ក្រុមបាល់ទាត់ជម្រើសជាតិកម្ពុជា នឹងត្រូវបន្តជួបក្រុមជម្រើសជាតិហ្គីយ៉ាន នៅយប់ថ្ងៃទី២៦ ឈានចូលថ្ងៃទី២៧ ខែមីនានេះ វេលាម៉ោង ២:០០នាទី រំលងអធ្រាត្រ នៅកីឡដ្ឋាន Prince Abdullah Al-Faisal Sports City ក្នុងការប្រកួត FIFA Series 2024។
ក្នុងជំនួបទី១ ប៉ះក្រុមជម្រើសជាតិហ្គីណេអេក្វាទ័រ កាលពីរាត្រីថ្ងៃទី២២ ខែមីនា រំលងអធ្រាត្រ កម្ពុជា បានបរាជ័យក្នុងលទ្ធផល ២ទល់និង០ នៅកីឡដ្ឋាន Prince Abdullah Al-Faisal Sports City។
ក្រុមកម្ពុជា ស្ថិតនៅពូល (អារ៉ាប៊ីសាអូឌីត A) ជាមួយហ្គីយ៉ាន (អាមេរិកខាងជើង) និងហ្គីណេអេក្វាទ័រ (អាហ្វ្រិកកណ្តាល) ដែលគ្រោងនឹងចាប់ផ្តើមពីថ្ងៃទី២១ ខែមីនា រហូតដល់ថ្ងៃទី២៦ ខែមីនា ឆ្នាំ២០២៤ នៅប្រទេសអារ៉ាប៊ីសាអូឌីត។
ចាប់តាំងពីបង្កើតសហព័ន្ធកីឡាបាល់ទាត់កម្ពុជា មកក្រុមជម្រើសជាតិកម្ពុជា ធ្លាប់ប្រកួតទល់ក្រុមហ្គីណេ តែមួយគត់ដែលនៅក្រៅទ្វីបអាស៊ី ក្នុងឆ្នាំ១៩៦៦ គ្រាដែលកម្ពុជា ទទួលសិទ្ធិធ្វើម្ចាស់ផ្ទះកីឡា GANEFO ក្រៅពីនោះការប្រកួតផ្លូវការរបស់ក្រុមជម្រើសជាតិគឺសុទ្ធសឹងតែប៉ះជាមួយក្រុមបណ្តាប្រទេសក្នុងទ្វីបអាស៊ី ទាំងអស់។
នេះគឺជាលើកទី ៣ហើយក្នុងប្រវត្តិសាស្រ្តដែលបាល់ទាត់ជម្រើសជាតិបុរសកម្ពុជា ត្រូវប្រកួតទល់នឹងក្រុមនៅក្រៅទ្វីបអាស៊ី៕
