ក្លិបបាល់ទាត់វិសាខា ម្ចាស់ជើងឯកពានរង្វាន់បាល់ទាត់សម្តេចតេជោ ហ៊ុន សែន ៣សម័យកាល បានប្រកាសដកខ្លួនចេញពីគ្រប់ពានរង្វាន់ដែលខ្លួននៅសេសសល់ ក្នុងរដូវកាលឆ្នាំ២០២៣-២៤ នេះ ពោលគឺគ្រប់ពានរង្វាន់ដែលរៀបចំឡើងដោយក្រុមហ៊ុន Cambodian Premier League (លីគទី១ និងលីគទី២) និងពានរង្វាន់សម្តេចតេជោ ហ៊ុន សែន។
ការប្រកាសនេះធ្វើឡើងជាប់ៗគ្នានៅល្ងាចថ្ងៃទី៨ ខែមីនា ឆ្នាំ២០២៤ នៅលើបណ្ដាញសង្គមផ្លូវការរបស់ក្លិប ស្របពេលដែលក្លិបត្រូវកំពុងស្ថិតនៅក្នុងបញ្ជី Top4 នៃពានរង្វាន់លីគកំពូល និង ឡើងដល់វគ្គពាក់កណ្តាលផ្ដាច់ព្រ័ត្រពានរង្វាន់សម្តេចតេជោ ហ៊ុន សែន។ តែយ៉ាងណាគេមិនបានដឹងពីមូលហេតុជាក់លាក់នៃការដកខ្លួនរបស់ក្លិបវិសាខា នេះនោះទេ។
ប្រសិនបើក្លិបបាល់ទាត់វិសាខា ដកខ្លួននេះមិនត្រឹមជាអស់បេក្ខភាពក្នុងបានរង្វាន់លីគកំពូល និងពានរង្វាន់សម្តេចតេជោ នោះទេ ពោលគឺបាត់បង់ក្លិបឈុត«ខ» ដែលកំពុងតែប្រកួតក្នុងពានរង្វាន់លីគទី២ ថែមទៀតផង។
ក្លិបបាល់ទាត់វិសាខា បានឡើងមកលេងលីគកំពូលកម្ពុជា នៅរដូវកាលឆ្នាំ២០១៨ ក្រោយឈ្នះជើងឯកលីគទី២ នៅរដូវកាលឆ្នាំ២០១៧។ ក្នុងរដូវកាលដំបូងក្នុងលីគកំពូលកម្ពុជា ក្លិបមួយនេះបានខ្ចីកីឡដ្ឋានក្លិបវេស្ទើន ធ្វើជាទឹកដីខ្លួនបណ្ដោះអាសន្ន ស្របពេលខ្លួនបានកសាងកីឡដ្ឋានស្តង់ដារ នៅម្តុំហ្រ្គេនភ្នំពេញ ហើយក្រោយសាងសង់រួចរាល់ ក្លិបបានដាក់ឈ្មោះថាកីឡដ្ឋានព្រីនស៍។
កីឡដ្ឋានព្រីនស៍ ធ្លាប់ទទួលសិទ្ធិធ្វើជាម្ចាស់ផ្ទះការប្រកួតថ្នាក់ជាតិនិងអន្តរជាតិជាច្រើន ជាពិសេសជាទីតាំងសំខាន់មួយក្នុងបេសកកម្មរបស់កម្ពុជា ទទួលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមឆ្នាំ២០២៣ កន្លងទៅថែមទៀតផង។
ក្រុមថ្មីថ្មោងមួយនេះធ្លាប់ឈរជាក្រុមជើងឯករងពានរង្វាន់លីគកំពូលកម្ពុជា ២សម័យកាលគឺនៅឆ្នាំ២០១៩ និង២០២២ ខណៈជាក្រុមឈ្នះជើងឯកពានរង្វាន់សម្តេចតេជោ ហ៊ុន សែន ៣សម័យកាលជាប់ៗគ្នាគឺនៅឆ្នាំ២០២០, ២០២១, ២០២២ ព្រមទាំងធ្លាប់រងជើងឯកពានរង្វាន់ Cambodian Super Cup នៅឆ្នាំ២០២២ និង ២០២៣ និងរងជើងឯកពានរង្វាន់ Cambodian League Cup ឆ្នាំ២០២២ ទៀតផង។
ក្រុមវិសាខា ធ្លាប់តំណាងឱ្យកម្ពុជា ចូលប្រកួតពានរង្វាន់ទ្វីបអាស៊ី AFC Cup នៅឆ្នាំ២០២២ កន្លងទៅ តែនៅឆ្នាំ២០២១ ក្លិបនេះក៏ជាបេក្ខភាពដែរ ត្រូវបានសហព័ន្ធបាល់ទាត់អាស៊ី រំសាយដោយសារតែស្ថានភាពរីករាលដាលនៃជំងឺកូវីដ-១៩។
ក្លិបវិសាខា បានបណ្តុះយុវជនគ្រប់កម្រិត និងក្រុមនារី ថែមទៀត ខណៈបច្ចុប្បន្ននេះក្លិបហៀបនឹងសាងសង់មជ្ឍមណ្ឌល Visakha Dream រួចរាល់នៅម្តុំកប់ស្រូវ៕