សិល្បៈជាតិ៖ ថ្លែងនៅក្នុងកម្មវិធីសន្និសីទសារព័ត៌មាន ស្ដីពីព្រឹត្តិការណ៍ប្រកួតបាល់ទាត់មិត្តភាពនិងសប្បុរសធម៌ មូលបទ «មាតាអស្ចារ្យ ដើម្បីស្នាមញញឹមកុមារ» កាលពីថ្ងៃទី១ ខែមីនា ឆ្នាំ២០២៤ លោក ប៉ុន សុណារិន ឬដែលប្រិយមិត្តអ្នកគាំទ្រស្គាល់ថាតារាចម្រៀង ខេម បានធានាអះអាងយ៉ាងមុតមាំនៅចំពោះមុខអ្នកសារព័ត៌មាន ពីតម្លាភាពនៃទឹកប្រាក់គ្រប់កាក់គ្រប់សេន ដែលឧបត្ថម្ភនឹងផ្ដល់ជាប្រយោជន៍ ក៏ដូចជាជួយដល់កុមារកម្ពុជា ដោយមិនបាត់បង់សូម្បីមួយកាក់ឬមួយសេននោះឡើយ។
ប៉ុន្តែលោកក៏បានបញ្ជាក់ដែរថាការលើកឡើងរបស់លោកមិនមានចេតនាវាយប្រហារឬសម្ដៅទៅដល់ភាគីណានោះឡើយ គឺលោកនិយាយនៅក្នុងក្របខណ្ឌក្រុមរបស់លោកប៉ុណ្ណោះ រីឯមានការលើកឡើងថាលោកធ្វើដើម្បីល្បីនោះលោកសូមបដិសេធព្រោះលោកល្បីស្រាប់ហើយ ប៉ុន្តែសកម្មភាពរបស់លោកនេះគឺទាន់ពេលលោកមានឈ្មោះបោះសំឡេង ពួកលោកចង់តបស្នងសងគុណទឹកដីកំណើតដែលពួកលោកបានកើត។
បន្ថែមលើអ្វីដែលខេម បានលើកឡើង លោកគូម៉ា ដែលជាសមាជិកស្នូលនិងសំខាន់មួយរូបនៃក្រុមបាល់ទាត់ទើបបង្កើតថ្មោងថ្មី តែសមត្ថភាពនិងថ្វីជើងមិនធម្មតា បានគូសបញ្ជាក់ដែរថាក្រុមលោកបង្កើតក្រុមបាល់ទាត់នេះឡើងដោយផ្តោតជាសំខាន់ទៅលើគោលដៅចំនួន៤ចំណុចផងដែរ។
បើតាមការបញ្ជាក់ពីក្រុមបាល់ទាត់ Cambodia Football Super Stars មិនទាន់ដល់កាលបរិច្ឆេទប្រកួតផង ទឹកប្រាក់ដែលទទួលបានពីការបរិច្ចាគថវិកាលើគម្រោងមនុស្សធម៌នេះ បានកើនឡើងដល់ជាង ៧០លានរៀលហើយ ដោយគិតត្រឹមថ្ងៃទី១ ខែមីនា ក្នុងនោះទឹកប្រាក់បរិច្ចាគពីសម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន មានចំនួន៥០លានរៀន ព្រមទាំងអ្នកឧបត្ថម្ភជាច្រើនរូបទៀត ខណៈដែលសមាជិកក្រុម Cambodia Football Super stars បានចូលរួមឧបត្ថម្ភចំនួន ៥លានរៀលផងដែរ។
សូមជំរាបជូនថា ព្រឹត្តិការណ៍ប្រកួតាបល់ទាត់មិត្តភាព និងសប្បុរសធម៌រឹតចំណងមិត្តភាពរវាងក្រុមបាល់ទាត់ Cambodia Football Super Stars នឹងថ្នាក់ដឹកនាំរដ្ឋបាលខេត្តកំពង់ស្ពឺនឹងរៀបចំឡើងនៅថ្ងៃទី៦ ខែមីនា ឆ្នាំ២០២៤ ខាងមុខនេះនាកីឡដ្ឋានខេត្តកំពង់ស្ពឺ៕