ក្រុមខ្លាំងជាងគេចំនួន ៤ក្រុមគឺ សមាគមបាល់ទះវិសាខា, ក្លិបបញ្ជាការដ្ឋានអង្គរក្ស, សមាគមកីឡាបាល់ទះ ក្រសួងមហាផ្ទៃ និងក្លិបស្នងការដ្ឋាននគរបាលរាជធានីភ្នំពេញ បានដឹកដៃគ្នាឡើងទៅកាន់វគ្គពាក់កណ្តាលផ្តាច់ព្រ័ត្រ ក្នុងពានរង្វាន់បាល់ទះ«តេជោលីគ រដូវកាល២០២៣-២៤ (Techo Volleyball Cambodia League)» នៅថ្ងៃនេះ។
កម្មវិធីប្រកួតថ្ងៃសៅរ៍ ១៧ កុម្ភៈ (វគ្គពាក់កណ្តាលផ្ដាច់ព្រ័ត្រ)៖
- សមាគមបាល់ទះវិសាខា ប៉ះ ក្លិបស្នងការដ្ឋាននគរបាលរាជធានីភ្នំពេញ វេលាម៉ោង ៣:០០នាទីរសៀល
- ក្លិបបញ្ជាការដ្ឋានអង្គរក្ស ប៉ះ សមាគមកីឡាបាល់ទះ ក្រសួងមហាផ្ទៃ វេលាម៉ោង ៦:០០នាទីល្ងាច
សម្រាប់អ្នកចង់ចូលរួមទស្សនាផ្ទាល់ អាចចូលរួមដោយសេរី នៅសាលវិមានបាល់ទះនៃពហុកីឡដ្ឋានជាតិ រាជធានីភ្នំពេញ។
ពានរង្វាន់បាល់ទះ «តេជោលីគឆ្នាំ២០២៣-២៤» មានសមាជិកក្រុមចំនួន១០ក្រុម ដោយតម្រូវអោយប្រកួតជម្រុះដល់ទៅ៣ វគ្គសំខាន់ៗ នោះគឺ៖
- វគ្គទី១ ក្រុមទាំង១០ប៉ះគ្នា សន្សំពិន្ទុ ១ជុំ ហើយក្រុមលេខ១ដល់លេខ៨ មានឈ្មោះបន្តទៅជុំទី២ ខណៈក្រុមក្រុមលេខ៩ និងលេខ១០ ត្រូវកាត់ចេញ
- វគ្គទី២ ក្រុមនៅសល់៨ក្រុមបន្តប្រកួតសន្សំពិន្ទុ១ជុំទៀត ហើយក្រុមលេខ១ដល់លេខ៤ មានឈ្មោះឡើងទៅវគ្គពាក់កណ្តាលផ្ដាច់ព្រ័ត្រ ហើយក្រុមលេខ៧និងលេខ៨ ត្រូវកាត់ចេញ
- វគ្គទី៣ គឺវគ្គពាក់កណ្តាលផ្ដាច់ព្រ័ត្រ និងវគ្គផ្ដាច់ព្រ័ត្រ
ការប្រកួតពានរង្វាន់«តេជោលីគឆ្នាំ២០២៣-២៤» ចាប់ផ្តើមប្រកួតពីថ្ងៃទី១២ ខែមករា ដល់ថ្ងៃទី១៨ ខែមីនា ឆ្នាំ២០២៤ រៀងរាល់ថ្ងៃ សុក្រ-សៅរ៍ និងថ្ងៃអាទិត្យ លើទីលានវិមានពហុកីឡដ្ឋានជាតិ ក្នុងរាជធានីភ្នំពេញ៕
