ចុងសប្ដាហ៍នេះ វិសាខា នឹងបើទ្វាកីឡដ្ឋាន ព្រីនស៍ ដើម្បីទទួលក្រុម អាយ អេស អាយ ដង្កោសែនជ័យ ក្នុងជំនួបសប្ដាហ៍ទី២១ ពានរង្វាន់លីគកំពូលកម្ពុជា Cambodian Premier League រដូវកាល ២០២៣-២៤។
មុនជំនួនមកដល់ កែវ សុខសិលា អ្នកចាំទីរបស់វិសាខា បានបង្ហាញចំណាប់អារម្មណ៍ថា៖ «ពួកយើងបានត្រៀមខ្លួន ក៏ដូចជារៀបចំបានល្អ សម្រាប់ការប្រកួតនាចុងសប្តាហ៍នេះ ។ យើងបានដឹងហើយថា ការប្រកួត ២ជើងកន្លងមក ជាមួយក្រុម អាយ អេស អាយ ដង្កោសែនជ័យពួកយើងឈ្នះម្ដង និងស្មើម្ដង។ ដូច្នេះវាមិនមែនជាការប្រកួតដែលងាយស្រួលនោះទេ។ ប៉ុន្តែពួកខ្ញុំប្តេជ្ញា នឹងធ្វើឲ្យបានល្អជាង ការប្រកួតមុនៗ ដើម្បីដណ្តើម ៣ពិន្ទុក្នុងផ្ទះរបស់ពួកយើង»។
កែវ សុខសិលា បន្ថែមថា៖ ចុងក្រោយខ្ញុំថ្លែងអំណរគុណបងប្អូនអ្នកគាំទ្រ ដែលតែងផ្តល់កម្លាំងចិត្ត និងគាំទ្រពួកយើង ទោះបីលទ្ធផលយ៉ាងណាក្តី ហើយខ្ញុំសង្ឃឹមថា ការប្រកួតនៅកីឡដ្ឋានព្រីនស៍ចុងសប្តាហ៍នេះ បងប្អូននឹងអញ្ជើញចូលរួមទស្សនាឲ្យបានច្រើនកុះករ។ សូមអរគុណ!
សូមរំលឹកថា ក្នុងការប្រកួតពានរង្វាន់លីគកំពូលកម្ពុជា វិសាខា ធ្លាប់ប៉ះគ្នាជាមួយ អាយ អេស អាយ ដង្កោសែនជ័យ ២ដងរួមមកហើយ ដោយជំនួបទី១ នៅសប្ដាហ៍ទី៣ វិសាខា បានយកឈ្នះក្នុងលទ្ធផល ៤-០ ជំនួបទី២ នៅសប្ដាហ៍ទី១២ បានត្រឹមស្មើគ្នា ១-១។ ខណ:ជំនួបលើកទី៣ នឹងជួបគ្នានៅថ្ងៃអាទិត្យ ទី១៨ ខែកុម្ភ: ចុងសប្ដាហ៍នេះ៕