កីឡករ គួន ម៉ុម សមាជិតរបស់សមាគមបាល់ទះវិសាខា បានប្រាប់ថា ខ្លួននឹងត្រូវចេញទៅលេង ឱ្យក្លិបចាស់ Long An នៅប្រទេសវៀតណាម បន្ទាប់ពីចុះកុងត្រារួចរាល់ ដោយត្រូវចាកចេញទៅអំឡុងដើមខែមីនា ខាងមុខនេះ។
គួន ម៉ុម ថាចប់តេជោលីគ រូបគេពុំមានពេលច្រើនឡើងដោយត្រូវចេញទៅប្រកបអាជីពនៅប្រទេសវៀតណាម ជាថ្មី ដែលមានរយ:មិនដល់ ១ខែ សម្រាប់ជើងទី១ ខណ:ការប្រកួតនៅជើងទី២ ទើបមានការចុះកុងត្រាជាថ្មី។
ជុំវិញការចុះកុងត្រារយ:ពេលថ្មីនៅវៀតណាមនេះដែរ កីឡាករ មានវ័យ២៦ឆ្នាំ បានបង្ហើបប្រាប់ទៀតថា រូបគេត្រូវមានគោលដៅទៅលេងនៅប្រទេសថ្មីមួយទៀត តែជាប្រទេសមួយណានេះរូបគេសុំលាក
សិន។
ងាកមកការប្រកួតបាល់ទះ តេជោលីគវិញ កីឡករ គួន ម៉ុម បានរួមចំណែកជួបក្រុមវិសាខា ឡើងដល់វគ្គផ្ដាច់ព្រ័ត្រ ឈ្នះគ្រប់ការប្រកួត តែត្រូវបានភ្លាត់ចាញ់ក្រុមអង្គរក្សនៅវគ្គផ្ដាច់ព្រ័ត្រ ក្នុងលទ្ធផល ៣សិតទល់និង១ បានត្រឹមជើងឯករង និងឈ្នះពានឯកត្តជន ២ម្នាក់ឯង។
រំលឹកថា កីឡាករ មានវ័យ២៦ឆ្នាំ ដែលមានបទពិសោធន៍ខ្លាំងរបស់កម្ពុជា ដោយរូបគេធ្លាប់បានចេញទៅប្រកបអាជីពនៅប្រទេសឥណ្ឌូណេស៊ី នៅឆ្នាំ២០២០ កន្លងទៅជាមួយក្រុម Garuda Jakarta ក្នុងរដ្ឋធានីហ្សាកាតា។
ត្រឡប់មកពីឥណ្ឌូណេស៊ី វិញ គួន ម៉ុម បានបន្តចូលរួមជាមួយក្រុមវិសាខា វិញ រហូតដល់ចុងឆ្នាំ២០២៣ រូបគេបានផ្ទេរទៅចូលរួមជាមួយក្លិបបាល់ទះ Long An នៅប្រទេសវៀតណាម ជើងទី២ (ក្នុងលក្ខខណ្ឌខ្ចីជើង) កាលពីថ្ងៃទី១៥ ខែតុលា ឆ្នាំ២០២៣។
ចាបតាំងពីឆ្នាំ២០១៩ ដល់បច្ចុប្បន្ន ស្របពេលដែលគេក៏ជាតួរអង្គដ៏សំខាន់ជួយឱ្យបាល់ទះបុរសក្នុងសាលរបស់កម្ពុជា ឈ្នះមេដាយសំរឹទ្ធិ ព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាម និងមេដាយប្រាក់ស៊ីហ្គេម លើកទី៣២ ក្នុងរាជធានីភ្នំពេញ។
កីឡាករ ដែលមានស្រុកកំណើតនៅខេត្តតាកែវ មានកម្ពស់១ម៉ែត្រ ៩៨សង់ទីម៉ែត សមាជិករបស់សមាគមបាល់ទះវិសាខា និងក្រុមជម្រើសជាតិកម្ពុជា គឺជាកីឡាករខ្មែរទី២ បន្ទាប់ពី វឿន វាសនា ដែលបច្ចុប្បន្នកំពុងចូលរួមជាមួយក្លិបបាល់ទះ Win Streak នៅលីគបាល់ទះតៃវ៉ាន់ Enterprise Volleyball League ៕