មនុស្សម្នាក់បានស្លាប់ និងមនុស្ស២២នាក់ផ្សេងទៀតរងរបួស ដោយក្នុងនោះមានកុមារចំនួន ១១នាក់ ក្រោយហេតុការណ៍បាញ់រះមួយបានកើតឡើងនៅក្បែរកម្មវិធីអបអរសាទរជ័យជំនះមួយរបស់ក្រុមបាល់ឱបដែលមានសង្សារថ្មីរបស់ Taylor Swift ជាសមាជិកក្រុម។
ការបាញ់ប្រហារដ៏អាក្រក់នេះបានកើតឡើងនៅរសៀលថ្ងៃទី១៤ ខែកុម្ភៈ ចំទិវានៃក្ដីស្រលាញ់ ក្បែរវិថីដង្ហែក្បួនអបអរសាទរពាន Super Bowl នៅក្នុងក្រុង Kansas។ បើតាមសម្ដីរបស់ប៉ូលិសបានទម្លាយឱ្យដឹងថា គេចាប់បានជនសង្ស័យចំនួន៣រូប ដើម្បីយកទៅសាកសួរចម្លើយ។
ងាកមកស្ត្រីរងគ្រោះដែលជួបរឿងអកុសលនេះ ត្រូវបានគេដឹងអត្តសញ្ញាណហើយ លោកស្រីមានឈ្មោះថា Lisa Galvan-Lopez គឺជាអ្នកម្ដាយកូន២ ដែលជាអ្នកគាំទ្រដ៏ពេញទំហឹងរបស់ក្រុមបាល់ឱបនេះ។ លោកស្រីមានវ័យខ្ទង់ ៤៤ឆ្នាំ គឺជា ឌីជេវិទ្យុក្នុងតំបន់ និងជាពិធីករនៅក្នុងកម្មវិធីអាពាហ៍ពិពាហ៍ មនុស្សក្នុងតំបន់ស្គាល់លោកស្រីស្ទើតែគ្រប់គ្នា។
បើតាមសម្ដីរបស់មិត្តភ័ក្តិលោកស្រី បានស្លាប់នៅក្នុងមន្ទីរពេទ្យ នៅពេលដែលគ្រូពេទ្យកំពុងតែវះកាត់ជួយសង្គ្រោះអាយុជីវិត ដោយសារតែត្រូវរបួសត្រង់ក្បាលពោះ។ មិត្តភក្ដិលោកស្រីបានបន្ថែមថា កូនប្រុសច្បងរបស់លោកស្រី Lisa ក៏រងរបួសដោយសារគ្រាប់កាំភ្លើង និងកំពុងសំរាកព្យាបាលក្នុងមន្ទីរពេទ្យដូចគ្នាផងដែរ។
សូមជំរាបជូនថា ជនរងគ្រោះ និងស្វាមី ព្រមទាំងកូនប្រុសទាំងពីរ រស់នៅក្បែរទីតាំងកើតហេតុ ដោយគ្រាន់តែចំណាយពេលបើកបរពីផ្ទះទៅទីតាំងនោះត្រឹមតែ១ម៉ោងប៉ុណ្ណោះ៕
