កីឡាករបាល់ទាត់ក្នុងស្រុកចំនួន៣រូប ដែលប្រកបអាជីពនៅលីគកំពូលកម្ពុជា Metfone Cambodian League 2021 បានវះកាត់របួស នៅមន្ទីរពេទ្យមួយកន្លែងក្នុងរាជធានីភ្នំពេញ ដោយក្នុងនោះមានមានកីឡាករ សួន នឿត និង សេត រ៉ូហ្សាក់ របស់ភ្នំពេញក្រោន និងកីឡាករ អ៊ុំ សេរីរ័ត្ន របស់មជ្ឍមណ្ឌលកងយោធពលខេមរភូមិន្ទ។
បើតាមការបញ្ជាក់របស់ក្លិបបាល់ទាត់ភ្នំពេញក្រោន ថាកីឡាករ សួន នឿត និងសេត រ៉ូហ្ស៉ាក់ វះកាត់បញ្ហារបួសរបស់ខ្លួននៅព្រឹកថ្ងៃច័ន្ទ ទី១៦ ខែសីហា ឆ្នាំ២០២១។ កីឡាករទាំង២មានបញ្ហារបួសនៅជើងខាងស្តាំប៉ះពាល់ទៅលើទ្រនាប់ឆ្អឹងនៅជង្គង់ដូចគ្នា។
ដោយឡែកកីឡាករ អ៊ុំ សេរីរ័ត្ន របស់ក្រុមមជ្ឈមណ្ឌលកងយោធពលខេមរភូមិន្ទ ត្រូវវះកាត់របួសជង្គង់របស់ខ្លួន នៅថ្ងៃអង្គារ ទី១៧ ខែសីហា ឆ្នាំ២០២១ នេះ។ រូបគេបានពិភាក្សាជាមួយវេជ្ជបណ្ឌិតរួចរាល់មុនវះកាត់នេះ។ នេះជាលើកទី២ហើយសម្រាប់អ្នកចាំរូបនេះវះកាត់របួសជង្គង់នេះ។
សូមបញ្ជាក់ថាកាលពីសប្ដាហ៍មុនកីឡាករ ចន ចំរើន របស់ភ្នំពេញក្រោន បានវះកាត់របួសសរសៃពួរ ACL (Anterior Cruciate Ligament) ដោយជោគជ័យផងដែរ៕