សិល្បៈជាតិ៖ ក្រោយមានឱកាសបានរួមការងារ និងបានស្គាល់ពីអត្តចរិតពិតរបស់អាយដលលំដាប់ប្រទេសដែលខ្លួនបានគាំទ្រកន្លងមក តារាសម្ដែង នៅ ដាណា បានបង្ហោះសាររៀបរាប់យ៉ាងលម្អិតពីក្ដីរំភើបនិងអារម្មណ៍ចំពោះអ្នកនាង មាស សុខសោភា ដែលទាំងនេះគឺជាទទ្ហីករណ៍យ៉ាងសំខាន់បង្ហាញថាហេតុអ្វីទើប Super Star លំដាប់ប្រទេសរូបនេះអាចរក្សាកៅអីជារាជិនីចម្រៀងលំដាប់ប្រទេសរហូតមកដល់បច្ចុប្បន្ន។
យោងតាមការលើកឡើងរបស់កញ្ញា នៅ ដាណា បានរៀបរាប់កាលពីថ្ងៃទី២៩ ខែកុម្ភៈ ឆ្នាំ២០២៤ កន្លងទៅកញ្ញា បានរៀបរាប់ខ្ទេចខ្ទីឥតមានលាក់លៀមថា៖ My #1 (Number one) idol Meas Soksophea គាត់ពិតជាគួរអោយគោរពនិងស្រលាញ់ណាស់។ និយាយមែន គ្រប់ពេលដែលរួមការងារជាមួយគាត់ ខ្ញុំតែងតែមានអារម្មណ៍រំភើបជានិច្ច អារម្មណ៍នៅពេលដែលគាត់មើលមកខ្ញុំ និយាយជាមួយខ្ញុំ លេងសើចជាមួយខ្ញុំ ខ្ញុំមានអារម្មណ៍ថាដូចជាការយល់សប្តិចឹង ការងារគ្រប់យ៉ាងរបស់ខ្ញុំ ខ្ញុំលះណាស់ តែគ្រាន់តែសុំគាត់ថតប៉ុណ្ណឹង ខ្ញុំភ័យចង់ឡាប់ អង្គុយក្រវេក្រវិលពីរបីជុំទំរាំដាច់ចិត្តសុំគត់ថតព្រោះខ្លាចចិត្តគាត់ ខ្លាចរំខានគាត់ព្រោះគាត់ទើបច្រៀងចប់ តែដល់ពេលបានថតជាមួយគាត់ មើលគាត់ធ្វើឬកចុះ ចឹងៗអីអ្នកណាមិនកាន់តែស្រឡាញ់លោក….!
ការបង្ហោះរបស់កញ្ញា មិនត្រូវបានអ្នកនាង មាស សុខសោភា មើលរំលងនោះឡើយ ដោយអ្នកនាង បានចូលមកថ្លែងអំណរគុណជារូប emoji បេះដូងនិងដៃសំពះ។ ខណៈដែលអ្នកគាំទ្រផ្សេងៗទៀតសុទ្ធតែយល់ស្របនិងទទួលស្គាល់ថា អ្នកនាង មាស សុខសោភា ពិតជាកំពូលតារាដែលមិនចេះប្រកាន់ឬក លេងចរិត ឬមានជំងឺតួឯក ដោយអ្នកនាង តែងតែផ្ដល់ស្នាមញញឹម និងភាពរួសរាយរាក់ទាក់ចំពោះមនុស្សគ្រប់គ្នា មិនថាជាហ្វេនអ្នកគាំទ្រអ្នកនាងឬមិនមែនក្ដី។
បច្ចុប្បន្នកំពូលតារាចម្រៀង មាស សុខសោភា នៅតែរក្សាបាននៅប្រជាប្រិយភាព និងការនិយមគាំទ្រពីសំណាក់អ្នកនិយមចូលចិត្តស្ដាប់ចម្រៀង មិនត្រឹមតែលេចធ្លោលើផ្នែកសិល្បៈនោះឡើយ ហើយអ្នកនាង ក៏សម្បូរសកម្មភាពជួយលើកិច្ចការងារសង្គមច្រើនគួរឱ្យកត់សម្គាល់ផងដែរ៕