បើយោងតាមការផ្សាយរបស់ Sweeper បានបញ្ជាក់ថាកោះ Nauru ដែលស្ថិតនៅកណ្តាលមហាសមុទ្រប៉ាស៊ីហ្វិក ទើបតែទទួលបានសិទ្ធពីសហព័ន្ធកីឡាបាល់ទាត់អន្តរជាតិ (FIFA) បង្កើតជាសហព័ន្ធប្រចាំកោះជាផ្លូវការ ខណៈដែលផែនការនឹងយកគ្រូបង្វឹកម្នាក់ធ្លាប់ដឹកនាំក្រុមនៅលីគទី២របស់កម្ពុជា (Cambodian League 2)។
បើតាមប្រភពខាងលើបញ្ជាក់ថាប្រទេសមួយក្នុងចំណោម២ នៅលើផែនដីនេះ មិនដែលធ្លាប់បានប្រកួតលើឆាកអន្តរជាតិនៅឡើយនោះទេ ដោយក្នុងនោះមានកោះ Marshall និងកោះ Nauruផ្ទាល់តែម្តង។ សហព័ន្ធកីឡាបាល់ទាត់កោះ Nauru សង្ឃឹមថានឹងចាប់ផ្តើមវិស័យបាល់ទាត់ ជាមួយនឹងការតែងតាំងគ្រូបង្វឹកជនជាតិអង់គ្លេស Darren Pomroy។
លោក Darren Pomroy ធ្លាប់បានចាប់អាជីពនៅប្រទេសកម្ពុជា ជាច្រើនឆ្នាំមកហើយ ដោយលោកបានបង្កើតក្រុមបាល់ទាត់ Next Step (ប្តូរឈ្មោះជា Angkor City) សមាជិកពានរង្វាន់លីគទី២របស់កម្ពុជា។ ប៉ុន្តែនៅថ្ងៃទី២០ ខែកុម្ភៈ ថ្មីៗនេះ ក្លិបអង្គរស៊ីធី បានប្រកាសពីការដកសិទ្ធិចេញពីពានរង្វាន់លីគទី២រដូវកាល២០២៣-២៤ នេះ ដោយសារវិបត្តិហិរញ្ញវត្ថុ។
ជាមួយគ្នាក្លិបអង្គរស៊ីធីត្រូវពិន័យមិនអោយប្រកួតរយៈពេល១ឆ្នាំ, ពិន័យទឹកប្រាក់១ពាន់ដុល្លារអាមេរិក និងពិន័យលោក Darren Pomroy ដែលជាគ្រូបង្វឹករយៈពេល១ឆ្នាំ ដែរ។ គ្រានោះក្លិបក៏បានបញ្ជាក់ពីការប្តឹងឧទ្ធរណ៍ ចំពោះការសម្រេចរបស់សហព័ន្ធកីឡាបាល់ទាត់កម្ពុជា និង Cambodian Premier League ខាងលើនេះ។
បើតាមប្រភពមកពីសហព័ន្ធកីឡាបាល់ទាត់ Nauru ថាលោក Darren Pomroy នឹងធ្វើដំណើរទៅដល់កោះរបស់ខ្លួនក្នុងពេលឆាប់ៗ ដើម្បីរៀបចំក្រុម បើទោះជានៅលើកោះនេះគ្មានកីឡាករសូម្បី១នាក់ក្ដី។ ក្នុងផែនការក្រុមកោះ Nauru ត្រៀមណាត់ក្រុម American Samoa ប្រកួតមិត្តភាពអន្តរជាតិជាលើកដំបូងក្នុងប្រវត្តិសាស្រ្តរបស់ខ្លួននៅអំឡុងខែសីហា ឆ្នាំ២០២៤ ខាងមុខនៅទឹកដីAmerican Samoa។
ក្នុងពេលចុះឈ្មោះស្នើសុំពី FIFA កោះNauru ស្ថិតនៅក្រោយសហព័ន្ធកីឡាបាល់ទាត់ទ្វីបអូសេអានី។ កោះនេះមានផ្ទៃដី២១គីឡូម៉ែត្រការ៉េ ដោយមានប្រជាជនរស់នៅប្រមាណជាង១ម៉ឺននាក់។ កោះ Nauru ទទួលបានឯករាជ្យពីបក្សសម្ព័ន្ធ United Nations trust territories ដែលមានចក្រភពអង់គ្លេស,អូស្ត្រាលី និងនូវែលហ្សេឡង់ ជាសម្ព័ន្ធមិត្ត ក្នុងថ្ងៃទី៣១ ខែមករា ឆ្នាំ១៩៦៨៕
