ម្ចាស់ជើងឯកនៅក្នុងព្រឹត្តិការន៍ M5 World Champions គឺក្រុម AP Bren បានបញ្ជាក់ជាផ្លូវការថា Brody គឺជាតួអង្គរវីរបុរសដែលពួកគេបានជ្រើសរើស តំណាង M5 Champion Skin ដើម្បីសហការរចនាជាមួយអ្នកអភិវឌ្ឍន៍ហ្គេមអន្តរជាតិ និងអ្នកបោះពុម្ពផ្សាយ MOONTON Games។
ក្រុមAP Bren ត្រូវបានផ្តល់ឱកាសឱ្យធ្វើការជាមួយ Mobile Legends: Bang Bang maker ក្នុងការជ្រើសរើសហេរ៉ូតំណាង ណាមួយដែលខ្លួនពេញចិត្ត ក្នុងការប្រកួតកន្លងមក ដែលជាផ្នែកមួយនៃអត្ថប្រយោជន៍សម្រាប់ការឈ្នះការប្រកួត MLBB ដ៏ធំបំផុតរបស់ពិភពលោកដែលរៀបចំនៅប្រទេសហ្វីលីពីនកាលពីខែធ្នូ ឆ្នាំ២០២៣ កន្លងទៅ។
លោក Jab Escutin នាយករបស់ក្រុម AP Bren បានលើកឡើងថា៖ យើងមានអារម្មណ៍ថា Brody គឺជាផ្នែកមួយដ៏ធំនៃភាពជោគជ័យរបស់យើងនៅក្នុងការប្រកួត M5 ។ ហេរ៉ូមួយនេះបានជួយក្រុមរបស់យើងបានច្រើនក្នុងជ័យជម្នះ ហើយទីបំផុតបានជួយរក្សាតំណែងជើងឯកជាច្រើនសម័យកាលរបស់ក្រុមមកពីហ្វីលីពីន ក្នុងការប្រកួតលំដាប់ពិភពលោករបស់ MLBB។
លោក Jab Escutin បន្តថា៖ យើងចង់ឱ្យវីរបុរសនេះតំណាងឱ្យភាពជោគជ័យរបស់ក្រុមយើងនៅក្នុងហ្គេម និងសម្រាប់ពួកយើង ពិសេសសម្រាប់អ្នកគាំទ្រដើម្បីក្លាយជាផ្នែកមួយនៃភាពជោគជ័យនោះដោយការធ្វើការរចនា M5 Champion Skin សម្រាប់អ្នកគាំទ្ររបស់ពួកយើង។
រំលឹកថា ក្នុងឆ្នាំ២០១៩ ក្រុម EVOS Legends របស់ប្រទេសឥណ្ឌូនេស៊ីដែលជាម្ចាសើជើងឯក បានជ្រើសរើសហេរ៉ូ Harith ដែលតំណាងក្រុមជ័យជម្នះ ជើងឯក M Champion។ ទន្ទឹមនឹងនេះដែរ ក្រុម Bren Esports របស់ហ្វីលីពីនបានជ្រើសរើស Lancelot បន្ទាប់ពីឈ្នះ M2 និង ក្រុម Blacklist International បានជ្រើសរើស Estes បន្ទាប់ពីឈ្នះ M3 ។ កាលពីឆ្នាំមុនក្រុម Echo របស់ហ្វីលីពីន បានសហការរចនា Skin សម្រាប់ Chou ដែលជាហេរ៉ូសម្រាប់ក្រុមខ្លួនពេញចិត្ត៕