ការប្រកួតពានរង្វាន់បាល់ទះ ជើងឯកថ្នាក់ជាតិរបស់ប្រទេសវៀតណម នឹងចាប់ផ្តើមការប្រកួតជាផ្លូវការនៅថ្ងៃទី៣០ ខែមីនា ឆ្នាំ២០២៤ នេះហើយ ស្របពេលដែលកីឡាករបរទេសចំនួន ១០រូបគឺស្ថឹតក្នុងបញ្ជីឈ្មោះកីឡាករបរទេស ដោយក្នុងនោះក៏មានកីឡការកម្ពុជា មួយរូបផងដែរ។
ក្លិបបាល់ទះ Lavie Long An គឺជាក្លិបដែលកីឡាករ គួន ម៉ុម ត្រៀមប្រកបអាជីប នៅប្រទេសវៀតណាម ហើយក្នុងនោះ នៅតាមបណ្តាលក្លិបទាំង ៨ផ្សេងទៀត ក៏មានកីឡាករបរទេស ចូលរួមប្រកួតប្រជែង នៅលីគបាល់ទះនៃប្រទេសវៀតណាម ផងដែរ។
សារព័ត៌មានត្រយង សូមជម្រាបជូនប្រិយមិត្តអំពីកីឡាករបរទេសតាមក្រុមទាំង៨នោះដូចតទៅ៖
ទី១. ក្លិបបាល់ទះ Sanest Khánh Hòa មានកីឡាករបរទេសសញ្ជាតិប្រេស៊ីល ចំនួនពីរនាក់ ក្នុងនោះមានដូចជា កីឡាករ Evandro Dias Souza និងកីឡាករ Luiz Felipe Perotto ។
ទី២. ក្លិបបាល់ទះ Biên Phòng មានកីឡាករបរទេសសញ្ជាតិថៃ ម្នាក់នោះគឺកីឡាករ Wanchai Tabwises ។
ទី៣. ក្លិបាល់ទះ Thể Công មានកីឡាករសញ្ជាតិថៃចំនួនម្នាក់គឺកីឡាករ Kittithad Nuwaddee ។
ទី៤. ក្លិបបាល់ទះ Hà Tĩnh មានកីឡាករសញ្ជាតិថៃ ម្នាក់គឺកីឡាករ Assanaphan Chantajorn ។
ទី៥. ក្លិបបាល់ទះ LP Bank Ninh Bình មានកីឡាករបរទេស ចំនួនពីរនាក់ក្នុងនោះមានដូចជា កីឡាករ Carlos Alberto Araujo សញ្ជាតិគុយបា និងកីឡាករ Anut Promchan សញ្ជាតិថៃ ។
ទី៦. ក្លិបបាល់ទះ Lavie Long An គឺមានកីឡាករបរទេសសញ្ជាតិខ្មែរ ម្នាក់នោះគឺកីឡាករគួន ម៉ុម។
ទី៧ ក្លិបាល់ទះ Đà Nẵng គឺមានកីឡាករបរទេសសញ្ជាតិថៃ ចំនួនមួយនាក់ នោះគឺកីឡាករ Thanathat Thaweerat ។
ក្រោយគេទី៨ គឺក្លិបបាល់ទះ XSKT Vĩnh Long មានសមាជិកកីឡាករបរទេសសញ្ជាតិថៃ ចំនួនម្នាក់នោះគឺកីឡាករ Chaiwat Thungkham ។
សូមបញ្ជាក់ដែរងថា ក្លិបបាល់ទះទាំង៩ ដែលចូលរួមប្រកួតពានរង្វាន់លីគបាល់ទះរបស់ប្រទេសវៀតណាម ផ្នែកបុរស គឺសុទ្ធសឹងតែមានកីឡាករបរទេសទាំងអស់ ប៉ុន្តែក្លិបបាល់ទះ Hà Nội គឺមិនមានកីឡាករបរទេសនោះទេ ពោលគឺប្រើប្រាស់កីឡារដើមវៀតណាម សុទ្ធ។
សម្រាប់កម្មវីធីនៃការប្រកួតពានរង្វាន់បាល់ទះ ជើងឯកថ្នាក់ជាតិ ជុំទី១ ឆ្នាំ២០២៤ នៅថ្ងៃបើកឆាកនោះគឺក្រុម LP Bank Ninh Binh ត្រូវប៉ះ Border Guard ខណៈក្រុម Ha Tinh ត្រូវប៉ះ XSKT Vĩnh Long នៅថ្ងៃទី៣០ ខែមីនា ឆ្នាំ២០២៤ ខាងមុខនេះ។
សម្រាប់កីឡាករ គួន ម៉ុម បច្ចុប្បន្នមានវ័យ២៦នាំ ជាកីឡាករដែលមានបទពិសោធន៍ខ្លាំងរបស់កម្ពុជា ដោយរូបគេធ្លាប់បានចេញទៅប្រកបអាជីពនៅប្រទេសឥណ្ឌូណេស៊ី កាលពីឆ្នាំឆ្នាំ២០២០ កន្លងទៅជាមួយក្រុម Garuda Jakarta ក្នុងរដ្ឋធានីហ្សាកាតា។
យ៉ាងណាក្ដីកីឡាករូបនេះដុះចេញពីក្រុមបាល់ទះក្រសួងមហាផ្ទៃចន្លោះឆ្នាំ២០១៥ ដល់២០១៨ មុនផ្ទេរចូលរួមជាមួយក្រុមវិសាខា ពីឆ្នាំ២០១៨ រហូតដល់បច្ចុប្បន្ន។
ដូច្នេះកីឡាករ គួន ម៉ុម គឺជាកីឡាករខ្មែរទី២ ដែលផ្លាស់ទៅចូលក្រុមនៅក្រៅប្រទេស បន្ទាប់ពីកីឡាករ វឿន វាសនា បច្ចុប្បន្នកំពុងប្រកបអាជីពនៅលីគបាល់ទះតៃវ៉ាន់ Enterprise Volleyball League។
