សិល្បៈជាតិ៖ នៅព្រឹកថ្ងៃទី២៥ ខែមីនា ឆ្នាំ២០២៣ នេះ សាលាមធ្យមសិល្បៈបានរៀបចំសន្និសីទសារព័ត៌មានមួយស្ដីពីកម្មវិធីរៀបចំអបអរសាទរពិធីបុណ្យចូលឆ្នាំថ្មីប្រពៃណីខ្មែរ ដែលកម្មវិធីនឹងត្រៀមរៀបចំឡើងយ៉ាងអធិកអធម គគ្រឹកគគ្រេងនៅថ្ងៃទី១ និងទី២ ខែមេសាខាងមុខនេះ។ ថ្លែងប្រាប់ពីកម្មវិធីសំខាន់នៃព្រឹត្តិការណ៍អបអរសាទរ ក៏ដូចជាបង្ហាញជូនសមិទ្ធិផលសម្រេចរបស់លោកគ្រូ និងអ្នកគ្រូ សាស្ត្រាចារ្យ សិស្សានុសិស្សដែលខិតខំប្រឹងប្រែងហ្វឹកហាត់គ្រប់ទំរង់សិល្បៈ ដោយមានការបង្ហាញជូននិងលេងកម្សាន្តល្បែងប្រជាប្រិយខ្មែរ ការប្រគំតន្ត្រីនិងផ្ទាំងទស្សនីយភាពជាច្រើនទៀត។
នៅក្នុងឱកាសនោះដែរក៏មានការចូលរួមពីសិល្បករល្បីល្បាញជាច្រើនរូបដែលជាអតីតសិស្សសាលាមធ្យមវិចិត្រសិល្បៈ មានដូចជា អ្នកនាង ខាត់ សុឃីម លោក ប៉ែន ចំរុង កញ្ញា នី មុនីនាថ កញ្ញា សុគា គីមលាង អ្នកនាង មាស ម៉ាលីណា លោក សាយ សៀរ៉ា និងសិល្បករ តន្ត្រីករល្បីៗជាច្រើនដួងទៀត។
សូមជំរាបជូនថា បងប្អូនប្រជាជនកម្ពុជា ក៏ដូចជាភ្ញៀវជាតិ និងអន្តរជាតិអាចចូលរួម ទស្សនា និងលេងល្បែងប្រជាប្រិយនៅទីតាំងសាលាមធម្យមសិល្បៈស្ថិតនៅលើវិថីបណ្ឌិតម៉ុងឬទ្ធី បឹងបាយ៉ាប 1928 ឬតាមដានព័ត៌មានបន្ថែមលើទំព័រហ្វេសប៊ុករបស់ សាលាមធ្យមវិចិត្រសិល្បៈ – Secondary School of Fine Arts៕
