សហព័ន្ធកីឡាបាល់ទាត់ហ្វីលីពីន (PFF) សមាជិកក្នុងសមាគមអាស៊ាន បានប្រកាសតែងតាំងគ្រូបង្វឹកបាល់ទាត់ជម្រើសជាតិបុរសរបស់ខ្លួនថ្មី នៅព្រឹកថ្ងៃចន្ទ ទី២៦ ខែកុម្ភៈ ឆ្នាំ២០២៤ នេះគឺជាជនជាតិបែលហ្សិក ដើម្បីត្រៀមជម្រុះ World Cup ប្រចាំទ្វីប បន្ទាប់ពីចែកផ្លូវជាមួយគ្រូបង្វឹកចាស់ជនជាតិអាល្លឺម៉ង់។
PFF introduces Tom Saintfiet as the new PHI MNT head coach#PFF #PHIMNT pic.twitter.com/tcSp6sK54j
— Philippine Football Federation (@philfootball) February 26, 2024
លោក Tom Saintfiet នឹងដឹកនាំក្រុមហ្វីលីពីន បន្តពីMichael Weiß ជនជាតិអាល្លឺម៉ង់ ដែលដឹកនាំក្រុមបានមួយរយៈគិតពីខែមិថុនា ឆ្នាំ២០២៣ មក ខណៈបេសកម្មបន្តរបស់ក្រុមជម្រើសជាតិហ្វីលីពីន គឺត្រូវចូលរួមប្រកួតជម្រុះ 2026 FIFA World Cup qualification – AFC second round ប្រចាំទ្វីបអាស៊ី ដោយស្ថិតក្នុងពូល F ជាមួយអ៊ីរ៉ាក់, វៀតណាម និងឥណ្ឌូណេស៊ី។ មិនតែប៉ុណ្ណោះក្រុមជម្រើសជាតិហ្វីលីពីន នៅសល់បេសកកម្មប្រកួតជើងឯកតំបន់អាស៊ាន AFF Championship ឆ្នាំ២០២៤ ចុងឆ្នាំផងដែរ។
សម្រាប់លោក Tom Saintfiet មានវ័យ៥០ឆ្នាំហើយ ដោយលោកធ្លាប់លេងជាខ្សែបម្រើ កាលនៅជាកីឡាករ ខណៈពេលដែលបន្តអាជីពជាគ្រូបង្វឹក លោកធ្លាប់ដឹកនាំក្លិបមួយចំនួននៅទ្វីបអឺរ៉ុប និងក្រុមជម្រើសជាតិក្រោមអាយុ១៧ឆ្នាំរបស់កាតារ, ជម្រើសជាតិឡាំប៊ី, ហ្ស៊ីមបាវ៉េ, អេត្យូពី, យេមែន, ម៉ាឡាវី, កុងហ្គោ, បង់ក្លាដេស, ទ្រីណាដាតនិងតូបាកូ, ម៉ាល់តា, ហ្សំប៊ី។
កៅអីដឹកនាំក្រុមជម្រើសជាតិហ្វីលីពីន នេះគឺក្រោយរយៈពេល១ខែដែលលោកបានដឹកនាំក្រុមជម្រើសជាតិហ្សំប៊ី ក្នុងពានរង្វាន់ជើងឯកទ្វីបអាហ្វ្រិក Africa Cup of Nations ដោយធ្លាក់ចេញត្រឹមវគ្គចែកពូល៕