បន្ទាប់ពីមានការធានាពីលោក ខូវ ឆាយ អនុប្រធានទី១សហព័ន្ធកីឡាប្រដាល់គុនខ្មែរ អ្នកលេងគុនចម្រុះនារីកម្ពុជា នៅ ស្រីពៅ នឹងដាក់ពាក្យលាឈប់ពីការងារនៅរោងកុនមួយកន្លែង ដើម្បី ចូលអាជីពប្រដាល់វិញ។
កាលពីថ្ងៃទី៤ ខែកុម្ភៈ ឆ្នាំ២០២៤ កន្លងទៅ លោក ខូវ ឆាយ អនុប្រធានទី១សហព័ន្ធកីឡាប្រដាល់គុនខ្មែរ បានធានាថានឹងរៀបចំឱ្យកីឡាការនី នៅ ស្រីពៅ បានឱកាសឡើងប្រកួតទៀងទាត់ ប្រសិនបើកីឡាការិនីរូបនេះវិលត្រឡប់ចូលសង្វៀនវិញ។
លោកអនុប្រធានគុនខ្មែរលើកឡើងដូចនេះថា ៖«ខ្ញុំគាំទ្រឱ្យ ស្រីពៅ ត្រឡប់មកហ្វឹកហាត់ និងឡើងសង្វៀនប្រកួតវិញ ហើយខ្ញុំធានាថា នឹងសម្របសម្រួលក្នុងការចាប់គូឱ្យស្រីពៅ បានឡើងប្រកួតទៀងទាត់។
សូមជម្រាប់ថា កីឡាការនី នៅ ស្រីពៅ ជាអតីតកម្មការិនីរោងចក្រកាត់ដេរម្នាក់ ដែលមានជំនាញប្រដាល់សកល គុនខ្មែរ Kickboxing និងគុនចម្រុះ គ្រានោះនាងផ្ទុះល្បីខ្លាំងនៅពេលប្រកួត Lethwei នៅប្រទេសមីយ៉ាន់ម៉ាចន្លោះឆ្នាំ២០១៧-២០១៨ នៅប្រទេសមីយ៉ាន់ម៉ា ដោយបានប្រកួត២ដងគឺឈ្នះទាំង២ដង។
កីឡាការនី នៅ ស្រីពៅ ក៏ជាម្ចាស់ខ្សែក្រវាត់គុនខ្មែរ អន្តរជាតិ Kun Khmer World Champion ឈ្នះមេដាយមាស ប្រដាល់សកលថ្នាក់ជាតិ និងឈ្នះមេដាយសំរិទ្ធស៊ីហ្គេម។
កញ្ញាធ្លាប់ឈ្នះបានមេដាយសំរឹទ្ធ ពីព្រឹត្តិការណ៍កីឡាស៊ីហ្គេម ឆ្នាំ២០១៩ នៅប្រទេសហ្វីលីពីន និងបានចេញទៅប្រកួតនៅក្រៅប្រទេសជាច្រើន ដូចជានៅប្រទេសវៀតណាមក្នុងឆ្នាំ២០១៨ នៅប្រទេស ថៃ មីយ៉ាន់ម៉ា ឥណ្ឌូណេស៊ី និងហ្វឹកហាត់នៅប្រទេសជប៉ុន ទៀតផង។
គួររំលឹកថា នៅ ស្រីពៅ មានកំណត់ត្រាប្រកួតបានចំនួន ១០០ ដងក្នុងការប្រកួតលើសង្វៀនប្រដាល់គុនខ្មែរ សកល និង គុនចម្រុះ។ ប៉ុន្តែបើនិយាយអំពីការចេញទៅប្រកួតជាលក្ខណៈអន្តរជាតិមិនមែនស៊ីហ្គេម រូបគេប្រកួតបានចំនួន ៤ដង ក្នុងនោះឈ្នះ ៣ ដង និងចាញ់ ១ ដង។ នៅ ស្រីពៅ ជាកីឡាការិនី មានទេពកោសល្យម្នាក់ក្នុងទម្ងន់ ៥៣ គីឡូក្រាម ហើយអាចប្រកួតបានទាំងប្រដាល់គុនខ្មែរ វ៉ៃសកល និង វ៉ៃគុនចម្រុះ។
កីឡាការិនី នៅ ស្រីពៅ បានចូលរោងជ័យការជាមួយកីឡាករ សុខ រិទ្ធ កាលពីខែមករា ឆ្នាំ២០២៤ កន្លងទៅថ្មីៗនេះ៕
