សិល្បៈជាតិ៖ សព្វថ្ងៃអ្នកគាំទ្រគ្រប់រូបបានជ្រាបដឹងមកហើយថា អ្នកនាង ឌុច លីដា គឺជាតារាសម្ដែងស្រីដ៏មានប្រជាប្រិយភាព និងធ្លាប់សាងស្នាដៃក្នុងវិស័យសិល្បៈតាមរយៈការសម្ដែងរឿងជាច្រើនឆ្នាំរួចមកហើយ។
ទម្រាំមានឈ្មោះបោះសំឡេង បានរស់នៅសោយសុខក្នុងទ្រនំខ្ពស់យ៉ាងស្ដុកស្ដមដូចសព្វថ្ងៃនេះ ឌុច លីដា ក៏ធ្លាប់ឆ្លងកាត់ជីវិតកម្រត់កម្រលំបាកកាលពីវ័យកុមារភាពធ្លាប់ជាក្មេងស្រីរកស៊ីទូរស័ព្ទសាធារណៈ ១នាទី ៣០០ រៀល និងធ្វើមេអណ្ដើកដឹកញីប្រស៊ីឈ្មោល ហើយជួយផ្សះផ្សាគូស្នេហ៍ត្រូវគ្នាវិញជាដើម។
ថ្មីៗនេះ តារាសម្ដែងស្រី ឌុច លីដា បានរំលឹកពីប្រវត្តិអតីតកាលប្រាប់ទៅដល់មហាជនអ្នកគាំទ្រថា ៖ «អាយុ ១៣ ឆ្នាំដាក់ទូរស័ព្ទសាធារណៈ 1នាទី 300៛ 2នាទី500៛ មិនសូវមានអ្នកតេ ដដើរធ្វើមេអណ្តើរឱ្យគេ ដើម្បីគេមកតេញ៉ែរគ្នាម្តង 1ម៉ោងទៅ2ម៉ោង ពេលខ្លះឆ្លៀតតបសារជំនួសខាងប្រុសទៀត ហើយពេលខាងស្រីតេមកចុចបិទ ហើយប្រាប់ឱ្យខាងប្រុសតេទៅលួងបងស្រីស្អាតផង បានថែមកន្លះម៉ោងទៀត ទើបបានលុយចំណេញគ្រាន់រួចបាយម្ហូប»។
ការនិយាយរៀបរាប់ពីប្រវត្តិអតីតកាលនៅវ័យកុមារឱ្យអ្នកគាំទ្របានដឹងនេះ គេសង្កេតឃើញមានអ្នកលេងបណ្ដាញសង្គមខ្លះពោលសរសើរតារាសម្ដែងស្រី ឌុច លីដា ថាមានភាពវ័យឆ្លាតតាំងពីតូច និងខ្លះទៀតអស់សំណើចហួសចិត្តដែលដឹងថាតារាស្រីរូបនេះចេះរកស៊ីធ្វើមេអណ្ដើកតាំងពីក្មេងតែម្ដង។
សូមជម្រាបថា សព្វថ្ងៃនេះ តារាស្រីរូបនេះបានរយាលដៃពីការងារសិល្បៈខ្លះអស់រយៈពេលជាង ៦ ឆ្នាំមកហើយ ដើម្បីចាប់ដៃគ្នាជាមួយឧត្តមស្វាមីកសាងគ្រួសារយ៉ាងមានសុខមង្គល និងទទួលបានកូនប្រុសម្នាក់ឈ្មោះ កិត្យាមណី មានវ័យប្រមាណជាង ៣ ឆ្នាំហើយ ដែលអ្នកប្រុសតូចរូបនេះ ធំធាត់ឡើងប្រកបដោយភាពឆ្លាតវៃ មុខមាត់ស្រស់សង្ហា កាត់តាមលោកប៉ាបន្តិចអ្នកម៉ាក់បន្តិច។
មួយរយៈចុងក្រោយនេះ តារាសម្ដែង ឌុច លីដា នៅមិនទាន់មានស្នាដៃសម្ដែងភាពយន្តថ្មីបម្រើអារម្មណ៍អ្នកគាំទ្រនៅឡើយទេ ស្នាដៃសម្ដែងចុងក្រោយរបស់អ្នកនាងគឺរឿងភាគ «កូនពស់កេងកង» របស់ឯកឧត្តម ហ្វៃ សំអាង។ ហើយបើចាំមិនភ្លេចទេនោះ ភាពយន្តធំល្បីៗដែលអ្នកនាង ឌុច លីដា ធ្លាប់បានសម្ដែងរួមមាន ស្បែកគង់ និងរឿង នារីវេទមន្ដ នោះ លីដា ដែលជាភាពយន្តធ្លាប់ធ្វើឱ្យប្រុសមិនតិចនាក់ទេឈាមច្រមុះដោយសារតែការសម្ដែងរបស់អ្នកនាង៕