នៅព្រឹកថ្ងៃចន្ទ ទី១១ ខែមីនា ឆ្នាំ២០២៤ សហព័ន្ធកីឡាបាល់ទាត់កម្ពុជា បានប្រកាសថានៅម៉ោង ៣:៣០រសៀល នឹងរៀបចំសន្និសីទសារព័ត៌មាន ស្តីពីការពន្យល់បកស្រាយអំពីការកាត់ សេចក្តីរបស់អជ្ញាកណ្តាលក្នុង ការប្រកួតរបស់ពានសម្តេច និងការប្រកួតលីគកំពូលកម្ពុជា។
មូលហេតុសហព័ន្ធកីឡាបាល់ទាត់កម្ពុជា រៀបចំសន្និសីទសារព័ត៌មានខាងលើ គឺដោយសារកាលពីថ្ងៃសុក្រ ទី៨ ខែមីនា ឆ្នាំ២០២៤ ក្លិបបាល់ទាត់វិសាខា បានប្រកាសដកខ្លួនចេញពីគ្រប់ពានរង្វាន់ដែលខ្លួននៅសេសសល់ ក្នុងរដូវកាល ឆ្នាំ២០២៣-២៤ នេះ ពោលគឺគ្រប់ពានរង្វាន់ដែលរៀបចំឡើងដោយក្រុមហ៊ុន Cambodian Premier League (លីគទី១ និងលីគទី២) និងពានរង្វាន់សម្តេចតេជោ ហ៊ុន សែន។
ស្របពេលក្រុមហ៊ុន CPL ក៏បានចេញសេចក្តីជូនដំណឹង ជុំវិញការប្រកួតរបស់វិសាខា៖
– វិសាខា ប្រកួតជាមួយ ព្រះខ័នរាជ ស្វាយរៀង ហ្វូតបល ក្លិប ឯ.ក នៅលីគកំពូលកម្ពុជា ឆ្នាំ២០២៣-២០២៤ សប្តាហ៍ទី២៤ នៅថ្ងៃអាទិត្យ ទី១០ ខែមីនា គឺមិនមានការប្រកួតនោះទេ។
– សៀមរាប អេហ្វសុី ប្រកួតជាមួយ វិសាខា (ខ) នៅលីគ២ ឆ្នាំ២០២៣-២០២៤ សប្តាហ៍ទី២០ នៅថ្ងៃសៅរ៍ ទី៩ ខែមីនា គឺមិនមានការប្រកួតនោះទេ។
ខណ:អតីតខ្សែការពារបឹងកេត Taher Jahanbakhsh សំណូមពរឱ្យអ្នកគាំទ្រលើកទឹកចិត្តក្លិបបាល់ទាត់វិសាខា ដើម្បីវិលត្រលប់មកប្រកួតប្រជែងនៅលីគកំពូលកម្ពុជាវិញ ដោយសារវិសាខា គឺជាក្លិបដ៏អស្ចារ្យ ធ្វើឱ្យលីគកំពូលកម្ពុជា កាន់តែមានភាពទាក់ទាញ។
ដោយឡែកឯកឧត្តម ខូវ ឆាយ អគ្គលេខាធិការក្លិបបាល់ទាត់ Tiffy Army FC ក៏បានបង្ហាញភាពសោកស្តាយ និងសង្ឃឹមថាបញ្ហានឹងដោះស្រាយបាន ហើយក្លិបវិសាខា នឹងវិលត្រលប់មកចូលរួមនៅលីគកំពូលកម្ពុជាវិញ។
លោក Akihiro Kato ប្រធានក្លិបអង្គរថាយហ្គឺរ ស្នើសុំឲ្យមានការកែសម្រួលរឿងអាជ្ញាកណ្ដាល កាត់ក្តីឲ្យសុក្រឹត និងយុត្តិធម៌ជាងមុន។
លោក ស៊ីថូ ណាថាន់ ពិធីការបាល់ទាត់ដ៏ល្បីនៅកម្ពុជា ថ្លែងថា៖«ខ្ញុំសូមក្លិបវិសាខា វិលមកប្រកួតវិញដោយក្តីគោរព»។
ក្លិបបាល់ទាត់វិសាខា បានឡើងមកលេងលីគកំពូលកម្ពុជា នៅរដូវកាលឆ្នាំ២០១៨ ក្រោយឈ្នះជើងឯកលីគទី២ នៅរដូវកាលឆ្នាំ២០១៧។ ក្នុងរដូវកាលដំបូងក្នុងលីគកំពូលកម្ពុជា ក្លិបមួយនេះបានខ្ចីកីឡដ្ឋានក្លិបវេស្ទើន ធ្វើជាទឹកដីខ្លួនបណ្ដោះអាសន្ន ស្របពេលខ្លួនបានកសាងកីឡដ្ឋានស្តង់ដារ នៅម្តុំហ្រ្គេនភ្នំពេញ ហើយក្រោយសាងសង់រួចរាល់ ក្លិបបានដាក់ឈ្មោះថាកីឡដ្ឋានព្រីនស៍។
កីឡដ្ឋានព្រីនស៍ ធ្លាប់ទទួលសិទ្ធិធ្វើជាម្ចាស់ផ្ទះការប្រកួតថ្នាក់ជាតិនិងអន្តរជាតិជាច្រើន ជាពិសេសជាទីតាំងសំខាន់មួយក្នុងបេសកកម្មរបស់កម្ពុជា ទទួលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមឆ្នាំ២០២៣ កន្លងទៅថែមទៀតផង។
ក្រុមថ្មីថ្មោងមួយនេះធ្លាប់ឈរជាក្រុមជើងឯករងពានរង្វាន់លីគកំពូលកម្ពុជា ២សម័យកាលគឺនៅឆ្នាំ២០១៩ និង២០២២ ខណៈជាក្រុមឈ្នះជើងឯកពានរង្វាន់សម្តេចតេជោ ហ៊ុន សែន ៣សម័យកាលជាប់ៗគ្នាគឺនៅឆ្នាំ២០២០, ២០២១, ២០២២ ព្រមទាំងធ្លាប់រងជើងឯកពានរង្វាន់ Cambodian Super Cup នៅឆ្នាំ២០២២ និង ២០២៣ និងរងជើងឯកពានរង្វាន់ Cambodian League Cup ឆ្នាំ២០២២ ទៀតផង។
ក្រុមវិសាខា ធ្លាប់តំណាងឱ្យកម្ពុជា ចូលប្រកួតពានរង្វាន់ទ្វីបអាស៊ី AFC Cup នៅឆ្នាំ២០២២ កន្លងទៅ តែនៅឆ្នាំ២០២១ ក្លិបនេះក៏ជាបេក្ខភាពដែរ ត្រូវបានសហព័ន្ធបាល់ទាត់អាស៊ី រំសាយដោយសារតែស្ថានភាពរីករាលដាលនៃជំងឺកូវីដ-១៩។
ក្លិបវិសាខា បានបណ្តុះយុវជនគ្រប់កម្រិត និងក្រុមនារី ថែមទៀត ខណៈបច្ចុប្បន្ននេះក្លិបហៀបនឹងសាងសង់មជ្ឍមណ្ឌល Visakha Dream រួចរាល់នៅម្តុំកប់ស្រូវ៕