លោក Félix Dalmás បាននិយាយមុនក្រុមកម្ពុជាចេញទៅប្រកួត ពានរង្វាន់ FIFA Series ថា៖ គ្រប់ការប្រកួតទាំងអស់សុទ្ធតែសំខាន់សម្រាប់កម្ពុជា ប៉ុន្តែចំណុសំខាន់ដែលយើងបានត្រៀម គឺជាការប្រកួតនៅខែ៩ ដែលយើងត្រូវលេងវគ្គជម្រុះ Asian Cup ដូចនេះសម្រាប់ការរៀបចំក្រុមពីពេលនេះទៅគឺជាការរៀបចំសម្រាប់ការនៅពេលនោះ។
គ្រូជម្រើសជាតិរូបនេះបានបន្ថែមថា សម្រាប់ការប្រកួតនេះដែរកឺយើងត្រូវលេងនៅក្រៅដី ហើយក៏ជាការប្រកួតដែលយើងត្រូវលេងនៅម៉ោង ១០យប់ទៀត វាគឺជាឱកាសមួយសម្រាប់ក្រុម ក៏ដូចជាកីឡាករក្នុងការប្រកួតប្រជែងថ្មីមួយ បទពិសោធន៍ថ្មី។
លោកបន្តថា បច្ចុប្បន្នយើងត្រូវដឹងថា កម្ពុជាកំពុងនៅចំណុចត្រង់ណាសម្រាប់បាល់ទាត់ដែលកំពុងអភិវឌ្ឍ ដូចនេះយើងត្រូវប្រកួតប្រជែងជាមួយប្រទេសដែលខ្លាំងដូចជាការតា ដែលក្រុមធ្លាប់ជួប យើងនឹងដឹងថាក្រុមគេពិតជាខ្លាំងជាងយើង។
លោក Félix Dalmás ថាធ្វើដែលយើងធ្វើបានគឺជាការតេស្តសមត្ថភាពទាំងផ្លូវចិត្ត និងកាយសប្បទា ជាមួយទៅហ្នឹងក្រុមដែលមានកម្រិតខ្ពស់បែបនេះ ដើម្បីអោយស្មារតី ឆន្ទ:កីឡាករខ្លាំងកម្រិតណា រួមជាមួយកាយសប្បទារបស់ ពួកគេ។
សូមរំលឹកថា ក្រុមជម្រើសជាតិកម្ពុជា ក្រោមការដឹកនាំរបស់លោក Félix Dalmás កំពុងស្ថិតប្រទេសនៅ អារ៉ាប៊ីសាអូឌីត ដើម្បីចូលរួមប្រកួតនៃពានរង្វាន់ FIFA Series៖
– ថ្ងៃទី២២ ខែមីនា កម្ពុជា ប៉ះ ហ្គីយ៉ាន ម៉ោង ២:០០ រំលងអធ្រាត្រ នៅកីឡដ្ឋាន Prince Abdullah Al-Faisal Sports City
– ថ្ងៃទី២៦ ខែមីនា កម្ពុជា ប៉ះ ហ្គីណេអេក្វាទ័រ ម៉ោង ២:០០ រំលងអធ្រាត្រ នៅកីឡដ្ឋាន Prince Abdullah Al-Faisal Sports City។
សូមបញ្ជាក់ថាចាប់តាំងពីបង្កើតសហព័ន្ធកីឡាបាល់ទាត់កម្ពុជា មកក្រុមជម្រើសជាតិកម្ពុជា ធ្លាប់ប្រកួតទល់ក្រុមហ្គីណេ តែមួយគត់ដែលនៅក្រៅទ្វីបអាស៊ី ក្នុងឆ្នាំ១៩៦៦ គ្រាដែលកម្ពុជា ទទួលសិទ្ធិធ្វើម្ចាស់ផ្ទះកីឡា GANEFO ក្រៅពីនោះការប្រកួតផ្លូវការរបស់ក្រុមជម្រើសជាតិគឺសុទ្ធសឹងតែប៉ះជាមួយក្រុមបណ្តាប្រទេសក្នុងទ្វីបអាស៊ី ទាំងអស់។
នេះគឺជាលើកទី២ហើយក្នុងប្រវត្តិសាស្រ្តដែលបាល់ទាត់ជម្រើសជាតិបុរសកម្ពុជា ត្រូវប្រកួតទល់នឹងក្រុមនៅក្រៅទ្វីបអាស៊ី៕