សិល្បៈជាតិ៖ ពិតជាមិនធម្មតាមែននៅក្នុងសប្ដាហ៍ទី៣ នៃរដូវកាលទីពីរ កម្មវិធី Beat The Best បេក្ខជនមកពីខេត្តកណ្ដាល ពេជ្រ រ៉ាស័ក្ដិ កំពុងតែខាបឆក់ដួងចិត្តអ្នកទស្សនាឱ្យលន្លង់លន្លោចនឹងសំនៀងដ៏សែនក្រអួនក្រអៅជាពិសេស រឿងរ៉ាវជីវិត ដ៏សែនកម្សត់ រហូតអ្នកដែលបានស្ដាប់ឮលួចស្រក់ទឹកភ្នែកអាណិត។
ក្រោយពីទំព័រហ្វេសប៊ុកកម្មវិធីប្រកួតប្រជែងអ្នកមានសមត្ថភាពផ្នែកចម្រៀងខ្លាំងប៉ះខ្លាំង Beat The Best បានកាត់ឃ្លីបវីដេអូយកមកបង្ហោះធ្វើឱ្យរឿងរ៉ាវនៃជីវិតពិតរបស់ បេក្ខជន ពេជ្រ រ៉ាស័ក្ដិកាន់តែទទួលបាននូវការចាប់អារម្មណ៍ ព្រោះបេក្ខជនរូបនេះបានលើកយកបទចម្រៀង «បងផ្ញើកូនផង» មកប្រកួត អាស្រ័យដោយរឿងនេះស្រដៀងទៅនឹងជីវិតពិតរបស់ខ្លួន។ បើតាមការរៀបរាប់របស់បុរសវ័យ៣២ឆ្នាំរូបនេះ លោកនិងភរិយាបានបែកបាក់គ្នាដោយបន្សល់ទុកចំណងដៃកូនស្រីតូចៗដ៏គួរឱ្យស្រលាញ់ពីរនាក់ ខណៈដែលលោកមិនទាន់អាចបំភ្លេចអតីតភរិយាបានផងនោះ តែធ្លាយដំណឹងមកថាខាងស្រីកំពុងត្រៀមចូលរោងការ។ ត្បិតថារឿងរ៉ាវជីវិតរបស់លោកកម្សត់និងគួរឱ្យអាណិតក្ដី ប៉ុន្តែនេះគឺជាកម្មវិធីប្រកួតចម្រៀងអ្វីដែលត្រូវតែមាននិងផ្តោតជាចំបងគឺទឹកដមសំឡេង នេះគឺជាអ្វីដែលគណៈកម្មការឆន សុវណ្ណរាជបានសង្កត់ធ្ងន់។
នៅពេលដែលបេក្ខជនរូបនេះបង្ហើសំនៀង ធ្វើឱ្យអ្នកដែលបានស្ដាប់ទទួលស្គាល់ថាពិតជាអន្លង់អន្លោចកម្សត់ ពិសេស ត្រូវនឹងសាច់រឿងជីវិតរបស់បេក្ខជនរូបនេះ។ ក្រោយបកស្រាយចប់ និងស្ដាប់មតិណែនាំ ពេជ្រ រ៉ាស័ក្ដិ ដែលពេលខ្លះធ្វើការជាជាងសំណង់ផងនោះ ត្រូវបានគណៈកម្មការ ៣រូប មានកញ្ញា សុខ សីឡាលីន អ្នកនាង សួស វីហ្សា និង លោក ឆន សុវណ្ណរាជ ផ្ដល់ឱកាសឱ្យបន្តក្នុងកម្មវិធី មានតែអ្នកនាង ពេជ្រ សោភា មួយគត់ដែលមិនឱ្យបន្ត ដែលធ្វើឱ្យអ្នកទស្សនាមួយចំនួនមិនសប្បាយចិត្តចំពោះការសម្រេចចិត្តរបស់គណៈកម្មាការរូបនេះ យ៉ាងណាមិញជាមួយនឹងសំឡេងគាំទ្រ៣ទល់មួយធ្វើឱ្យបេក្ខជនរូបនេះបានបន្តនៅក្នុងកម្មវិធីជាបន្តទៀត។
ងាកមកស្ដាប់ចំណាប់អារម្មណ៍អ្នកលេងបណ្ដាញសង្គមឯណេះវិញ គ្រប់គ្នាសុទ្ធតែសរសើរចំពោះទឹកសំឡេងដែលបង្កប់ទៅដោយទឹកដមសែនពីរោះដែលមិនត្រឹមតែពីរោះត្រឹមបទដែលត្រូវនឹងសាច់រឿងខ្លួននោះឡើយ សូម្បីតែបទចម្រៀងសម័យកំពុងល្បីល្បាញ ក៏ពេជ្រ រ៉ាស័ក្ដិ អាចបកស្រាយបានយ៉ាងពីរោះផងដែរ។
សូមជំរាបជូនថា បេក្ខជនដែលមានទឹកដមសំឡេងពីរោះក្រអួនក្រអៅ ពេជ្រ រ៉ាស័ក្ដិ បានតស៊ូពុះពារក្នុងវិស័យចម្រៀងអស់រយៈពេលជាង ១៤ឆ្នាំមកហើយ។ចូលរួមប្រកួតប្រជែងបញ្ចេញសមត្ថភាពលើកនេះ ព្រោះតែលោកមានក្ដីស្រម៉ៃចង់ក្លាយជាតារាចម្រៀងអាជីពនិងកុងត្រាប្រចាំផលិតកម្មហង្សមាស និងរស្មីហង្សមាស៕