សល់ពេលប្រមាណ៣ខែទៀតទើបពានរង្វាន់លីគកំពូលកម្ពុជា Cambodian Premier League 2023-24 បញ្ចប់រដូវកាលរបស់ខ្លួនខណៈកីឡាករជប៉ុន ម្នាក់របស់ក្រុមព្រៃវែងអេហ្វស៊ី បានសុំបញ្ចប់កុងត្រាមុន ក្រោមហេតុផលបញ្ហាគ្រួសារ ឯស្រុកកំណើត ខណៈមិនបានប៉ុន្មានផងរូបគេត្រូវបានក្លិបមួយ នៅប្រទេសហ្វីលីពីន ប្រកាសថាបានចុះបញ្ជីជាសមាជិកក្លិបខ្លួនទៅវិញ។
កីឡាករនោះជាប្រធានក្រុម និងកម្លាំងសំខាន់របស់ព្រៃវែងអែហ្វស៊ី គឺ So Omae ដែលបង្ហាញខ្លួនបាន១៥១៣នាទី និងរកគ្រាប់បាល់បាន៤គ្រាប់ឱ្យក្រុម ព្រមទាំងឈ្នះពានរង្វាន់ Man Of The Match ចំនួន១លើកក្នុងពានរង្វាន់លីគកំពូលកម្ពុជា។ ក្រៅពីនោះម្ចាស់អាវលេខ១៥រូបនេះ ក៏ធ្លាប់ជួយក្រុមក្នុងពានរង្វាន់ Cambodian League Cup និងពានរង្វាន់សម្តេចតេជោ ហ៊ុន សែន ឆ្នាំ២០២៣-២៤ កន្លងទៅផងដែរ។
បើតាមប្រភពគួរអោយទុកចិត្តបានមួយបញ្ជាក់ថារូបគេស្នើសុំបញ្ចប់កិច្ចសន្យាជាមួយក្រុមព្រៃវែងអែហ្វស៊ី ព្រោះខ្លួនមានបញ្ហាក្នុងគ្រួសារ នៅឯប្រទេសជប៉ុន ដែលចាំបាច់ត្រូវដោះស្រាយ។ ប៉ុន្តែក្រោយចាកចេញពីកម្ពុជា រូបគេទៅបន្តអាជីពនៅប្រទេសហ្វីលីពីន វិញ ដោយប្រកាសផ្លូវការនៅព្រឹកថ្ងៃចន្ទ ទី១៩ ខែកុម្ភៈ ឆ្នាំ២០២៤ នេះ។
ក្លិបថ្មីរបស់ So Omae មានឈ្មោះថា Davao Aguilas F.C ជាសមាជិកលីគកំពូលនៃប្រទេសហ្វីលីពីន ខណៈក្រុមនេះទើបតែបង្កើតបាន៦ឆ្នាំប៉ុណ្ណោះ ពោលនៅឆ្នាំ២០១៧ ឈរលេខ៧ ហើយឆ្នាំ២០១៨ ឈរចំណាត់ថ្នាក់លេខ៣ ហើយក៏ផ្អាកសកម្មភាពមួយរយៈរហូតដល់រដូវកាល២០២៣ កន្លងទៅទើបចូលរួមប្រកួតប្រជែងឡើងវិញ។
ក្លិប Davao Aguilas F.C មានលោក Aber Ruzgal ជាគ្រូបង្វឹក មានលោក Jefferson Cheng ជាប្រធានក្លិប ដែលលោកក៏ជាសហប្រធាននៃក្លិបបាល់ទាត់ Western Sydney Wanderers សមាជិកលីគកំពូលនៃប្រទេសអូស្រ្តាលី ផងដែរ។ លោក Jefferson Cheng ត្រូវបានគេដឹងថាជាបុគ្គលសំខាន់ជួយទំនុកបំរុង ក្រុមបាល់ទាត់ U-19 និង U23 របស់ហ្វីលីពីន ស្របពេលដែលលោកក៏ជាផ្នែកក្នុងបេសកកម្មនាំក្រុមនារីហ្វីលីពីន ឡើងទៅប្រកួត ជើងឯកពិភពលោក 2023 FIFA Women’s World Cup នៅអូស្ត្រាលី និងនូវែលហ្សេឡង់ ថ្មីៗនេះផងដែរ។ កូនប្រុសលោកJefferson Cheng ឈ្មោះថា Enzo ក៏ជាសមាជិកក្រុមជម្រើសជាតិហ្វីលីពីន U19 និង U22 ទៀតផង។
លោក Jefferson Cheng ជានាយកប្រតិបត្តិ របស់ Sabre Sports United, International Goalkeeping Academy of Jimmy Fraser និងជាប្រធាន Philippine Airport Ground Support Solutions។
ក្រៅពីនាំចូល So Omae ក្លិប Davao Aguilas F.C បានចុះបញ្ជីកីឡាករបរទេស៧រូបផ្សេងទៀត មានដូចជា Yohann Fofana, Dosso Lancine, Coast Dini Ouattara ជនជាតិកូឌីវ័រ Mun Jun-su និង Mun Te-su ជនជាតិកូរ៉េខាងត្បូង Ibrahima Ndour ជនជាតិសេណាហ្គាល់ និងShoma Sato ជនជាតិជប៉ុន៕
