលពីថ្ងៃអាទិត្យ សប្ដាហ៍មុន ការវាយប្រហាររបស់អ៉ីស្រាអែលបានសម្លាប់ជនជាតិប៉ាឡេស្ទីន កើនឡើងដល់ ២៨,១៧៦នាក់ហើយ ភាគច្រើនជាជនស៊ីវិលជាស្រ្តី និងកុមារ ខណៈមនុស្សជាង ៦៧ម៉ឺននាក់ទៀតបានរងរបួស ចាប់តាំងពីសង្រ្គាមនៅតំបន់ហ្គាហ្សាបានផ្ទុះឡើងកាលពីថ្ងៃទី៧ ខែតុលា ឆ្នាំ២០២៣ បន្ទាប់ពីក្រុមសកម្មប្រយុទ្ធហាម៉ាសបានវាយប្រហារលើភាគខាងត្បូងអ៉ីស្រាអែលដោយសម្លាប់មនុស្សនៅអ៉ីស្រាអែលជាង ១,១៦០នាក់ ដោយភាគច្រើនជាជនស៊ីវិល និងចាប់ខ្លួនមនុស្សជាង ២០០នាក់ធ្វើជាចំណាប់ខ្មាំងផងដែរ៕