សិល្បៈជាតិ ៖ កម្មវិធីបង្កើតឡើងស្នាដៃកូនខ្មែរពិតៗ Diano Fashion Model នៅបន្តបើកទ្វារស្វាគមន៍ប្អូនៗដែលមានបំណងចង់ក្លាយជាម៉ូដែល ជាអ្នកសម្ដែងអាជីព នាថ្ងៃអនាគត តបតទៅតាមការទទូចដ៏ច្រើនពីប្អូនៗដែលមិនទាន់បានដាក់ពាក្យចូលរួមប្រកួត។
ក្រោយបើកទ្វារ Casting កាលពីថ្ងៃទី១៦ ខែមីនា ឆ្នាំ២០២៤ កន្លងទៅថ្មីៗនេះ មានប្អូនៗយុវវ័យទាំង៣ភេទ និងប្អូនៗកុមារជា បេក្ខភាពដែលស្រលាញ់វិស័យបង្ហាញម៉ូដ ដើរម៉ូដ និងអ្នកស្រលាញ់វិស័យសិល្បៈ ទាំងក្នុងរាជធានីភ្នំពេញ និងបណ្ដាខេត្តនានាទូទាំងប្រទេស បានចូលរួមយ៉ាងច្រើនកុះករ ដើម្បីបង្ហាញពីសមត្ថភាពនិងទេពកោសល្យរៀងៗខ្លួន។
ត្បិតរើសបានបេក្ខជនមានសមត្ថភាពជាច្រើនរូបដើម្បីត្រៀមលក្ខណៈសម្បត្តិប្រកួតប្រជែងនៅក្នុងកម្មវិធី Diano Fashion Model First Edition របស់ខ្លួនហើយក្ដី ប៉ុន្តែដោយសារតែមានប្អូនៗដែលដាក់ពាក្យមិនទាន់បានបន្ដផ្ញើសារមកទំព័រហ្វេសប៊ុករបស់កម្មវិធីស្នើសុំយ៉ាងទទូចទើបធ្វើឱ្យម្ចាស់កម្មវិធី លោក យន់ វុទ្ធី ហៅអេរិច ទន់ចិត្ត បន្តផ្ដល់ឱកាសបើកទ្វារស្វាគមន៍ប្អូនៗ ឱ្យបន្តដាក់ពាក្យចូលរួមរហូតដល់ដើមខែមេសាឆ្នាំ២០២៤ខាងមុខនេះ។ ដូច្នេះសម្រាប់ប្អូនៗដែលមានបំណងចង់ក្លាយជា Super Star ទៅតាមក្ដីស្រមៃ មិនថាជា បុរស នារី បងប្អូនភេទទីបី ឬប្អូនៗកុមារតូចៗ កុំឱ្យឱកាសមាសនេះរំលងឱ្យសោះ ប្អូនៗនៅតែអាចបន្តដាក់ពាក្យដើម្បីចូលរួមប្រកួតប្រជែងនៅក្នុងកម្មវិធីនេះបាន។
សូមជម្រាបជូនផងដែរថា ប្អូនៗបេក្ខភាពលេចធ្លោដែលបានជាប់ Casting នឹងត្រូវបានជ្រើសរើសឱ្យដើរបង្ហាញសមត្ថភាពនៅថ្ងៃទី៣០ ខែមីនា ឆ្នាំ២០២៤ នាផ្សារទំនើប Fun Mall ផងដែរ៕