ឯកឧត្តម ខូវ ឆាយ អគ្គលេខាធិការ Tiffy Army FC បានផ្តល់កិច្ចសម្ភាសន៍ ដល់អ្នកសារព័ត៌មានក្រោយចប់កម្មវិធីមហាសន្និបាតបូកសរុបលទ្ធផលការងារ ឆ្នាំ២០២៣ និងលើកទិសដៅការងារ ឆ្នាំ២០២៤ ដែលរៀបចំដោយសហព័ន្ធកីឡាបាល់ទាត់កម្ពុជា កាលពីថ្ងៃទី១៣ ខែមីនា ឆ្នាំ២០២៤ កន្លងទៅ ថាលោកគាំទ្រចំពោះផែនការប្រើប្រាស់ VAR នៅលីគកំពូលកម្ពុជា ប៉ុន្តែបើយកលុយនោះទៅអភិវឌ្ឍយុវជន ឬក្លិបវិញល្អជាង។
ឯកឧត្តម ខូវ ឆាយ បានលើកឡើងបែបនេះ ក្រោយ ឯកឧត្តម ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា បានថ្លែងថាកំពុងពិចារណាប្រើប្រាស់ Video Assistant Referees (VAR) វីដេអូជំនួយអាជ្ញាកណ្ដាល នៅលីគកំពូលកម្ពុជា Cambodian Premier League និងពានរង្វាន់នាៗ។
មូលហេតុសហព័ន្ធកីឡាបាល់ទាត់កម្ពុជា ពិចារណាប្រើប្រាស់ Video Assistant Referees (VAR) វីដេអូជំនួយអាជ្ញាកណ្ដាល គឺដោយសារការកាត់ក្តីរបស់លោកអាជ្ញាកណ្តាល នៅលីគកំពូលកម្ពុជា និងពានរង្វាន់ សម្តេចអគ្គមហាសេនាបតីតេជោ ហ៊ុន សែន លើកទី១៧ ឆ្នាំ២០២៣-២០២៤នេះ តែងតែមានបញ្ហាពីមួយប្រកួតទៅមួយប្រកួត ធ្វើឲ្យថ្នាក់ដឹកនាំក្លិបនីមួយៗ កីឡាករ និងអ្នកគាំទ្រ មិនសប្បាយចិត្ត។
បញ្ហាខាងលើបានធ្វើឲ្យក្លិបបាល់ទាត់វិសាខា ម្ចាស់ជើងឯកពានរង្វាន់បាល់ទាត់សម្តេចតេជោ ហ៊ុន សែន ៣សម័យកាល បានប្រកាសដកខ្លួនចេញពីគ្រប់ពានរង្វាន់ដែលខ្លួននៅសេសសល់ ក្នុងរដូវកាលឆ្នាំ២០២៣-២៤ នេះ ពោលគឺគ្រប់ពានរង្វាន់ដែលរៀបចំឡើងដោយក្រុមហ៊ុន Cambodian Premier League (លីគទី១ និងលីគទី២) និងពានរង្វាន់សម្តេចតេជោ ហ៊ុន សែន កាលពីថ្ងៃទី៨ ខែមីនា ឆ្នាំ២០២៤។
ស្របពេលជាមួយគ្នានោះ ឯកឧត្តម ខូវ ឆាយ អគ្គលេខាធិការ Tiffy Army FC គាំទ្រចំពោះផែនការប្រើប្រាស់ VAR នៅលីគកំពូលកម្ពុជា។ ប៉ុន្តែលោកថា VAR មានតម្លៃថ្លៃ និងចំណាយច្រើនណាស់ បើសិនយើងយកលុយនោះទៅអភិវឌ្ឍថ្នាលយុវជន ឬក្លិប វិញល្អជាង ព្រោះការដាក់ VAR គឺដើរលើសពីសមត្ថភាពរបស់យើង។
ឯកឧត្តម ខូវ ឆាយ អគ្គលេខាធិការ Tiffy Army FC បានបន្តទៀតថាតែបើសិនមានប្រទេសណាផ្តល់ជំនួយជាថវិកា ឬឧបរណ៍ប្រើប្រាស់ ចាំយើងដាក់ VAR វិញល្អជាង៕
ចុះប្រិយមិត្តយល់យ៉ាងណាដែលសម្រាប់គម្រោងថ្មីរបស់សហព័ន្ធបាល់ទាត់កម្ពុជា ដែលថានឹងពិចារណាក្នុងការប្រើប្រាស់ VAR នៅកម្ពុជា?
