សិល្បៈជាតិ៖ ភរិយាឧកញ៉ា ព្រាប សុវត្តិ បានបង្ហោះវីដេអូខ្លីមួយកាលពីថ្ងៃទី២៩ ខែកុម្ភៈ ឆ្នាំ២០២៤ ដោយវីដេអូនោះបានរៀបរាប់ឱ្យដឹងថាកូនប្រុសពៅ គឺ សុវត្ថិ សិរីវុឌ្ឍ កំពុងរៀបចំខ្លួនចេញទៅថតបទចម្រៀងថ្មី។ ក្នុងនោះអ្វីដែលគួរឱ្យចាប់អារម្មណ៍គឺមាននារីជាច្រើនបានប្រាប់ ភរិយាឧកញ៉ា ព្រាប សុវត្ថិ ដោយមិនលាក់លៀមថាខ្លួនលង់ស្នេហ៍កូនប្រុសពៅរបស់កំពូល Super Star លំដាប់ប្រទេសហើយ។
វីដេអូដែលបានបង្ហោះនៅលើទំព័រហ្វេសប៊ុកដែលមានឈ្មោះថា Preapsovath Band បានបង្ហាញឱ្យឃើញពីសកម្មភាពដែលកូនប្រុសពៅ សុវត្ថិ សិរីវុឌ្ឍ និងម្ដាយកំពុងត្រៀមធ្វើដំណើរទៅថតបទចម្រៀងថ្មី ខណៈដែលគេបានដឹងហើយថា បទរបស់បងប្រុស សុវណ្ណ មុនីវណ្ណ សម្ដែងដោយយុវតីល្អហួស កំពុងតែផ្ទុះបាននូវការចាប់អារម្មណ៍ខ្លាំងមែនទែន។
ត្បិតថាកូនប្រុសទាំង៣របស់ឧកញ៉ា ព្រាប សុវត្ថិ ធំពេញរូបពេញរាងក្ដី ប៉ុន្តែគេនៅមិនទាន់ឃើញថាអ្នកកំលោះទាំងបី បណ្ដើរឬបង្ហាញតម្រុយរឿងគូស្នេហ៍បែបបើកចំហរនៅឡើយ ដូច្នេះធ្វើឱ្យនារីៗជាច្រើនដែលតែមានសង្ឃឹមដរាបណាបុរសសង្ហាទាំង៣មិនទាន់មានម្ចាស់បេះដូង។
