ឆ្លើយទៅកាន់អ្នកសារព័ត៌មាននៅក្នុងសន្និសីទសារព័ត៌មាន ស្ដីពី ស្ថានភាពសេដ្ឋកិច្ច និងអចលនទ្រព្យកាលពីថ្ងៃទី ១១ ខែមីនា ឆ្នាំ ២០២៤ លោកឧកញ៉ា តែ តាំងប៉ និងលោកបណ្ឌិត គី សិរីវឌ្ឍន៍ លើកឡើងស្រដៀងគ្នាថា ផលិតផលខ្មែរ ដែលផលិតដោយសហគ្រាសធន់តូច និងមធ្យមភាគច្រើនមិនអាចដាក់លក់នៅក្នុងផ្សារទំនើប ឬម៉ាតបានទេ ព្រោះសហគ្រាសទាំងនោះស្ថិតនៅក្រៅប្រព័ន្ធ ពោលគឺមិនបានចុះបញ្ជីពាណិជ្ជកម្ម បញ្ជីពន្ធ និងបញ្ជីផលិតផល ព្រមទាំងលក្ខន្តិកៈផ្សេងទៀត។
លោកឧកញ៉ា តែ តាំងប៉ ថា មូលហេតុដែលអាជីវកម្មទាំងនោះមិនព្រមចុះបញ្ជិកាចូលទៅក្នុងប្រព័ន្ធធុរកិច្ច ឬមិនព្រមចុះបញ្ជីផលិតផលរបស់ខ្លួន ក៏ព្រោះតែទទួលបានកម្រៃចំណេញតិចពេក ឬមិនចំណេញតែម្ដង ខណៈផលិតផលបរទេសក៏មានដាក់លក់ច្រើនលើសលប់។ លោកឧកញ៉ាពន្យល់ថា « ខណៈប្រទេសយើងមានសន្តិភាពពេញបរិបូណ៌ និងការអភិវឌ្ឍន៍ យើងក៏ចូលទៅក្នុងសមាហរណកម្មអាស៊ានទាំងយើងត្រៀមខ្លួនមិនទាន់រួចរាល់ ដូច្នេះលំហូរនៃវិនិយោគិន ដែលរកស៊ីលើវិស័យនាំចេញនាំចូលទំនិញ ផ្សារទំនើប និងម៉ាត បានហូរចូលមកក្នុងប្រទេសយើងយ៉ាងច្រើន ដែលវាជាឱកាសក្នុងការជញ្ជូនផលិតផលស្រុកគេចូលមកក្នុងស្រុកយើង » ។
ចំណែកលោកបណ្ឌិត គី សិរីវឌ្ឍន៍ ពន្យល់ថា មូលហេតុដែលនាំឲ្យសហគ្រាសធន់តូច និងមធ្យមមិនព្រមចុះបញ្ជិកា ដោយសារចំណេញតិចពេក។ «ចំណេញតិចក៏ព្រោះថ្លៃដើមនៃការផលិតខ្ពស់ វត្ថុធាតុដើម និងរូបមន្តនាំចូលពីបរទេស គុណភាពអន់ ខ្វះអ្នកបច្ចេកទេស និងស្ថាប័នដើម្បីជួយគាំទ្រផ្នែកបច្ចេកទេស។ បញ្ហាទាំងអស់នេះហើយ ដែលធ្វើឲ្យសហគ្រាសធន់តូច និងមធ្យមដែលមានដើមទុនល្មមៗ ផុតពីសមត្ថភាព និងគ្មានលទ្ធភាពទប់ទល់បាន ហើយក៏សម្រេចចិត្តមិនចុះបញ្ជិកា »។
សូមបញ្ជាក់ថា លោកឧកញ៉ា តែ តាំងប៉ ជាប្រធានសម្ព័ន្ធសមាគមសហគ្រាសធន់តូច និងមធ្យមកម្ពុជា។ ចំណែកលោកបណ្ឌិត គី សិរិវឌ្ឍន៍ គឺជាអ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា។
ទោះជាយ៉ាងណា អ្នកជំនាញសេដ្ឋកិច្ចទាំងពីរ លើកឡើងស្របគ្នាថា បើតាមទ្រឹស្ដីពាណិជ្ជកម្ម យើងមិនអាចហាមឃាត់ការហូរចូលទំនិញពីបរទេសបានទេ ដើម្បីទប់នឹងបញ្ហាហូរចូលទំនិញពីបរទេសនេះ យើងមានតែពង្រឹងសមត្ថភាពខ្លួន និងខិតខំប្រឹងប្រែងផលិតឲ្យច្រើន ហើយផលិតផលត្រូវតែមានបទដ្ឋានគុណភាព និងតម្លៃសមរម្យ។ ជាមួយគ្នានេះ បណ្ដាស្ថាប័ន និងអ្នកពាក់ព័ន្ធទាំងអស់ត្រូវជួយគាំទ្រ លើកស្ទួយផលិតផលជាតិ ប្រកបដោយស្មារតីជាតិនិយម។
អត្ថបទ៖ ឈិន ធារ៉ាត់
