សិល្បៈអន្តរជាតិ ៖ ពេលនេះ Jung Joon Young បានរួចផុតពីទោសហើយ ក្រោយលោកបានជាប់ពន្ធនាគារអស់រយៈ៥ឆ្នាំពេញ។
យោងតាមការផ្សាយផ្ដាច់មុខរបស់សារព័ត៌មាន News1 Jung Joon Young ត្រូវបានដោះចេញពីពន្ធនាគារដោយស្ងៀមស្ងាត់កាលពីព្រឹកថ្ងៃទី១៩ ខែមីនា ឆ្នាំ២០២៤។ បុរសធ្លាប់ជា K-pop Star ដ៏ល្បីរូបនេះត្រូវបានដោះលែងចេញពីពន្ធនាគារ Mokpo នៅតំបន់ Jeollanam កាលម៉ោង៥និង៥នាទីព្រឹកព្រលឹម។
សំលៀកបំពាក់ចេញពីពន្ធនាគាររបស់លោកគឺពណ៌ខ្មៅសុទ្ធ ដោយមានមួក ម៉ាស និងវែនតា បិទបាំងមុខមាត់សឹងតែជិតឈឹង។ ចេញមកក្រៅលោកបានជួបមុខអ្នកសារព័ត៌មានប៉ុន្តែលោកបានចាកចេញដោយ មិននិយាយអ្វីទាំងអស់។ នៅពេលនេះក្រសែភ្នែកអ្នកសារព័ត៌មានកំពុងតែតាមដានយ៉ាងយកចិត្តទុកដាក់ថាតើ Jung Joon Young នឹងធ្វើអ្វីនៅពេលអនាគត ព្រោះក្រោយពេលដែលលោកទទួលស្គាល់ទោសកំហុសគ្រប់សកម្មភាពសិល្បៈលោកត្រូវបានព្យួរទាំងស្រុង។
អតីតតារាល្បីរូបនេះជាប់ពន្ធនាគារចំនួន៥ឆ្នាំពីបទល្មើសទាក់ទងនឹងករណីនៃរឿងអាស្រូវក្លិបកម្សាន្ត Burning Sun ដោយកាលនោះលោកជាប់ចោទពីបទបំពានផ្លូវភេទ និងបានលួចថតវីដេអូនារីៗទាំងនោះហើយយកទៅចែកចាយ៕