សិល្បៈជាតិ៖ រឿងរ៉ាវដែលកំពុងតែផ្ទុះនូវការជជែកវែកញែកគ្នាពេញបណ្ដាញសង្គម ដោយមានទាំងអ្នករិះគន់ និងអ្នកលើកឡើងថាហូបអ្វីជាសិទ្ធិរបស់គេព្រោះជាលុយគេ និងមាត់គេ ដោយក្នុងចំណោមនោះតារាចម្រៀងមេម៉ាយកូនមួយអ្នកនាង ពេជ្រ សូលីកា ក៏ស្ថិតក្នុងចំណោមអ្នកមិនគាំទ្រឱ្យទទួលសាច់ឆ្កែ ដោយបានចេញមកប្រកាសជាសាធារណៈនៅលើបណ្ដាញទំនាក់ទំនងសង្គមហ្វេសប៊ុករបស់ខ្លួនផងដែរ។
នៅថ្ងៃទី១៣ ខែមីនា ខណៈដែលរឿងរ៉ាវចម្រូងចម្រាសពាក់ព័ន្ធនឹងករណីហូចសាច់ពិសេស (សាច់ឆ្កែ) កំពុងត្រូវបានអ្នកស្រលាញ់សត្វ ពិសេសអ្នកស្រលាញ់សុនខ ផ្ទាល់ ក្រោយនារីជាអ្នកបកប្រែភាសាកូរ៉េមួយរូបបានបង្ហោះវីដេអូញ៉ាំសាច់ឆ្កែហើយត្រូវបានគេជេរដៀល រួចកញ្ញាចេញមកប្រតិកម្មតបតវិញ ដោយលើកឡើងថាគ្រួសារកញ្ញាញ៉ាំតាំងពីដើម។ល។
ដោយសារតែរឿងនេះគឺជារឿងដែលកំពុងត្រូវបានមហាជនផ្ដោតការចាប់អារម្មណ៍ជាពិសេសផងនោះ គេឃើញអ្នកនាង ពេជ្រ សូលីកា បានចេញមកបង្ហាញគោលជំហរ ទាក់ទងនឹងរឿងនេះដែរថា៖ «មានលុយចង់ហូបអីក៏ហូបចុះបើឃ្លានហូបណាស់ ហូបស្ងាត់ៗទៅ ប្រកាច់ផុសធ្វើអី? ហើយបើជៀសបានជៀសទៅ» មានទាំងភ្ជាប់ជាមួយនឹងរូបថត សុនខ ដាក់ថាកុំហូបខ្ញុំអី និងពាក្យស្លោក «ចូលរួមលុបបំបាត់ការបរិភោគសាច់សុនខ និងការជួញដូរ»។
មែនទែនទៅការជ្រើសរើសទទួលទានអ្វីមួយនោះគឺជាសិទ្ធិរបស់បុគ្គល ប៉ុន្តែការដែលបុគ្គលចេញមកបង្ហោះជាសាធារណៈ ហើយការបង្ហោះនោះវាធ្វើឱ្យប៉ះពាល់ដល់សតិអារម្មណ៍គេនោះ ប្រាកដណាស់បុគ្គលខ្លួនឯងអាចនឹងគេចមិនផុតពីពាក្យដៀលត្មេះនិងរិះគន់នោះឡើយ ដូច្នេះមុនបង្ហោះ ឬធ្វើអ្វីមួយតោងគិតគូរឱ្យបានម៉ត់ចត់ជាមុនសិនថា ទង្វើឬសកម្មភាព នោះអាចនឹងប៉ះពាល់ដល់បុគ្គលខ្លួនឯង ឬក៏អ្នកដទៃដែរឬអត់?
