នៅថ្ងៃទី២៥ ខែមីនា ឆ្នាំ២០២៤ នេះ Facebook Page ផ្លូវការរបស់ក្លិបវិសាខា បានប្រកាសថានឹងប្រកួតទល់នឹងក្រុមកងយោធពលខេមរភូមិន្ទ នៃពានរង្វាន់ Cambodian Premier League នៅចុងខែមីនា ខាងមុខនេះ។
សូមរំលឹកថា ក្លិបបាល់ទាត់វិសាខា ម្ចាស់ជើងឯកពានរង្វាន់បាល់ទាត់សម្តេចតេជោ ហ៊ុន សែន ៣សម័យកាល បានប្រកាសដកខ្លួនចេញពីគ្រប់ពានរង្វាន់ដែលខ្លួននៅសេសសល់ ក្នុងរដូវកាលឆ្នាំ២០២៣-២៤ នេះ ពោលគឺគ្រប់ពានរង្វាន់ដែលរៀបចំឡើងដោយក្រុមហ៊ុន Cambodian Premier League (លីគទី១ និងលីគទី២) និងពានរង្វាន់សម្តេចតេជោ ហ៊ុន សែន កាលពីថ្ងៃទី៨ ខែមីនា ឆ្នាំ២០២៤ កន្លងទៅ។
គួរឱ្យដឹងថា ក្លិបបាល់ទាត់វិសាខា បានឡើងមកលេងលីគកំពូលកម្ពុជា នៅរដូវកាលឆ្នាំ២០១៨ ក្រោយឈ្នះជើងឯកលីគទី២ នៅរដូវកាលឆ្នាំ២០១៧។ ក្នុងរដូវកាលដំបូងក្នុងលីគកំពូលកម្ពុជា ក្លិបមួយនេះបានខ្ចីកីឡដ្ឋានក្លិបវេស្ទើន ធ្វើជាទឹកដីខ្លួនបណ្ដោះអាសន្ន ស្របពេលខ្លួនបានកសាងកីឡដ្ឋានស្តង់ដារ នៅម្តុំហ្រ្គេនភ្នំពេញ ហើយក្រោយសាងសង់រួចរាល់ ក្លិបបានដាក់ឈ្មោះថាកីឡដ្ឋានព្រីនស៍។
កីឡដ្ឋានព្រីនស៍ ធ្លាប់ទទួលសិទ្ធិធ្វើជាម្ចាស់ផ្ទះការប្រកួតថ្នាក់ជាតិនិងអន្តរជាតិជាច្រើន ជាពិសេសជាទីតាំងសំខាន់មួយក្នុងបេសកកម្មរបស់កម្ពុជា ទទួលធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមឆ្នាំ២០២៣ កន្លងទៅថែមទៀតផង។
ក្រុមថ្មីថ្មោងមួយនេះធ្លាប់ឈរជាក្រុមជើងឯករងពានរង្វាន់លីគកំពូលកម្ពុជា ២សម័យកាលគឺនៅឆ្នាំ២០១៩ និង២០២២ ខណៈជាក្រុមឈ្នះជើងឯកពានរង្វាន់សម្តេចតេជោ ហ៊ុន សែន ៣សម័យកាលជាប់ៗគ្នាគឺនៅឆ្នាំ២០២០, ២០២១, ២០២២ ព្រមទាំងធ្លាប់រងជើងឯកពានរង្វាន់ Cambodian Super Cup នៅឆ្នាំ២០២២ និង ២០២៣ និងរងជើងឯកពានរង្វាន់ Cambodian League Cup ឆ្នាំ២០២២ ទៀតផង៕
