សិល្បៈជាតិ៖ Influencer ល្បីឈ្មោះ ដែលនិយមផលិតមាតិកាវីដេអូបែបដើរកម្សាន្ត កញ្ញា ពេជ្រ ពិសី បានបង្ហោះវីដេអូមួយសន្លឹកជាមួយគូស្នេហ៍របស់ខ្លួននៅអាកាសយានដ្ឋានអន្តរជាតិ ប៉ុន្តែអ្នកគាំទ្រជាច្រើនបានបង្ហាញពីក្ដីព្រួយបារម្ភ ចំពោះសុខ សុវត្ថិភាពរបស់កញ្ញា និងគូស្នេហ៍ ព្រោះតែប្រទេសឥណ្ឌា កំពុងផ្ទុះករណីរំលោភលើស្ត្រីភេទជាច្រើនករណី។
កាលពីថ្ងៃទី១១ ខែមីនា ឆ្នាំ២០២៤ ទំព័រហ្វេសប៊ុករបស់កញ្ញា ពេជ្រ ពិសី បានបង្ហោះរូបភាពមួយសន្លឹកព្រមទាំងភ្ជាប់ដោយសំណេរ «ឥណ្ឌា ខលហៅ»។ យ៉ាងណាមិញអ្នកគាំទ្រជាច្រើនបានជូនពរឱ្យកញ្ញាធ្វើដំណើរប្រកបដោយក្ដីសុខសប្បាយ តែក្នុងនោះក៏មានអ្នកគាំទ្រ និងសាធារណៈបានបង្ហាញក្ដីបារម្ភចំពោះសុខសុវត្ថិភាពរបស់អ្នកទាំងពីរព្រោះថ្មីៗទើបតែមានដំណឹងថាស្ត្រីអេស្ប៉ាញ ដែលនិយមធ្វើដំណើរត្រាច់ចរតាមម៉ូតូជាមួយស្វាមីត្រូវបានបុរសឥណ្ឌាចំនួន៧នាក់ បុកចូលក្នុងតង់រំលោភបំពាន។ អ្វីដែលមហាជន ព្រួយបារម្ភខ្លាំងនោះដោយសារតែ កំណើនករណីរំលោភបំពានលើស្ត្រីភេទកាន់តែមើលទៅមានចំនួនកើនឡើងខ្លាំង មិនថាលើស្ត្រីជាអ្នកទេសចរណ៍បរទេស
ឬស្ត្រីជនជាតិឥណ្ឌានោះឡើយ។
យ៉ាងណាមិញសាមីខ្លួន កញ្ញា ពេជ្រ ពិសី បានថ្លែងអំណរគុណចំពោះទឹកចិត្តស្រលាញ់និងបារម្ភដែលអ្នកគាំទ្រមានចំពោះខ្លួន តែកញ្ញា ក៏បានប្រាប់ឱ្យដឹងដែរថាកញ្ញាបានត្រៀមលក្ខណៈសម្បត្តិរួចរាល់ ក៏ដូចជាទៅតែតំបន់ទីប្រជុំជន ឬកន្លែងដែលមានសុវត្ថិភាព មិនទៅតំបន់ណាដែលស្ងាត់ ឬក៏អសុវត្ថិភាពនោះឡើយ៕
