ពានរង្វាន់ AFC Cup 2021 នៅតំបន់អាស៊ីខាងត្បូង នឹងរៀបចំប្រកួតនៅក្នុងប្រទេសម៉ាល់ឌីវ ខណៈតំបន់អាស៊ីខាងកើត អាស៊ីកណ្ដាល និងអាស៊ីខាងលិច សុទ្ធតែបានបញ្ចប់វគ្គជម្រុះតាមពូលរួចរាល់ហើយ។ ចំណែកតំបន់អាស៊ីអាគ្នេយ៍ ត្រូវបានសហព័ន្ធកីឡាបាល់ទាត់អាស៊ី សម្រេចលុបចោលដោយសារមិនអាចរកទីកន្លែងប្រកួតបានព្រោះមានការឆ្លងរីករាលដាលនៃជំងឺកូវីដ-១៩ខ្លាំង។
ក្រោយការសម្រេចថ្មីនេះវគ្គជម្រុះពានរង្វាន់ AFC Cup ប្រចាំតំបន់អាស៊ីខាងត្បូងត្រូវប្រកួតវគ្គជម្រុះបឋមសិនរវាងក្រុមBengaluru របស់ឥណ្ឌា ជាមួយក្រុមម្ចាស់ផ្ទះ Eagles របស់ម៉ាល់ឌីវ នៅវេលាម៉ោង១០យប់ថ្ងៃអាទិត្យ ទី១៥ ខែសីហា ឆ្នាំ២០២១ នេះលើទីលានកីឡដ្ឋាន Rasmee Dhandu Stadium ក្នុងទីក្រុង Malé ប្រទេសម៉ាល់ឌីវ។
អត្ថបទពាក់ព័ន្ធ៖កម្ពុជា ឡាវ ប្រ៊ុយណេ ទីម័រខាងកើត ទទួលបានកន្លះកៅអីប៉ុណ្ណោះក្នុងពាន 2023 AFC Cup
អ្នកឈ្នះរវាងគូប្រកួតនេះនឹងឡើងទៅបំពេញពូល D ដែលមានក្រុម ATK Mohun Bagan របស់ឥណ្ឌា Bashundhara Kings របស់បង់ក្លាដេស និងក្រុម Maziya របស់ម៉ាល់ឌីវ ដែលកំពុងរង់ចាំស្រេច។ ការប្រកួតវគ្គជម្រុះពូល D នេះធ្វើឡើងពីថ្ងៃទី១៨ ដល់២៤ ខែសីហា ឆ្នាំ២០២១ ដោយស្វែងរកក្រុមខ្លាំងតែ១ក្រុមឡើងទៅជួបក្រុមNasaf របស់អ៊ូប៊ែគីស្ថាន ឬក្រុម Ahal របស់តួរមេនីស្ថាន ដែលជាក្រុមខ្លាំងមកពីតំបន់អាស៊ីកណ្ដាល។