ឯកឧត្តមនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានប្រកាសនឹងចូលរួមដេញថ្លៃធ្វើម្ចាស់ផ្ទះការប្រកួតកីឡាបាល់ទាត់ជើងឯកអាស៊ីអាគ្នេយ៍ ឆ្នាំ២០២០ (AFF Suzuki Cup 2020) ដោយស្នើសុំរៀបចំការប្រកួតផ្ទាល់ នៅពហុកីឡដ្ឋានជាតិមរតកតេជោ។
នេះជាការលើកឡើងរបស់ប្រធានសហព័ន្ធ នៅក្នុងសន្និបាតបូកសរុបការងារឆមាសទី១ និងលើកទិសដៅបន្ដការងារឆមាសទី២ ឆ្នាំ២០២១ របស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) នៅព្រឹកថ្ងៃទី១៧ ខែសីហា ឆ្នាំ២០២១។
ឯកឧត្តម សៅ សុខា បញ្ជាក់ថាការស្នើដេញថ្លៃធ្វើម្ចាស់ផ្ទះនេះ ធ្វើឡើងក្នុងគោលបំណងសំខាន់ៗមួយចំនួន ដូចជាដើម្បីអបអរសាទរសមិទ្ធផលដ៏អស្ចារ្យ នៃពហុកីឡដ្ឋានជាតិមរតកតេជោ និងផ្សព្វផ្សាយសំណង់ដ៏មហាសាលទៅលើឆាកអន្ដរជាតិ។ មួយវិញទៀត ក៏ដើម្បីផ្ដល់នូវចំណីចក្ខុដល់ប្រជាពលរដ្ឋក្នុងបរិបទកូវីដ-១៩ ពិសេសបញ្ជាក់ពីការប្រយុទ្ធប្រឆាំងជំងឺកូវីដ ប្រកបដោយប្រសិទ្ធភាពខ្ពស់ ក្រោមការដឹកនាំរបស់រាជរដ្ឋាភិបាលកម្ពុជា ។ ម្យ៉ាងក៏ដើម្បីសាកល្បង និងពង្រឹងសមត្ថភាពកីឡាករត្រៀមការប្រកួតកីឡាស៊ីហ្គេម លើកទី៣១ នៅវៀតណាម និងស៊ីហ្គេម ឆ្នាំ២០២៣ នៅកម្ពុជាផងដែរ។
បើតាមឯកឧត្តមនាយឧត្តមសេនីយ៍ សៅ សុខា បានបន្ថែមថា ប្រសិនបើដេញថ្លៃទទួលបានជោគជ័យ យ៉ាងហោចមានកីឡាករ និងមន្ដ្រីប្រមាណ ៥០០នាក់ ត្រូវស្នាក់នៅកម្ពុជា រយៈពេលជិត ១ខែ ដោយសហព័ន្ធត្រូវរៀបចំសណ្ឋាគារយ៉ាងហោច ៣ ដើម្បីក្រុមជម្រើសជាតិ ដែលត្រូវចូលរួមព្រឹត្តិការណ៍ ២ឆ្នាំម្ដងនេះ។
សម្ដេចពិជ័យសេនា ទៀ បាញ់ ប្រធានគណៈកម្មាធិការជាតិ CAMSOC និងឯកឧត្តមបណ្ឌិត ថោង ខុន អនុប្រធានអចិន្រ្ដៃយ៍និងអង្គសន្និបាតទាំងមូល បានឯកភាព និងជំរុញឲ្យធ្វើការរួមគ្នាក្នុងការរៀបចំការប្រកួត នៅពហុកីឡដ្ឋានជាតិមរតកតេជោ បន្ទាប់ពីកីឡដ្ឋានត្រូវបានប្រគល់ឲ្យគណៈកម្មាធិការជាតិអូឡាំពិកកម្ពុជា គ្រប់គ្រងនាពេលឆាប់ៗខាងមុខ។
ពានរង្វាន់ AFF Suzuki Cup 2020បានពន្យារពេលពីឆ្នាំ២០២០ មកឆ្នាំ២០២១ ដោយសារវិបត្តិកូវីដ-១៩ ដោយគ្រោងចាប់ផ្ដើមការប្រកួតពីថ្ងៃទី០៥ ខែធ្នូ ឆ្នាំ២០២១ ដល់ថ្ងៃទី០១ ខែមករា ឆ្នាំ២០២២។ ប៉ុន្ដែការចាប់ឆ្នោត មិនទាន់រៀបចំនោះទេ ក្រោយសិង្ហបុរី ប្រកាសថាមិនអាចទទួលធ្វើម្ចាស់ផ្ទះការចាប់ឆ្នោតនេះបាន៕
