ក្រុមគោរព្រៃកម្ពុជា បានធ្វើដំណើរដល់ប្រទេសអារ៉ាប៊ីសាអូឌីត ហើយដើម្បីត្រៀមចូលរួមការប្រកួតមិត្តភាពអន្តរជាតិ FIFA Series 2024 ដែលគ្រោងនឹងចាប់ផ្តើមពីថ្ងៃទី២១ ខែមីនា រហូតដល់ថ្ងៃទី២៦ ខែមីនា ឆ្នាំ២០២៤។
ដូចនេះសារព័ត៌មានត្រយង សូមជម្រាបជូនប្រិយមិត្ត ពី៥ប្រកួតចុងក្រោយរបស់ក្រុមគោរព្រៃកម្ពុជា មុនប៉ះក្រុមចំនួនពីរដែលមិនសូវឮឈ្មោះ ក្នុងពានរង្វាន់ FIFA Series 2024 ដែលធ្វើឡើងនៅប្រទេស អារ៉ាប៊ីសាអូឌីត៖
- នៅថ្ងៃទី៧ ខែកញ្ញា ឆ្នាំ២០២៣ ក្រុមជម្រើសជាតិកម្ពុជា ស្នើគ្នាជាមួយក្រុមហុងកុង ដោយលទ្ធផល ១-១ ក្នុងការប្រកួតមិត្តភាពអន្តជាតិ ខណៈការប្រកួតនោះធ្វើឡើងនៅពហុកីឡដ្ឋានជាតិអូឡាំពិក។
- នៅថ្ងៃទី១១ ខែកញ្ញា ឆ្នាំ២០២៣ ក្រុមកម្ពុជា បានយកឈ្នះលើក្រុមម៉ាកាវ ដោយលទ្ធផល ៤-០ ក្នុងការប្រកួតមិត្តភាពអន្តជាតិ ស្របពេលដែលការប្រកួតនោះធ្វើឡើងនៅពហុកីឡដ្ឋានជាតិអូឡាំពិក។
- នៅថ្ងៃទី១២ ខែតុលា ឆ្នាំ២០២៣ ក្រុមគោរព្រៃកម្ពុជា បានត្រឹមស្នើគ្នាជាមួយក្រុមជម្រើសជាតិប៉ាគីស្ថាន ដោយលទ្ធផល ០-០ ក្នុងការប្រកួតជម្រុះពានរង្វាន់ពិភពលោក FIFA World Cup ឆ្នាំ២០២៦ វគ្គជម្រុះជុំទី១ ជើងទី១ ខណៈការប្រកួតនោះធ្វើឡើងនៅពហុកីឡដ្ឋានជាតិអូឡាំពិក ។
- នៅថ្ងៃទី១៧ ខែតុលា ក្រុមកម្ពុជា ប្រកួតចាញ់ក្រុមប៉ាគីស្ថាន ដោយលទ្ធផល ០-១ សម្រាប់ជើងទី២ វគ្គជម្រុះជុំទី១ នៃពានរង្វាន់ពិភពលោក FIFA World Cup ឆ្នាំ២០២៦។
- នៅថ្ងៃទី៣១ ខែឆ្នូ ឆ្នាំ២០២៣ ក្រុមកម្ពុជា ប្រកួតចាញ់ក្រុមម្ចាស់ផ្ទះកាតា ដោយលទ្ធផល ៣-០ ក្នុងការប្រកួតលក្ខណៈមិត្តភាពក្រៅផ្លូវការ ( Close Door Training Match) នៅកីឡដ្ឋាន Al Rayyan ប្រទេសកាតា។
សម្រាប់៥ប្រកួតចុងក្រោយរបស់ហ្គីណេអេក្វាទ័រ វិញឃើញថា៖
- នៅថ្ងៃទី៩ ខែមករា ឆ្នាំ២០២៤ ហ្គីណេអេក្វាទ័រ ស្នើជាមួយជីប៊ូទី ដោយលទ្ធផល ១-១ មិត្តភាព
- នៅថ្ងៃទី១៤ ខែមករា ឆ្នាំ២០២៤ ហ្គីណេអេក្វាទ័រ ស្នើគ្នាជាមួយនីហ្សេរីយ៉ា ដោយលទ្ធផល ១-១ ក្នុងពានរង្វាន់ Africa Cup
- នៅថ្ងៃទី១៨ ខែមករា ឆ្នាំ២០២៤ ហ្គីណេអេក្វាទ័រ យកឈ្នះលើក្រុមហ្គីណេ-ប៊ីសូ ដោយលទ្ធផល ៤-២ ក្នុងពានរង្វាន់ Africa Cup
- នៅថ្ងៃទី២២ ខែមករា ឆ្នាំ២០២៤ ហ្គីណេអេក្វាទ័ យកឈ្នះលើក្រុមកូតឌីវ័រ ដោយលទ្ធផល ៤-០ ក្នុងពានរង្វាន់ Africa Cup
- នៅថ្ងៃទី២៨ ខែមករា ឆ្នាំ២០២៤ ហ្គីណេអេក្វាទ័រ ចាញ់ក្រុមហ្គីណេ ដោយលទ្ធផល ១-០ ក្នុងពានរង្វាន់ Africa Cup
សម្រាប់៥ប្រកួតចុងក្រោយរបស់ក្រុមហ្គីយ៉ាន វិញឃើញថា៖
- នៅថ្ងៃទី៩ ខែកញ្ញា ឆ្នាំ២០២៣ ក្រុមហ្គីយ៉ាន យកឈ្នះលើក្រុម Barbuda ដោយលទ្ធផល ៥-១ CONCACAF Nations League
- នៅថ្ងៃទី១២ ខែកញ្ញា ឆ្នាំ២០២៣ ក្រុមហ្គីយ៉ាន យកឈ្នះក្រុមបាហាម៉ាស ដោយលទ្ធផល ៣-២ CONCACAF Nations League
- នៅថ្ងៃទី១៤ ខែតុលា ឆ្នាំ២០២៣ ក្រុមហ្គីយ៉ាន បានយកឈ្នះលើក្រុមព័រតូរីកូ ដោយលទ្ធផល ៣-១ CONCACAF Nations League
- នៅថ្ងៃទី១៧ ខែតុលា ឆ្នាំ២០២៣ ក្រុមហ្គីយ៉ាន បានបន្តយកឈ្នះក្រុមព័រតូរីកូ នៅជើងទី២ ដោលទ្ធផល ៣-១ CONCACAF Nations League
- នៅថ្ងៃទី២១ ខែវិច្ចិកា ឆ្នាំ២០២៣ ក្រុមហ្គីយ៉ាន បន្តយកឈ្នះ ក្រុមBarbuda ដោយលទ្ធផល ៦-០ CONCACAF Nations Leagu
សម្រាប់កម្មវិធីប្រកួតរបស់ក្រុមជម្រើសជាតិកម្ពុជា វិញគឺ៖
- នៅថ្ងៃទី២២ ខែមីនា ឆ្នាំ២០២៤ ក្រុមហ្គីណេអេក្វាទ័រ ប៉ះ ក្រុមកម្ពុជា វេលាម៉ោង ២:០០ រំលងអធ្រាត្រ។
- នៅថ្ងៃទី២៦ ខែមីនា ឆ្នាំ២០២៤ ក្រុមកម្ពុជា ប៉ះ ក្រុមហ្គីយ៉ាន វេលាម៉ោង ២:០០ រំលងអធ្រាត្រ។
សូមបញ្ជាក់ថាចាប់តាំងពីបង្កើតសហព័ន្ធកីឡាបាល់ទាត់កម្ពុជា មកក្រុមជម្រើសជាតិកម្ពុជា ធ្លាប់ប្រកួតទល់ក្រុមហ្គីណេ តែមួយគត់ដែលនៅក្រៅទ្វីបអាស៊ី ក្នុងឆ្នាំ១៩៦៦ គ្រាដែលកម្ពុជា ទទួលសិទ្ធិធ្វើម្ចាស់ផ្ទះកីឡា GANEFO ក្រៅពីនោះការប្រកួតផ្លូវការរបស់ក្រុមជម្រើសជាតិគឺសុទ្ធសឹងតែប៉ះជាមួយក្រុមបណ្តាប្រទេសក្នុងទ្វីបអាស៊ី ទាំងអស់។
នេះគឺជាលើកទី២ហើយក្នុងប្រវត្តិសាស្រ្តដែលបាល់ទាត់ជម្រើសជាតិបុរសកម្ពុជា ត្រូវប្រកួតទល់នឹងក្រុមនៅក្រៅទ្វីបអាស៊ី៕
