តូក្យូ៖ រដ្ឋាភិបាលជប៉ុនបាននិយាយនាថ្ងៃពុធ នេះថា ការស្លាប់របស់មនុស្ស ២នាក់ និងការសម្រាកព្យាបាលនៅមន្ទីរពេទ្យជាង ១០០នាក់ ត្រូវបានផ្សារភ្ជាប់ទៅនឹងការភ័យខ្លាចពីបញ្ហាសុខភាពដែលកំពុងកើនឡើងនៅក្នុងប្រទេសជប៉ុន ជុំវិញអាហារបំប៉នដែលមានគោលបំណងកាត់បន្ថយកូឡេស្តេរ៉ុល។ នេះបើយោងតាមការចេញផ្សាយដោយសារព័ត៌មាន CNA នាថ្ងៃពុធ ទី២៧ ខែមីនា ឆ្នាំ២០២៤។
ទាក់ទិននឹងបញ្ហានេះ អាជ្ញាធរកំពុងស៊ើបអង្កេត បន្ទាប់ពីថ្នាំគ្រាប់ដែលមាននៅក្នុងបញ្ជរតាមផ្សារទំនើប ឬ ទីតាំងលក់ឱសថនានា ត្រូវបានក្រុមហ៊ុនផលិតឱសថជប៉ុន Kobayashi Pharmaceutical ប្រមូលយកមកវិញបន្ទាប់ពីមានការត្អូញត្អែរពីអតិថិជន ពាក់ព័ន្ធនឹងបញ្ហាក្រលៀន។
ការសិក្សាផ្នែកវេជ្ជសាស្រ្ដពិពណ៌នា អំពីអង្ករដំបែក្រហម ថា ជាជម្រើសជំនួសថ្នាំ Statins សម្រាប់បញ្ចុះកូឡេស្តេរ៉ុលខ្ពស់ ប៉ុន្តែក៏ព្រមានពីហានិភ័យនៃការខូចខាតសរីរាង្គ អាស្រ័យលើសារធាតុគីមីរបស់វាដែរ។
អ្នកនាំពាក្យរដ្ឋាភិបាលកំពូលលោក Yoshimasa Hayashi បានប្រាប់អ្នកយកព័ត៌មានថា «ចំនួនសរុបនៃការស្លាប់ពេលនេះ គឺមាន ២នាក់ ខណអ្នកដែលកំពុងសម្រាកព្យាបាលនៅតាមមន្ទីរពេទ្យ មានចំនួន ១០៦ករណី»។
ក្រុមហ៊ុនផលិតអាហារបំប៉ន Kobayashi Pharmaceutical មូលដ្ឋាននៅទីក្រុង Osaka លក់ផលិតផលសុខភាពជាច្រើនប្រភេទ ដែលដាក់លក់តាមទីផ្សារតាមរយៈការផ្សាយពាណិជ្ជកម្មតាមទូរទស្សន៍ក្នុងប្រទេសជប៉ុន ហើយបានព្រមានថា វាមិនទាន់ឈានដល់ការសន្និដ្ឋានអំពីទំនាក់ទំនងមូលហេតុរវាងបញ្ហាសុខភាព និងផលិតផលរបស់វានោះទេ។ ក្រុមហ៊ុនខាងលើបន្ថែមថា ខ្លួនក៏បានផ្គត់ផ្គង់ឱសថនេះដល់ក្រុមហ៊ុនប្រហែល ៥០ផ្សេងទៀតនៅក្នុងប្រទេសជប៉ុន និងមានក្រុមហ៊ុន២ នៅតៃវ៉ាន់ផងដែរ៕
