បើកក្បាលខែមីនា ឆ្នាំ២០២៤ ភ្លាម បុរសសង្ហា សុវត្ថិ មុនីវណ្ណ បានបញ្ចេញបទចម្រៀងថ្មី «នាងអើយ» មកអង្រួនអារម្មណ៍អ្នកគាំទ្រ ជាពិសេសអ្វីដែលធ្វើបទចម្រៀងនេះកាន់ផ្ទុះបាននូវការគាំទ្រ និង អាចទាក់ទាញបេះដូងមហាជនឱ្យចង់ទស្សនាកាន់តែខ្លាំងនោះ ក៏ដោយសារតែក្រុមការងារបានជ្រើសរើសតួឯកស្រីមកសម្ដែងក្នុង MV ជាស្រីស្អាតលំដាប់ប្រទេស យុវតី ល្អហួស មានតំណែងជា Miss Teen ជាតឹកតាងស្រាប់។
បទចម្រៀងថ្មី ស្ថិតនៅក្នុងផលិតកម្ម Galaxy Navatra ត្រូវបានអ្នកទស្សនាមើលឃើញថា ផលិតកម្មបានសម្រិតសម្រាំងគុណភាព ទាំងខ្លឹមសារបទចម្រៀង ចង្វាក់ភ្លេង បច្ចេកទេសថត និងការកាត់ត អាចនិយាយបានថាជាបទចម្រៀងស្ថិតក្នុងកម្រិតស្ដង់ដារមួយ។ លើសពីនេះការគោចរមកសម្ដែងរួមគ្នាជាលើកដំបូងនៅក្នុងបទចម្រៀងថ្មី រវាងបុរសសង្ហា និងស្រីស្អាត កាន់តែធ្វើឱ្យបទចម្រៀងថ្មីរបស់សុវត្ថិ មុនីវណ្ណ ក្ដោបបានដួងចិត្តអ្នកទស្សនាទាំងជាតិ និងអន្តរជាតិ។
បទចម្រៀងថ្មី របស់កូនប្រុសច្បង ឧកញ៉ា ព្រាប សុវត្ថិ មួយនេះ បានជំរុញឱ្យប្រជាប្រិយភាពរបស់គេហក់ឡើងខ្ពស់ហួសពីការស្មាន ជាពិសេសគឺនៅលើបណ្ដាញសង្គម Tiktok ផ្ទាល់តែម្ដង ព្រោះតែបទនេះ កំពុងស្ថិតក្នុង Trend ជាបទចម្រៀងពេញនិយមដែលត្រូវបានក្រុមអ្នកលេង tiktok យកទៅច្រៀង និងយកទៅសម្ដែងត្រាប់តាមយ៉ាងច្រើនរាប់មិនអស់។ ក្រោយពេលចេញបទចម្រៀងនេះរួចធ្វើឱ្យ ម្ចាស់បទ «Don’t Compare» កាន់តែមមាញឹកក្នុងការងារសិល្បៈ មានទាំងការសម្ដែងចម្រៀងតាមកម្មវិធីខនសឺតធំៗទាំងនៅក្នុងរាជធានីភ្នំពេញនិងតាមបណ្ដាខេត្តនានា។ ត្បិតថាមានភាពមមាញឹកច្រើននៅក្នុងសិល្បៈក្ដី ប៉ុន្តែសុវត្ថិ មុនីវណ្ណ បានទម្លាយតម្រុយថាខ្លួននឹងមានត្រៀមបទចម្រៀងគ្រប់ចង្វាក់ដើម្បី អបអរសាទរបុណ្យុចូលឆ្នាំថ្មីប្រពៃណីខ្មែរ ដែលនឹងឈានមកដល់ក្នុងពេលឆាប់ៗនេះផងដែរ។
គួរដឹងថាតារាចម្រៀងយុវវ័យ សុវត្ថិ មុនីវណ្ណ កូនប្រុសច្បងរបស់ឧកញ៉ា ព្រាប សុវត្ថិ តាំងពីឈានជើងចូលជាតារាចម្រៀងប្រចាំផលិតកម្ម Galaxy Navatra មកលោកបានចេញបទចម្រៀងជាច្រើនបទ ហើយសុទ្ធសឹងជាបទកំពុងល្បីនិងពេញនិយមក្នុងស្រទាប់យុវវ័យដូចជា «Don’t Compare» «My Angle» «In The Club» និង «Talk To me»៕
